ਬੰਗਲੌਰ, 5 ਮਾਰਚ (ਪੋਸਟ ਬਿਊਰੋ): ਕੰਨੜ ਅਦਾਕਾਰਾ ਰਾਣਿਆ ਰਾਓ ਨੂੰ 3 ਮਾਰਚ ਦੀ ਦੇਰ ਸ਼ਾਮ ਨੂੰ ਬੈਂਗਲੁਰੂ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤੋਂ ਡਾਇਰੈਕਟੋਰੇਟ ਆਫ਼ ਰੈਵੇਨਿਊ ਇੰਟੈਲੀਜੈਂਸ ਨੇ 14.8 ਕਿਲੋਗ੍ਰਾਮ ਸੋਨੇ ਸਮੇਤ ਗ੍ਰਿਫ਼ਤਾਰ ਕੀਤਾ ਸੀ। ਇਹ ਜਾਣਕਾਰੀ ਬੁੱਧਵਾਰ 5 ਮਾਰਚ ਨੂੰ ਸਾਹਮਣੇ ਆਈ।
ਰਾਣਿਆ ਕਰਨਾਟਕ ਪੁਲਿਸ ਹਾਊਸਿੰਗ ਕਾਰਪੋਰੇਸ਼ਨ ਦੇ ਡਾਇਰੈਕਟਰ ਜਨਰਲ ਆਫ਼ ਪੁਲਿਸ (ਡੀਜੀਪੀ) ਰਾਮਚੰਦਰ ਰਾਓ ਦੀ ਸੌਤੇਲੀ ਬੇਟੀ ਹੈ। ਉਨ੍ਹਾਂ ਨੇ ਕੰਨੜ ਫਿ਼ਲਮਾਂ ਮਾਨਿਕਿਆ ਅਤੇ ਪਾਟਕੀ ਵਿੱਚ ਕੰਮ ਕੀਤਾ ਹੈ। ਅਦਾਲਤ ਨੇ ਉਨ੍ਹਾਂ ਨੂੰ 14 ਦਿਨਾਂ ਦੀ ਨਿਆਂਇਕ ਹਿਰਾਸਤ ਵਿੱਚ ਭੇਜ ਦਿੱਤਾ ਹੈ।
ਰਾਣਿਆ ਨੇ ਆਪਣੇ ਸਰੀਰ, ਪੱਟਾਂ ਅਤੇ ਕਮਰ 'ਤੇ ਟੇਪ ਲਗਾ ਕੇ ਸੋਨਾ ਲੁਕਾਇਆ। ਆਪਣੇ ਕੱਪੜਿਆਂ ਵਿੱਚ ਸੋਨਾ ਲੁਕਾਉਣ ਲਈ, ਉਨ੍ਹਾਂ ਨੇ ਮੌਡੀਫਾਈ ਹੋਈਆਂ ਜੈਕਟਾਂ ਅਤੇ ਗੁੱਟ ਦੀਆਂ ਬੈਲਟਾਂ ਦੀ ਵਰਤੋਂ ਕੀਤੀ।
ਸੂਤਰਾਂ ਦਾ ਦਾਅਵਾ ਹੈ ਕਿ ਰਾਣਿਆ ਨੂੰ ਇੱਕ ਕਿਲੋ ਸੋਨਾ ਲਿਆਉਣ ਲਈ 1 ਲੱਖ ਰੁਪਏ ਮਿਲਦੇ ਹਨ। ਉਨ੍ਹਾਂ ਨੇ ਹਰੇਕ ਯਾਤਰਾ ਵਿੱਚ 12 ਤੋਂ 13 ਲੱਖ ਰੁਪਏ ਕਮਾਏ।
ਡੀਆਰਆਈ ਅਧਿਕਾਰੀਆਂ ਅਨੁਸਾਰ, ਰਾਣਿਆ ਰਾਓ ਦੁਬਈ ਤੋਂ ਅਮੀਰਾਤ ਦੀ ਉਡਾਨ ਰਾਹੀਂ ਭਾਰਤ ਵਾਪਿਸ ਆਈ। ਸੁਰੱਖਿਆ ਏਜੰਸੀਆਂ ਪਹਿਲਾਂ ਹੀ ਉਸ ਦੀਆਂ ਗਤੀਵਿਧੀਆਂ 'ਤੇ ਨਜ਼ਰ ਰੱਖ ਰਹੀਆਂ ਸਨ ਕਿਉਂਕਿ ਉਹ ਪਿਛਲੇ 15 ਦਿਨਾਂ ਵਿੱਚ ਚਾਰ ਵਾਰ ਦੁਬਈ ਗਈ ਸੀ।
ਰਾਣਿਆ ਨੇ ਆਪਣੇ ਕੱਪੜਿਆਂ ਵਿੱਚ ਸੋਨਾ ਲੁਕਾਇਆ ਹੋਇਆ ਸੀ। ਜਿਸਦੀ ਕੀਮਤ 12.56 ਕਰੋੜ ਰੁਪਏ ਹੈ। ਇਸ ਤੋਂ ਇਲਾਵਾ ਪੁਲਿਸ ਨੇ ਉਨ੍ਹਾਂ ਦੇ ਘਰ ਵੀ ਛਾਪਾ ਮਾਰਿਆ। ਉੱਥੋਂ 2 ਕਰੋੜ ਰੁਪਏ ਦਾ ਸੋਨਾ ਅਤੇ 2 ਕਰੋੜ ਰੁਪਏ ਦੀ ਨਕਦੀ ਬਰਾਮਦ ਹੋਈ।
ਡੀਆਰਆਈ ਦੀ ਦਿੱਲੀ ਟੀਮ ਨੂੰ ਸੋਨੇ ਦੀ ਤਸਕਰੀ ਵਿੱਚ ਰਾਣਿਆ ਦੀ ਸ਼ਮੂਲੀਅਤ ਬਾਰੇ ਪਹਿਲਾਂ ਹੀ ਪਤਾ ਸੀ। ਇਸ ਲਈ, 3 ਮਾਰਚ ਨੂੰ, ਅਧਿਕਾਰੀ ਉਨ੍ਹਾਂ ਦੀ ਉਡਾਨ ਦੇ ਉਤਰਨ ਤੋਂ ਦੋ ਘੰਟੇ ਪਹਿਲਾਂ ਹਵਾਈ ਅੱਡੇ 'ਤੇ ਪਹੁੰਚ ਗਈ।