ਕਾਸ਼ੀਚਕ, 28 ਮਾਰਚ (ਪੋਸਟ ਬਿਊਰੋ): ਨਵਾਦਾ ਵਿੱਚ ਦਿਨ ਦਿਹਾੜੇ ਬਿਹਾਰ ਪੁਲਿਸ ਨੇ ਬੇਰਹਿਮੀ ਨਾਲ ਫੌਜ ਦੇ ਜਵਾਨ ਨੂੰ ਸੜਕ ਵਿਚਕਾਰ ਡੰਡਿਆਂ ਨਾਲ ਕੁੱਟਿਆ। ਜਿ਼ਲ੍ਹੇ ਦੇ ਕਾਸ਼ੀਚੱਕ ਬਲਾਕ ਦੇ ਅਧੀਨ ਸ਼ਾਹਪੁਰ ਓਪੀ ਖੇਤਰ ਦੇ ਸ਼ਾਹਪੁਰ ਚੌਕ 'ਤੇ ਸੋਮਵਾਰ ਨੂੰ ਵਾਹਨਾਂ ਦੀ ਚੈਕਿੰਗ ਦੌਰਾਨ ਪੁਲਿਸ ਮੁਲਾਜ਼ਮਾਂ ਨੇ ਫੌਜ ਦੇ ਜਵਾਨ ਦੀ ਬੇਰਹਿਮੀ ਨਾਲ ਕੁੱਟਮਾਰ ਕੀਤੀ। ਮੌਕੇ 'ਤੇ ਲੋਕਾਂ ਦੀ ਵੱਡੀ ਭੀੜ ਇਕੱਠੀ ਹੋ ਗਈ। ਲੋਕ ਬਚਾਅ ਲਈ ਆਏ, ਪਰ ਪੁਲਿਸ ਮੁਲਾਜ਼ਮ ਰੁਕਣ ਦਾ ਨਾਂ ਨਹੀਂ ਲੈ ਰਹੇ ਸਨ। ਪੁਲਸ ਨੇ ਜਵਾਨ 'ਤੇ ਲਾਠੀਚਾਰਜ ਕੀਤਾ, ਜਿਸ ਵਿੱਚ ਉਹ ਗੰਭੀਰ ਜ਼ਖਮੀ ਹੋ ਗਿਆ।
ਮਾਮਲੇ ਸਬੰਧੀ ਦੱਸਿਆ ਜਾ ਰਿਹਾ ਹੈ ਕਿ ਫੌਜੀ ਜਵਾਨ ਸ਼ੇਖਪੁਰਾ ਜਿ਼ਲ੍ਹੇ ਦੇ ਪਿੰਡ ਮੀਆਂਬੀਘਾ ਦਾ ਰਹਿਣ ਵਾਲਾ ਨੰਦਨ ਕੁਮਾਰ ਹੈ। ਉਹ ਰਾਜਗੀਰ ਸਥਿਤ ਕੰਟੀਨ ਤੋਂ ਘਰ ਲਈ ਕੁਝ ਸਮਾਨ ਲਿਆ ਰਿਹਾ ਸੀ। ਇਸੇ ਦੌਰਾਨ ਸ਼ਾਹਪੁਰ ਚੌਕ ’ਤੇ ਵਾਹਨਾਂ ਦੀ ਚੈਕਿੰਗ ਕਰ ਰਹੇ ਸਥਾਨਕ ਪੁਲਿਸ ਮੁਲਾਜ਼ਮਾਂ ਨੇ ਉਨ੍ਹਾਂ ਨੂੰ ਰੋਕ ਲਿਆ। ਮੋਟਰਸਾਈਕਲ ਦਾ ਬੈਗ ਅਤੇ ਟਰੰਕ ਖੋਲ੍ਹਣ ਲਈ ਕਿਹਾ। ਫੌਜ ਦੇ ਜਵਾਨ ਨੰਦਨ ਕੁਮਾਰ ਨੇ ਬੈਗ ਅਤੇ ਟਰੰਕ ਨੂੰ ਜਾਂਚ ਲਈ ਖੋਲ੍ਹਿਆ, ਪਰ ਪੁਲਸ ਨੇ ਇਕ-ਇਕ ਚੀਜ਼ ਨੂੰ ਬਾਹਰ ਕੱਢ ਕੇ ਦਿਖਾਉਣ ਲਈ ਕਿਹਾ।
ਇਸ 'ਤੇ ਫੌਜ ਦੇ ਜਵਾਨ ਨੇ ਪੁਲਸ ਨੂੰ ਖੁਦ ਸਾਮਾਨ ਬਾਹਰ ਕੱਢ ਕੇ ਜਾਂਚ ਕਰਨ ਲਈ ਕਿਹਾ। ਇਸ ਦੌਰਾਨ ਪੁਲਿਸ ਮੁਲਾਜ਼ਮਾਂ ਨੇ ਫ਼ੌਜੀ ਜਵਾਨ ’ਤੇ ਲਾਠੀਆਂ ਨਾਲ ਹਮਲਾ ਕਰਨਾ ਸ਼ੁਰੂ ਕਰ ਦਿੱਤਾ, ਜਿਸ ਵਿੱਚ ਨੰਦਨ ਗੰਭੀਰ ਜ਼ਖ਼ਮੀ ਹੋ ਗਿਆ। ਪੁਲਿਸ ਦੀ ਬੇਰਹਿਮੀ ਨੂੰ ਦੇਖ ਕੇ ਮੌਕੇ 'ਤੇ ਲੋਕਾਂ ਦੀ ਭੀੜ ਇਕੱਠੀ ਹੋ ਗਈ। ਸੜਕ ’ਤੇ ਵਾਹਨਾਂ ਦੀ ਲੰਬੀ ਕਤਾਰ ਲੱਗ ਗਈ। ਇਸ ਸਭ ਤੋਂ ਬੇਖ਼ਬਰ ਪੁਲਿਸ ਮੁਲਾਜ਼ਮ ਲਾਠੀਚਾਰਜ ਕਰਦੇ ਰਹੇ। ਸਥਾਨਕ ਲੋਕ ਬਚਾਅ ਲਈ ਆਏ, ਪਰ ਕੋਈ ਫਾਇਦਾ ਨਹੀਂ ਹੋਇਆ।
ਸਥਾਨਕ ਲੋਕਾਂ ਨੇ ਕਿਸੇ ਤਰ੍ਹਾਂ ਫੌਜੀ ਜਵਾਨ ਨੂੰ ਪੁਲਿਸ ਵਾਲਿਆਂ ਤੋਂ ਛੁਡਵਾਇਆ ਅਤੇ ਉਸ ਨੂੰ ਇਕ ਪ੍ਰਾਈਵੇਟ ਕਲੀਨਿਕ ਵਿਚ ਦਾਖਲ ਕਰਵਾਇਆ। ਇਸ ਤੋਂ ਬਾਅਦ ਰਿਸ਼ਤੇਦਾਰਾਂ ਨੇ ਮੌਕੇ 'ਤੇ ਪਹੁੰਚ ਕੇ ਜ਼ਖਮੀ ਜਵਾਨ ਨੂੰ ਨਜ਼ਦੀਕੀ ਪੀ.ਐੱਚ.ਸੀ ਸ਼ੇਖੋਪੁਰਸਰਾਏ ਵਿਖੇ ਦਾਖਲ ਕਰਵਾਇਆ। ਇੱਥੇ ਮੌਜੂਦ ਡਾਕਟਰਾਂ ਨੇ ਜ਼ਖਮੀ ਜਵਾਨ ਨੂੰ ਬਿਹਤਰ ਇਲਾਜ ਲਈ ਵਿਮਸ ਹਸਪਤਾਲ ਪਾਵਾਪੁਰੀ ਲਈ ਰੈਫਰ ਕਰ ਦਿੱਤਾ। ਲੋਕਾਂ ਦਾ ਕਹਿਣਾ ਹੈ ਕਿ ਸਥਾਨਕ ਲੋਕ ਵੀ ਪੁਲਿਸ ਦੀ ਬੇਰਹਿਮੀ ਅਤੇ ਨਾਜਾਇਜ਼ ਵਸੂਲੀ ਤੋਂ ਪ੍ਰੇਸ਼ਾਨ ਹਨ। ਅਜਿਹੀਆਂ ਘਟਨਾਵਾਂ ਨਿੱਤ ਵਾਪਰਦੀਆਂ ਰਹਿੰਦੀਆਂ ਹਨ। ਇਸ ਸਬੰਧੀ ਓਪੀ ਪ੍ਰਧਾਨ ਵੰਦਨਾ ਕੁਮਾਰੀ ਨੇ ਦੱਸਿਆ ਕਿ ਮਾਮਲਾ ਉਨ੍ਹਾਂ ਦੇ ਧਿਆਨ ਵਿੱਚ ਹੈ, ਜਾਂਚ ਕੀਤੀ ਜਾ ਰਹੀ ਹੈ।