ਨਵੀਂ ਦਿੱਲੀ, 29 ਜੁਲਾਈ (ਪੋਸਟ ਬਿਊਰੋ): ਭਾਰਤ ਨੇ ਰੱਖਿਆ ਦੇ ਖੇਤਰ `ਚ ਇੱਕ ਵੱਡੀ ਸਫਲਤਾ ਹਾਸਿਲ ਕੀਤੀ ਹੈ। ਰੱਖਿਆ ਖੋਜ ਅਤੇ ਵਿਕਾਸ ਸੰਗਠਨ ਨੇ ਜਾਣਕਾਰੀ ਦਿੱਤੀ ਹੈ ਕਿ ਭਾਰਤ ਦੀ ਸਵਦੇਸ਼ੀ ਮਿਜ਼ਾਈਲ ‘ਪ੍ਰਲਯ’ ਦਾ 28 ਅਤੇ 29 ਜੁਲਾਈ 2025 ਨੂੰ ਲਗਾਤਾਰ ਦੋ ਵਾਰ ਸਫਲਤਾਪੂਰਵਕ ਪ੍ਰੀਖਣ ਕੀਤਾ ਗਿਆ ਸੀ। ਇਹ ਪ੍ਰੀਖਣ ਫੌਜ ਦੀਆਂ ਜ਼ਰੂਰਤਾਂ ਮੁਤਾਬਕ ਕੀਤੇ ਗਏ ਸਨ ਤਾਂ ਜੋ ਇਹ ਦੇਖਿਆ ਜਾ ਸਕੇ ਕਿ ਮਿਜ਼ਾਈਲ ਛੋਟੀ ਅਤੇ ਲੰਬੀ ਦੂਰੀ `ਤੇ ਕਿੰਨੀ ਸਹੀ ਢੰਗ ਨਾਲ ਮਾਰ ਕਰ ਸਕਦੀ ਹੈ।
ਮਿਜ਼ਾਈਲ ਨਿਰਧਾਰਤ ਦਿਸ਼ਾ `ਚ ਉੱਡੀ ਅਤੇ ਆਪਣੇ ਨਿਸ਼ਾਨੇ ਨੂੰ ਸੰਪੂਰਨ ਤਰੀਕੇ ਨਾਲ ਟਾਰਗੇਟ ਕੀਤਾ। ਡੀਆਰਡੀਓ ਨੇ ਕਿਹਾ ਕਿ ਇਸ ਪ੍ਰੀਖਣ ਨੇ ਸਾਰੇ ਨਿਰਧਾਰਤ ਮਾਪਦੰਡਾਂ ਅਤੇ ਉਦੇਸ਼ਾਂ ਨੂੰ ਪੂਰਾ ਕੀਤਾ ਹੈ। ਮਤਲਬ ਕਿ ਮਿਜ਼ਾਈਲ ਨੇ ਬਿਲਕੁਲ ਉਸੇ ਤਰ੍ਹਾਂ ਪ੍ਰਦਰਸ਼ਨ ਕੀਤਾ ਜਿਵੇਂ ਇਸ ਤੋਂ ਉਮੀਦ ਕੀਤੀ ਸੀ।
ਭਾਰਤ ਦੀ ਰੱਖਿਆ ਸ਼ਕਤੀ ਨੂੰ ਹੋਰ ਮਜ਼ਬੂਤ ਕਰਨ ਲਈ ਤਿਆਰ ਕੀਤਾ ਗਿਆ ‘ਪ੍ਰਲਯ’, ਰੱਖਿਆ ਖੋਜ ਅਤੇ ਵਿਕਾਸ ਸੰਗਠਨ ਦੁਆਰਾ ਵਿਕਸਤ ਇੱਕ ਸਵਦੇਸ਼ੀ ਬੈਲਿਸਟਿਕ ਮਿਜ਼ਾਈਲ ਹੈ। ਇਹ ਇੱਕ ਜ਼ਮੀਨ ਤੋਂ ਜ਼ਮੀਨ `ਤੇ ਮਾਰ ਕਰਨ ਵਾਲੀ ਮਿਜ਼ਾਈਲ ਹੈ, ਜੋ ਬਹੁਤ ਤੇਜ਼ ਅਤੇ ਸਹੀ ਢੰਗ ਨਾਲ ਮਾਰ ਕਰਨ ਦੇ ਸਮਰੱਥ ਹੈ।