ਟੋਰਾਂਟੋ, 21 ਜੂਨ (ਪੋਸਟ ਬਿਊਰੋ): ਵੀਰਵਾਰ ਦੇਰ ਰਾਤ ਸਕਾਰਬੋਰੋ ਵਿੱਚ ਹਾਈਵੇ 401 `ਤੇ ਸੱਤ ਵਾਹਨਾਂ ਦੀ ਟੱਕਰ ਤੋਂ ਬਾਅਦ ਤਿੰਨ ਲੋਕਾਂ ਨੂੰ ਹਸਪਤਾਲ ਲਿਜਾਇਆ ਗਿਆ, ਜਿਨ੍ਹਾਂ ਵਿਚੋਂ ਇੱਕ ਗੰਭੀਰ ਜ਼ਖ਼ਮੀ ਹੈ।
ਇਹ ਘਟਨਾ ਨੀਲਸਨ ਰੋਡ ਕੋਲ ਹਾਈਵੇ 401 ਦੇ ਪੱਛਮ ਵੱਲ ਐਕਸਪ੍ਰੈੱਸ ਲੇਨ ਵਿੱਚ ਰਾਤ ਕਰੀਬ 10:40 ਵਜੇ ਹੋਈ।
ਟੋਰਾਂਟੋ ਪੈਰਾਮੇਡਿਕ ਸਰਵਿਸੇਜ ਨੇ ਦੱਸਿਆ ਕਿ ਇੱਕ ਬਾਲਗ ਨੂੰ ਗੰਭੀਰ ਰੂਪ ਵਿਚ ਜ਼ਖ਼ਮੀ ਹੋਣ `ਤੇ ਹਸਪਤਾਲ ਲਿਜਾਇਆ ਗਿਆ, ਜਦੋਂਕਿ ਦੋ ਹੋਰ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ।
ਓਪੀਪੀ ਸਾਰਜੇਂਟ ਸਾਮੀ ਨਸਰ ਨੇ ਕਿਹਾ ਕਿ ਅਸੀਂ ਹਾਲੇ ਵੀ ਘਟਨਾ ਦੇ ਕਾਰਨ ਦਾ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਾਂ। ਉਨ੍ਹਾਂ ਨੇ ਕਿਹਾ ਕਿ ਪਹਿਲਾਂ ਟਰੈਕਟਰ ਟ੍ਰੇਲਰ ਦਾ ਚਾਲਕ ਲੰਬੇ ਸਮੇਂ ਤੱਕ ਫਸਿਆ ਰਿਹਾ, ਜਦੋਂ ਤੱਕ ਕਿ ਉਸਨੂੰ ਫਾਇਰ ਕਰਮੀਆਂ ਨੇ ਬਾਹਰ ਨਹੀਂ ਕੱਢਿਆ ਅਤੇ ਹਸਪਤਾਲ ਨਹੀਂ ਲਿਜਾਇਆ ਗਿਆ।
ਘਟਨਾ ਸਥਾਨ ਤੋਂ ਪ੍ਰਾਪਤ ਤਸਵੀਰਾਂ ਵਿੱਚ ਭਿਆਨਕ ਅੱਗ ਤੋਂ ਬਾਅਦ ਸੜੀ ਹੋਇਆ ਫੁਟਪਾਥ ਵਿਖਾਈ ਦੇ ਰਿਹਾ ਹੈ। ਹਾਈਵੇ ਦੇ ਸਾਰੀਆਂ ਐਕਸਪ੍ਰੈੱਸ ਲੇਨਜ਼ ਘੰਟਿਆਂ ਤੱਕ ਬੰਦ ਰਹੀਆਂ, ਪਰ ਸਵੇਰੇ 7 ਵਜੇ ਦੇ ਆਸਪਾਸ ਫਿਰ ਤੋਂ ਖੁੱਲ੍ਹ ਗਈਆਂ।