ਓਟਵਾ, 6 ਸਤੰਬਰ (ਪੋਸਟ ਬਿਊਰੋ) :ਹਾਊਸਿੰਗ ਅਫੋਰਡੇਬਿਲਿਟੀ ਉੱਤੇ ਪੂਰੀਆਂ ਗਰਮੀਆਂ ਵਿੱਚ ਆਪਣਾ ਧਿਆਨ ਕੇਂਦਰਿਤ ਕਰਨ ਦੇ ਬਾਵਜੂਦ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀ ਅਗਵਾਈ ਵਾਲੀ ਲਿਬਰਲ ਪਾਰਟੀ ਹਾਊਸਿੰਗ ਦੇ ਮਾਮਲੇ ਵਿੱਚ ਭਰੋਸੇਯੋਗਤਾ ਵਿੱਚ ਕੰਜ਼ਰਵੇਟਿਵਾਂ ਤੇ ਨਿਊ ਡੈਮੋਕ੍ਰੈਟਸ ਤੋਂ ਪਿੱਛੇ ਹੈ।
ਨੈਨੋਜ਼ ਵੱਲੋਂ ਕਰਵਾਏ ਗਏ ਸਰਵੇਖਣ ਅਨੁਸਾਰ ਜਦੋਂ ਹਾਊਸਿੰਗ ਦੀਆਂ ਕੀਮਤਾਂ ਵਿੱਚ ਵਾਧੇ ਨੂੰ ਰੋਕਣ ਦੀ ਗੱਲ ਆਉਂਦੀ ਹੈ ਤਾਂ ਲਿਬਰਲਾਂ ਨਾਲੋਂ ਪਿਏਰ ਪੌਲੀਏਵਰ ਦੇ ਕੰਜ਼ਰਵੇਟਿਵ ਤੇ ਜਗਮੀਤ ਸਿੰਘ ਦੀ ਐਨਡੀਪੀ ਵਧੇਰੇ ਭਰੋਸੇ ਲਾਇਕ ਫੈਡਰਲ ਪਾਰਟੀਆਂ ਹਨ। ਇਹ ਸਵਾਲ ਪੁੱਛੇ ਜਾਣ ਉੱਤੇ ਕਿ ਹਾਊਸਿੰਗ ਅਫੋਰਡੇਬਿਲਿਟੀ ਦੇ ਮਾਮਲੇ ਵਿੱਚ ਕਿਸ ਪਾਰਟੀ ਉੱਤੇ ਸੱਭ ਤੋਂ ਵੱਧ ਯਕੀਨ ਕੀਤਾ ਜਾ ਸਕਦਾ ਹੈ ਤਾਂ ਸਰਵੇਖਣ ਵਿੱਚ ਹਿੱਸਾ ਲੈਣ ਵਾਲੇ 25 ਫੀ ਸਦੀ ਲੋਕਾਂ ਨੇ ਕੰਜ਼ਰਵੇਟਿਵਾਂ ਦਾ ਨਾਂ ਲਿਆ, 22 ਫੀ ਸਦੀ ਨੇ ਐਨਡੀਪੀ ਨੂੰ ਵਧੀਆ ਦੱਸਿਆ, 22 ਫੀ ਸਦੀ ਨੇ ਆਖਿਆ ਕਿ ਕਿਸੇ ਵੀ ਪਾਰਟੀ ਉੱਤੇ ਭਰੋਸਾ ਨਹੀਂ ਕੀਤਾ ਜਾ ਸਕਦਾ ਜਦਕਿ 15 ਫੀ ਸਦੀ ਨੇ ਲਿਬਰਲਾਂ ਦਾ ਨਾਂ ਲਿਆ।
ਇੱਕ ਇੰਟਰਵਿਊ ਵਿੱਚ ਨਿੱਕ ਨੈਨੋਜ਼ ਨੇ ਆਖਿਆ ਕਿ ਇਹ ਅੰਕੜੇ ਲਿਬਰਲਾਂ ਲਈ ਕੋਈ ਬਹੁਤੀ ਵਧੀਆ ਖਬਰ ਨਹੀਂ ਹਨ। ਹੋਰਨਾਂ ਸੱਤ ਫੀ ਸਦੀ ਨੇ ਆਖਿਆ ਕਿ ਉਨ੍ਹਾਂ ਨੂੰ ਨਹੀਂ ਪਤਾ ਕਿ ਕਿਸ ਪਾਰਟੀ ਉੱਤੇ ਇਸ ਮਾਮਲੇ ਵਿੱਚ ਭਰੋਸਾ ਕੀਤਾ ਜਾ ਸਕਦਾ ਹੈ, ਚਾਰ ਫੀ ਸਦੀ ਨੇ ਆਖਿਆ ਕਿ ਬਲਾਕ ਕਿਊਬਿਕੁਆ, ਤਿੰਨ ਫੀ ਸਦੀ ਨੇ ਆਖਿਆ ਗ੍ਰੀਨ ਪਾਰਟੀ ਤੇ ਦੋ ਫੀ ਸਦੀ ਨੇ ਪੀਪਲਜ਼ ਪਾਰਟੀ ਆਫ ਕੈਨੇਡਾ ਦਾ ਨਾਂ ਲਿਆ।
ਇਸ ਸਰੇਵਖਣ ਤੋਂ ਬਾਅਦ ਹਾਊਸਿੰਗ ਮਨਿਸਟਰ ਸ਼ੌਨ ਫਰੇਜ਼ਰ ਨੇ ਆਖਿਆ ਕਿ ਉਹ ਬਿਲਕੁਲ ਸਮਝ ਚੁੱਕੇ ਹਨ ਕਿ ਕੈਨੇਡੀਅਨਜ਼ ਚਾਹੁੰਦੇ ਹਨ ਕਿ ਫੈਡਰਲ ਸਰਕਾਰ ਇਸ ਮਾਮਲੇ ਵਿੱਚ ਕਮਰ ਕੱਸੇ ਤੇ ਲੀਡਰਸਿ਼ਪ ਭੂਮਿਕਾ ਨਿਭਾਵੇ। ਕੈਨੇਡੀਅਨਜ਼ ਸਾਨੂੰ ਇਸ ਮਾਮਲੇ ਵਿੱਚ ਕਾਰਵਾਈ ਕਰਦਿਆਂ ਵੇਖਣਾ ਚਾਹੁੰਦੇ ਹਨ। ਉਨ੍ਹਾਂ ਆਖਿਆ ਕਿ ਆਉਣ ਵਾਲੇ ਮਹੀਨਿਆਂ ਵਿੱਚ ਉਹ ਅਜਿਹੇ ਮਾਪਦੰਡ ਲੈ ਕੇ ਆਉਣਗੇ ਜਿਸ ਨਾਲ ਕੈਨੇਡਾ ਵਿੱਚ ਹਾਊਸਿੰਗ ਅਫੋਰਡੇਬਿਲਿਟੀ ਦਾ ਸੰਕਟ ਦੂਰ ਹੋ ਜਾਵੇਗਾ।