ਓਟਵਾ, 16 ਮਈ (ਪੋਸਟ ਬਿਊਰੋ) : ਵੈਸਟਜੈੱਟ ਦੇ ਪਾਇਲਟਸ ਦੀ ਨੁਮਾਇੰਦਗੀ ਕਰ ਰਹੀ ਯੂਨੀਅਨ ਨੇ ਅਲਟੀਮੇਟਮ ਦਿੱਤਾ ਹੈ ਕਿ ਜੇ ਡੈੱਡਲਾਈਨ ਤੱਕ ਕਿਸੇ ਨਵੇਂ ਸਮਝੌਤੇ ਉੱਤੇ ਨਾ ਪਹੁੰਚਿਆ ਗਿਆ ਤਾਂ ਸ਼ੁੱਕਰਵਾਰ ਸਵੇਰ ਨੂੰ ਉਸ ਦੇ 1600 ਮੈਂਬਰ ਹੜਤਾਲ ਉੱਤੇ ਚਲੇ ਜਾਣਗੇ।
ਮਈ ਦੇ ਲਾਂਗਵੀਕੈਂਡ ਤੋਂ ਪਹਿਲਾਂ ਯੂਨੀਅਨ ਨੇ ਆਖਿਆ ਕਿ ਹੜਤਾਲ ਤੋਂ ਬਾਅਦ ਸਾਰੇ ਜਹਾਜ਼ਾਂ ਦੀ ਉਡਾਨ ਬੰਦ ਕਰ ਦਿੱਤੀ ਜਾਵੇਗੀ ਤੇ ਸਾਰਾ ਕੰਮਕਾਜ ਠੱਪ ਕਰ ਦਿੱਤਾ ਜਾਵੇਗਾ। ਵੈਸਟਜੈੱਟ ਏਅਰ ਲਾਈਨ ਪਾਇਲਟਸ ਐਸੋਸਿਏਸ਼ਨ (ਏਐਲਪੀਏ) ਦਾ ਕਹਿਣਾ ਹੈ ਕਿ ਕੰਪਨੀ ਨਾਲ ਡੀਲ ਸਿਰੇ ਚੜ੍ਹਾਉਣ ਲਈ ਉਨ੍ਹਾਂ ਦੀ ਕਮੇਟੀ 24¿7 ਉਪਲਬਧ ਹੈ। ਅਪਰੈਲ ਵਿੱਚ ਏਐਲਪੀਏ ਨੇ ਆਖਿਆ ਸੀ ਕਿ ਉਸ ਦੇ 93 ਫੀ ਸਦੀ ਮੈਂਬਰ ਹੜਤਾਲ ਦੇ ਪੱਖ ਵਿੱਚ ਹਨ। ਯੂਨੀਅਨ ਦਾ ਇਹ ਵੀ ਕਹਿਣਾ ਹੈ ਕਿ ਉਨ੍ਹਾਂ ਵੱਲੋਂ ਬਿਹਤਰ ਤਨਖਾਹਾਂ, ਸ਼ਡਿਊਲ ਤੇ ਨੌਕਰੀ ਦੀ ਸੁਰੱਖਿਆ ਦੀ ਮੰਗ ਕੀਤੀ ਜਾ ਰਹੀ ਹੈ।
ਪਿਛਲੇ ਹਫਤੇ ਯੂਨੀਅਨ ਨੇ ਟਵਿੱਟਰ ਉੱਤੇ ਬਾਰਗੇਨਿੰਗ ਸਬੰਧੀ ਵੇਰਵੇ ਪਾਉਣੇ ਸ਼ੁਰੂ ਕਰ ਦਿੱਤੇ ਸਨ ਪਰ ਸੋਮਵਾਰ ਨੂੰ ਹੜਤਾਲ ਦਾ ਅਲਟੀਮੇਟਮ ਦੇ ਦਿੱਤਾ ਗਿਆ। ਪਿਛਲੇ ਹਫਤੇ ਜਾਰੀ ਰਲੀਜ਼ ਵਿੱਚ ਵੈਸਟਜੈੱਟ ਏਐਲਪੀਏ ਦੇ ਚੇਅਰ ਬਰਨਾਰਡ ਲੀਵਾਲ ਨੇ ਆਖਿਆ ਕਿ ਪਿਛਲੇ ਡੇਢ ਸਾਲ ਵਿੱਚ ਕੁੱਝ 340 ਪਾਇਲਟਾਂ ਵੱਲੋਂ ਕੰਪਨੀ ਛੱਡ ਕੇ ਜਾ ਚੁੱਕੇ ਹਨ ਤੇ ਬਹੁਤੇ ਹੋਰਨਾਂ ਏਅਰਲਾਈਨਜ਼ ਨਾਲ ਕੰਮ ਕਰ ਰਹੇ ਹਨ।
ਪਰ ਏਅਰਲਾਈਨ ਦਾ ਕਹਿਣਾ ਹੈ ਕਿ ਉਹ ਆਪਣੇ ਪਾਇਲਟਾਂ ਨੂੰ ਕੈਨੇਡਾ ਵਿੱਚ ਸੱਭ ਤੋਂ ਬਿਹਤਰ ਤਨਖਾਹ ਦੇ ਰਹੀ ਹੈ। ਏਐਲਪੀਏ ਦੇ ਹੜਤਾਲ ਦੇ ਨੋਟਿਸ ਦੇ ਬਦਲੇ ਵਿੱਚ ਵੈਸਟਜੈੱਟ ਨੇ ਆਖਿਆ ਕਿ ਉਹ ਗੱਲਬਾਤ ਨੂੰ ਜਾਰੀ ਰੱਖਣ ਦੀ ਪੂਰੀ ਕੋਸਿ਼ਸ਼ ਕਰੇਗੀ ਤੇ ਇਸ ਮਸਲੇ ਦਾ ਕੋਈ ਹੱਲ ਜਲਦ ਹੀ ਕੱਢੇਗੀ।