ਉਨਾਓ, 16 ਸਤੰਬਰ (ਪੋਸਟ ਬਿਊਰੋ): ਉਤਰ ਪ੍ਰਦੇਸ਼ ਵਿੱਚ ਭਾਰੀ ਮੀਂਹ ਕਾਰਨ ਕੰਧਾਂ ਡਿੱਗਣ ਦੀਆਂ ਵੱਖ ਵੱਖ ਘਟਨਾਵਾਂ ਦੌਰਾਨ 22 ਜਣਿਆਂ ਦੀ ਮੌਤ ਹੋ ਗਈ। ਲਖਨਊ ਦੇ ਦਿਲਕੁਸ਼ਾ ਇਲਾਕੇ ਵਿੱਚ ਭਾਰੀ ਮੀਂਹ ਕਾਰਨ ‘ਆਰਮੀ ਇਨਕਲੇਵ’ ਦੀ ਚਾਰਦੀਵਾਰੀ ਡਿੱਗਣ ਨਾਲ ਘੱਟੋ-ਘੱਟ 9 ਵਿਅਕਤੀਆਂ ਦੀ ਮੌਤ ਹੋ ਗਈ। ਪੁਲੀਸ ਦੇ ਸੰਯੁਕਤ ਕਮਿਸ਼ਨਰ (ਕਾਨੂੰਨ ਅਤੇ ਵਿਵਸਥਾ) ਪੀਯੂਸ਼ ਮੋਰਡੀਆ ਨੇ ਕਿਹਾ ਕਿ ਦਿਲਕੁਸ਼ਾ ਖੇਤਰ ਵਿੱਚ ਆਰਮੀ ਐਨਕਲੇਵ ਕੋਲ ਕੁਝ ਮਜ਼ਦੂਰ ਝੌਪੜੀਆਂ ਵਿੱਚ ਰਹਿ ਰਹੇ ਸਨ। ਉਨ੍ਹਾਂ ਦੱਸਿਆ ਕਿ ਰਾਤ ਭਰ ਭਾਰੀ ਮੀਂਹ ਕਾਰਨ ਆਰਮੀ ਐਨਕਲੇਵ ਦੀ ਚਾਰਦੀਵਾਰੀ ਢਹਿ ਗਈ। ਮਲਬੇ ਵਿੱਚੋਂ ਨੌਂ ਲਾਸ਼ਾਂ ਕੱਢੀਆਂ ਗਈਆਂ। ਇੱਕ ਵਿਅਕਤੀ ਨੂੰ ਬਚਾਇਆ ਗਿਆ ਹੈ ਤੇ ਉਹ ਇਸ ਵੇਲੇ ਇਲਾਜ ਲਈ ਹਸਪਤਾਲ ਵਿੱਚ ਹੈ। ਇਸ ਤੋਂ ਇਲਾਵਾ 13 ਹੋਰ ਮੌਤਾਂ ਹੋਈਆਂ ਹਨ। ਮੀਂਹ ਕਾਰਨ ਉਨਾਓ ’ਚ ਪੰਜ, ਫਤਹਿਪੁਰ ਵਿੱਚ ਤਿੰਨ, ਪ੍ਰਯਾਗਰਾਜ ਵਿੱਚ ਦੋ ਅਤੇ ਸੀਤਾਪੁਰ, ਰਾਏਬਰੇਲੀ ਤੇ ਝਾਂਸੀ ਵਿੱਚ ਇੱਕ ਇੱਕ ਮੌਤ ਹੋਈ ਹੈ।