ਢਾਕਾ, 4 ਜੂਨ (ਪੋਸਟ ਬਿਊਰੋ): ਬੰਗਲਾਦੇਸ਼ ਦੀ ਯੂਨਸ ਸਰਕਾਰ ਨੇ ਸਾਬਕਾ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਦੇ ਪਿਤਾ ਅਤੇ ਬੰਗਲਾਦੇਸ਼ ਦੇ ਪਹਿਲੇ ਰਾਸ਼ਟਰਪਤੀ ਸ਼ੇਖ ਮੁਜੀਬੁਰ ਰਹਿਮਾਨ ਦੇ ‘ਰਾਸ਼ਟਰ ਪਿਤਾ’ ਦਾ ਦਰਜਾ ਖਤਮ ਕਰ ਦਿੱਤਾ ਗਿਆ ਹੈ। ਇਸ ਸੰਬੰਧੀ ਇੱਕ ਆਰਡੀਨੈਂਸ ਜਾਰੀ ਕੀਤਾ ਗਿਆ ਸੀ ਅਤੇ ਕਾਨੂੰਨ ‘ਚੋਂ ‘ਰਾਸ਼ਟਰ ਪਿਤਾ ਬੰਗਬੰਧੂ ਸ਼ੇਖ ਮੁਜੀਬੁਰ ਰਹਿਮਾਨ’ ਸ਼ਬਦ ਹਟਾ ਦਿੱਤੇ ਗਏ ਸਨ।
ਇਸ ਦੇ ਨਾਲ ਹੀ 1971 ਦੇ ਆਜ਼ਾਦੀ ਘੁਲਾਟੀਏ ਅਤੇ ਸੰਘਰਸ਼ ਦੀ ਪਰਿਭਾਸ਼ਾ ਵੀ ਬਦਲ ਦਿੱਤੀ ਗਈ ਹੈ। ਹਾਲ ਹੀ ‘ਚ 1 ਜੂਨ ਨੂੰ, ਮੁਹੰਮਦ ਯੂਨਸ ਦੀ ਸਰਕਾਰ ਨੇ ਨਵੇਂ ਕਰੰਸੀ ਨੋਟਾਂ ‘ਚੋਂ ਸ਼ੇਖ ਮੁਜੀਬੁਰ ਰਹਿਮਾਨ ਦੀ ਤਸਵੀਰ ਵੀ ਹਟਾ ਦਿੱਤੀ ਹੈ। ਨਵੇਂ ਨੋਟਾਂ ‘ਤੇ ਹਿੰਦੂ ਅਤੇ ਬੋਧੀ ਮੰਦਰਾਂ ਦੀਆਂ ਤਸਵੀਰਾਂ ਵੀ ਛਾਪੀਆਂ ਜਾਣਗੀਆਂ। ਹਾਲਾਂਕਿ, ਪੁਰਾਣੇ ਨੋਟ ਅਤੇ ਸਿੱਕੇ ਵੀ ਪ੍ਰਚਲਨ ‘ਚ ਰਹਿਣਗੇ।
ਸਰਕਾਰ ਨੇ ਆਜ਼ਾਦੀ ਘੁਲਾਟੀਏ ਦੀ ਨਵੀਂ ਪਰਿਭਾਸ਼ਾ ਬਦਲੀ ਗਈ ਹੈ। ਜਿਸ ਤਹਿਤ ਉਹ ਨਾਗਰਿਕ ਜਿਨ੍ਹਾਂ ਨੇ 26 ਮਾਰਚ ਤੋਂ 16 ਦਸੰਬਰ, 1971 ਦੇ ਵਿਚਕਾਰ ਯੁੱਧ ਲਈ ਤਿਆਰੀ ਕੀਤੀ, ਭਾਰਤ ‘ਚ ਸਿਖਲਾਈ ਕੈਂਪਾਂ ‘ਚ ਹਿੱਸਾ ਲਿਆ, ਪਾਕਿਸਤਾਨੀ ਫੌਜ ਅਤੇ ਇਸਦੇ ਸਹਿਯੋਗੀਆਂ ਵਿਰੁੱਧ ਹਥਿਆਰ ਚੁੱਕੇ, ਉਨ੍ਹਾਂ ਨੂੰ ਆਜ਼ਾਦੀ ਘੁਲਾਟੀਏ ਮੰਨਿਆ ਜਾਵੇਗਾ।
ਨਵੀਂ ਪਰਿਭਾਸ਼ਾ ਤਹਿਤ, ਹਥਿਆਰਬੰਦ ਸੈਨਾਵਾਂ, ਪੂਰਬੀ ਪਾਕਿਸਤਾਨ ਰਾਈਫਲਜ਼ (ਈਪੀਆਰ), ਪੁਲਿਸ, ਮੁਕਤੀ ਬਹਿਨੀ, ਮੁਜੀਬਨਗਰ ਸਰਕਾਰ ਅਤੇ ਇਸਦੀਆਂ ਮਾਨਤਾ ਪ੍ਰਾਪਤ ਫੌਜਾਂ, ਜਲ ਸੈਨਾ ਕਮਾਂਡੋ, ਕਿਲੋ ਫੋਰਸ ਅਤੇ ਅੰਸਾਰ ਦੇ ਮੈਂਬਰਾਂ ਨੂੰ ਵੀ ਆਜ਼ਾਦੀ ਘੁਲਾਟੀਆਂ ਦੀ ਸ਼੍ਰੇਣੀ ‘ਚ ਸ਼ਾਮਲ ਕੀਤਾ ਗਿਆ ਹੈ।
ਪਹਿਲਾਂ ਇਹ ਕਿਹਾ ਜਾਂਦਾ ਸੀ ਕਿ ਆਜ਼ਾਦੀ ਸੰਘਰਸ਼ ਸ਼ੇਖ ਮੁਜੀਬੁਰ ਰਹਿਮਾਨ ਦੀ ਅਪੀਲ ‘ਤੇ ਸ਼ੁਰੂ ਹੋਇਆ ਸੀ। ਹੁਣ ਨਵੀਂ ਪਰਿਭਾਸ਼ਾ ‘ਚ ਉਨ੍ਹਾਂ ਦਾ ਨਾਮ ਹਟਾ ਦਿੱਤਾ ਗਿਆ ਹੈ। ਹੁਣ ਇਸਨੂੰ 26 ਮਾਰਚ ਤੋਂ 16 ਦਸੰਬਰ 1971 ਤੱਕ ਚੱਲੇ ਹਥਿਆਰਬੰਦ ਸੰਘਰਸ਼ ਵਜੋਂ ਪਰਿਭਾਸ਼ਿਤ ਕੀਤਾ ਗਿਆ ਹੈ।