ਮੰਗਲੁਰੂ, 21 ਨਵੰਬਰ (ਪੋਸਟ ਬਿਊਰੋ)- ਮੰਗਲੁਰੂ ਧਮਾਕੇ ਦਾ ਮੁੱਖ ਮੁਲਜ਼ਮ ਆਈਐਸਆਈਐਸ ਹੈਂਡਲਰ ਦੇ ਸੰਪਰਕ ਵਿੱਚ ਸੀ। ਇਸ ਦਾ ਖੁਲਾਸਾ ਕਰਦਿਆਂ ਏਡੀਜੀਪੀ ਲਾਅ ਐਂਡ ਆਰਡਰ (ਏਡੀਜੀਪੀ ਐਲ ਐਂਡ ਓ) ਆਲੋਕ ਕੁਮਾਰ ਨੇ ਅੱਜ ਦੱਸਿਆ ਕਿ ਸ਼ਰੀਕ ਮੰਗਲੁਰੂ ਵਿੱਚ ਹੋਏ ਆਟੋ ਬਲਾਸਟ ਮਾਮਲੇ ਵਿੱਚ ਮੁੱਖ ਮੁਲਜ਼ਮ ਹੈ। ਇਸ ਧਮਾਕੇ 'ਚ ਸ਼ਰੀਕ ਖੁਦ 45 ਫੀਸਦੀ ਝੁਲਸ ਗਿਆ ਹੈ। ਆਲੋਕ ਕੁਮਾਰ ਨੇ ਪ੍ਰੈੱਸ ਕਾਨਫਰੰਸ ਦੌਰਾਨ ਦੱਸਿਆ ਕਿ ਸ਼ਿਵਮੋਗਾ ਦੇ ਤੀਰਥਹੱਲੀ ਦੇ ਰਹਿਣ ਵਾਲੇ ਸ਼ਰੀਕ ਦੀ ਪਛਾਣ ਲਈ ਪਰਿਵਾਰਕ ਮੈਂਬਰਾਂ ਵੱਲੋਂ ਮੰਗਲੁਰੂ ਹਸਪਤਾਲ ਲਿਆਂਦਾ ਗਿਆ। ਸ਼ਰੀਕ ਦੇ ਮੈਸੂਰ ਦੇ ਘਰ ਤੋਂ ਬੰਬ ਬਣਾਉਣ ਵਾਲੀ ਸਮੱਗਰੀ ਮਿਲੀ ਹੈ। ਫਰਜ਼ੀ ਆਧਾਰ ਕਾਰਡ ਦੇ ਜ਼ਰੀਏ ਉਹ ਮੈਸੂਰ 'ਚ ਕਿਰਾਏ ਦੇ ਮਕਾਨ 'ਚ ਰਹਿ ਰਿਹਾ ਸੀ।
ਉਨ੍ਹਾਂ ਕਿਹਾ ਕਿ ਸ਼ਰੀਕ ਆਈਐਸਆਈਐਸ ਦੀ ਵਿਚਾਰਧਾਰਾ ਤੋਂ ਪ੍ਰਭਾਵਿਤ ਸੀ। ਡਾਰਕ ਵੈੱਬ ਰਾਹੀਂ ਆਈਐਸਆਈਐਸ ਹੈਂਡਲਰਾਂ ਦੇ ਸੰਪਰਕ ਵਿੱਚ ਸੀ। 19 ਸਤੰਬਰ ਨੂੰ, ਸ਼ਰੀਕ ਨੇ ਦੋ ਹੋਰ ਸਾਥੀਆਂ ਨਾਲ ਮਿਲ ਕੇ ਸ਼ਿਵਮੋਗਾ ਵਿੱਚ ਤੁੰਗਾ ਭਾਦਰਾ ਨਦੀ ਦੇ ਕਿਨਾਰੇ ਇੱਕ ਜੰਗਲ ਵਿੱਚ ਇੱਕ ਟਰਾਇਲ ਧਮਾਕਾ ਵੀ ਕੀਤਾ ਸੀ। 20 ਸਤੰਬਰ ਨੂੰ ਪੁਲਿਸ ਨੇ ਮੇਜਰ ਮੁਨੀਰ ਅਤੇ ਸਈਅਦ ਯਾਸੀਨ ਨੂੰ ਗ੍ਰਿਫਤਾਰ ਕੀਤਾ ਸੀ। ਪਰ ਸ਼ਰੀਕ ਪੁਲਿਸ ਨੂੰ ਚਕਮਾ ਦੇ ਕੇ ਭੱਜਣ ਵਿੱਚ ਕਾਮਯਾਬ ਹੋ ਗਿਆ। ਇਸ ਤੋਂ ਬਾਅਦ ਉਹ ਚੋਰੀ ਕੀਤੇ ਆਧਾਰ ਕਾਰਡ ਨਾਲ ਕਿਰਾਏ 'ਤੇ ਮਕਾਨ ਲੈ ਕੇ ਮੈਸੂਰ 'ਚ ਬੰਬ ਬਣਾਉਣ ਦਾ ਅਭਿਆਸ ਕਰ ਰਿਹਾ ਸੀ।
19 ਨਵੰਬਰ ਦੀ ਸ਼ਾਮ ਨੂੰ ਉਹ ਅਜਿਹੇ ਹੀ ਇੱਕ ਕੂਕਰ ਬੰਬ ਨਾਲ ਇੱਕ ਆਟੋ ਰਿਕਸ਼ਾ ਵਿੱਚ ਸਵਾਰ ਹੋ ਕੇ ਪੰਪਵੈੱਲ ਇਲਾਕੇ ਵਿੱਚ ਜਾਣਾ ਚਾਹੁੰਦਾ ਸੀ। ਪਰ ਜਦੋਂ ਆਟੋ ਕੰਕਨਦੀ ਇਲਾਕੇ ਵਿੱਚੋਂ ਲੰਘ ਰਿਹਾ ਸੀ ਤਾਂ ਕੁੱਕਰ ਬੰਬ ਧਮਾਕਾ ਹੋ ਗਿਆ। ਜਿਸ ਵਿੱਚ ਮੁੱਖ ਮੁਲਜ਼ਮ ਸ਼ਰੀਕ ਅਤੇ ਆਟੋ ਰਿਕਸ਼ਾ ਚਾਲਕ ਪੁਰਸ਼ੋਤਮ ਜ਼ਖ਼ਮੀ ਹੋ ਗਏ।
ਸਾਲ 2020 'ਚ ਸ਼ਰੀਕ ਖਿਲਾਫ ਮੰਗਲੁਰੂ 'ਚ ਕੰਧਾਂ 'ਤੇ ਗ੍ਰੈਫਿਟੀ ਰਾਹੀਂ ਦੇਸ਼ ਵਿਰੋਧੀ ਨਾਅਰੇ ਲਿਖਣ ਦਾ ਮਾਮਲਾ ਵੀ ਦਰਜ ਕੀਤਾ ਗਿਆ ਸੀ। ਇਸ ਮਾਮਲੇ ਵਿੱਚ ਉਸ ਨੂੰ ਗ੍ਰਿਫ਼ਤਾਰ ਵੀ ਕੀਤਾ ਗਿਆ ਸੀ। ਕੁਝ ਦਿਨ ਜੇਲ੍ਹ ਵਿਚ ਰਹਿਣ ਤੋਂ ਬਾਅਦ ਉਸ ਨੂੰ ਜ਼ਮਾਨਤ ਮਿਲ ਗਈ।