ਵਾਰਾਣਸੀ, 30 ਨਵੰਬਰ (ਪੋਸਟ ਬਿਊਰੋ): ਉੱਤਰ ਪ੍ਰਦੇਸ਼ ਦੇ ਵਾਰਾਣਸੀ ਵਿਚ ਬੁੱਧਵਾਰ ਸ਼ਾਮ ਨੂੰ ਉਸ ਸਮੇਂ ਹਫੜਾ-ਦਫੜੀ ਮਚ ਗਈ ਜਦੋਂ ਇਕ ਘਰ ਵਿਚੋਂ ਇਕ ਔਰਤ ਦਾ ਪਿੰਜਰ ਬਰਾਮਦ ਹੋਇਆ। ਔਰਤ ਦੀ 8 ਦਸੰਬਰ 2022 ਨੂੰ ਬੀਮਾਰੀ ਕਾਰਨ ਮੌਤ ਹੋ ਗਈ ਸੀ, ਪਰ ਉਸ ਦੀਆਂ ਦੋ ਬੇਟੀਆਂ ਨੇ ਅੰਤਿਮ ਸੰਸਕਾਰ ਨਹੀਂ ਕੀਤਾ। ਪਰਿਵਾਰ ਅਤੇ ਸਮਾਜ ਨਾਲੋਂ ਸਾਰੇ ਰਿਸ਼ਤੇ ਤੋੜ ਕੇ ਦੋ ਭੈਣਾਂ ਨੇ ਘਰ ਵਿੱਚ ਕੈਦ ਹੋ ਕੇ ਆਪਣੀ ਮ੍ਰਿਤਕ ਮਾਂ ਦੀ ਲਾਸ਼ ਦਾ ਪਿੰਜਰ ਇੱਕ ਸਾਲ ਤੱਕ ਘਰ ਵਿੱਚ ਛੁਪਾ ਕੇ ਰੱਖਿਆ। 27 ਸਾਲਾ ਪੱਲਵੀ ਅਤੇ 19 ਸਾਲਾ ਵੈਸ਼ਨਵੀ ਆਪਣੀ ਮਾਂ ਨਾਲ ਰਹਿ ਰਹੀਆਂ ਸਨ, ਜਿਨ੍ਹਾਂ ਦੀ ਇਕ ਸਾਲ ਪਹਿਲਾਂ ਮੌਤ ਹੋ ਗਈ ਸੀ। ਪੱਲਵੀ ਅਤੇ ਵੈਸ਼ਨਵੀ ਦੀ ਮਾਂ ਊਸ਼ਾ ਤਿਵਾਰੀ ਦੀ 8 ਦਸੰਬਰ, 2022 ਨੂੰ ਮੌਤ ਹੋ ਗਈ ਸੀ, ਪਰ ਭੈਣਾਂ ਨੇ ਆਪਣੇ ਗੁਆਂਢੀਆਂ ਅਤੇ ਰਿਸ਼ਤੇਦਾਰਾਂ ਨੂੰ ਦੱਸਿਆ ਸੀ ਕਿ ਉਨ੍ਹਾਂ ਨੇ ਉਸ ਦਾ ਅੰਤਿਮ ਸੰਸਕਾਰ ਕਰ ਦਿੱਤਾ ਹੈ।
ਮਾਮਲੇ ਦੀ ਸੂਚਨਾ ਮਿਲਦੇ ਹੀ ਥਾਣਾ ਲੰਕਾ ਦੀ ਪੁਲਿਸ ਬੁੱਧਵਾਰ ਨੂੰ ਮੌਕੇ 'ਤੇ ਪਹੁੰਚੀ ਅਤੇ ਘਰ ਦੇ ਤਿੰਨ ਦਰਵਾਜਿ਼ਆਂ ਦੇ ਤਾਲੇ ਤੋੜ ਕੇ ਅੰਦਰ ਵੜ ਗਈ। ਪਿੰਜਰ ਬਾਹਰ ਕੱਢਿਆ ਗਿਆ ਅਤੇ ਦੋਨਾਂ ਧੀਆਂ ਨੂੰ ਵੀ ਘਰੋਂ ਬਾਹਰ ਲਿਆਂਦਾ ਗਿਆ। ਔਰਤ ਦੇ ਕੱਪੜੇ, ਚੱਪਲਾਂ, ਚਾਦਰ, ਰਜਾਈ ਆਦਿ ਸਬੂਤ ਵਜੋਂ ਜ਼ਬਤ ਕਰ ਲਏ ਗਏ ਹਨ।
ਇਹ ਘਟਨਾ ਵਾਰਾਣਸੀ ਦੇ ਲੰਕਾ ਥਾਣਾ ਖੇਤਰ ਦੇ ਮਦਰਵਨ ਦੀ ਹੈ। ਲੰਕਾ ਪੁਲਸ ਸਟੇਸ਼ਨ ਇੰਚਾਰਜ ਸਿ਼ਵਕਾਂਤ ਮਿਸ਼ਰਾ ਨੇ ਫੋਨ 'ਤੇ ਦੱਸਿਆ ਕਿ ਮਦਰਵਾ, ਸਾਮਘਾਟ ਦੀ ਰਹਿਣ ਵਾਲੀ 52 ਸਾਲਾ ਊਸ਼ਾ ਤਿਵਾਰੀ ਦੀ ਲੰਬੀ ਬੀਮਾਰੀ ਤੋਂ ਬਾਅਦ ਪਿਛਲੇ ਸਾਲ ਮੌਤ ਹੋ ਗਈ ਸੀ। ਉਸ ਦਾ ਪਤੀ 2 ਸਾਲ ਪਹਿਲਾਂ ਘਰ ਛੱਡ ਕੇ ਚਲਾ ਗਿਆ ਸੀ ਅਤੇ ਪਤਨੀ ਦੀ ਮੌਤ ਤੋਂ ਬਾਅਦ ਵੀ ਘਰ ਨਹੀਂ ਆਇਆ, ਜਦਕਿ ਉਸ ਦੀਆਂ ਦੋ ਬੇਟੀਆਂ ਪੱਲਵੀ ਅਤੇ ਵੈਸ਼ਨਵੀ ਨੇ ਆਪਣੀ ਮਾਂ ਦੀ ਮੌਤ ਤੋਂ ਬਾਅਦ ਲਾਸ਼ ਦਾ ਸਸਕਾਰ ਨਹੀਂ ਕੀਤਾ ਅਤੇ ਆਪਣੇ ਕਮਰੇ ਵਿਚ ਬੰਦ ਰੱਖਿਆ।