ਓਟਵਾ, 15 ਸਤੰਬਰ (ਪੋਸਟ ਬਿਊਰੋ) : ਮਹਾਰਾਣੀ ਐਲਿਜ਼ਾਬੈੱਥ ਦੋਇਮ ਦੇ ਅੰਤਿਮ ਸਸਕਾਰ ਵਿੱਚ ਹਿੱਸਾ ਲੈਣ ਲਈ ਕੈਨੇਡਾ ਤੋਂ 15 ਮੈਂਬਰੀ ਵਫਦ ਲੰਡਨ ਜਾਵੇਗਾ। ਇਸ ਵਫਦ ਵਿੱਚ ਕਈ ਮੁੱਖ ਹਸਤੀਆਂ ਦੇ ਨਾਲ ਨਾਲ ਮੌਜੂਦਾ ਤੇ ਸਾਬਕਾ ਪ੍ਰਧਾਨ ਮੰਤਰੀ ਵੀ ਸ਼ਾਮਲ ਹੋਣਗੇ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਤੇ ਗਵਰਨਰ ਜਨਰਲ ਮੈਰੀ ਸਾਇਮਨ ਤੋਂ ਇਲਾਵਾ ਚਾਰ ਸਾਬਕਾ ਪ੍ਰਧਾਨ ਮੰਤਰੀ, ਜਿਨ੍ਹਾਂ ਵਿੱਚ ਸਟੀਫਨ ਹਾਰਪਰ, ਪਾਲ ਮਾਰਟਿਨ, ਜੀਨ ਕ੍ਰੈਚੀਅਨ ਤੇ ਕਿਮ ਕੈਂਪਬੈਲ ਸ਼ਾਮਲ ਹਨ, ਦੇ ਨਾਲ ਨਾਲ ਸਾਬਕਾ ਗਵਰਨਰ ਜਨਰਲ ਮਾਈਕਲ ਜੀਨ ਤੇ ਡੇਵਿਡ ਜੌਹਨਸਨ ਵੀ ਇਸ ਵਫਦ ਦਾ ਹਿੱਸਾ ਹੋਣਗੇ।ਅਸੈਂਬਲੀ ਆਫ ਫਰਸਟ ਨੇਸ਼ਨਜ਼ ਦੇ ਨੈਸ਼ਨਲ ਚੀਫ ਰੋਜ਼ਐਨ ਆਰਚੀਬਾਲਡ, ਇਨੁਇਟ ਦੇ ਪ੍ਰੈਜ਼ੀਡੈਂਟ ਤਾਪੀਰਿਤ ਕਨਾਤਾਮੀ ਨਾਤਾਨ ਓਬੈੱਡ, ਮੈਟਿਸ ਨੈਸ਼ਨਲ ਕਾਊਂਸਲ ਦੇ ਪ੍ਰੈਜ਼ੀਡੈ਼ਟ ਕੈਸਿਡੀ ਕੈਰਨ ਵੀ ਵਫਦ ਵਿੱਚ ਸ਼ਾਮਲ ਹੋਣਗੇ।
ਇਨ੍ਹਾਂ ਤੋ ਇਲਾਵਾ ਆਰਡਰ ਆਫ ਕੈਨੇਡਾ ਹਾਸਲ ਕਰਨ ਵਾਲੀ ਅਦਾਕਾਰਾ ਸੈਂਡਰਾ ਓਹ, ਓਲੰਪੀਅਨ ਮਾਰਕ ਟਿਊਕਸਬਰੀ ਤੇ ਕਿਊਬਿਕ ਦੇ ਗਾਇਕ ਗ੍ਰੈਗਰੀ ਚਾਰਲਸ ਵੀ ਮਹਾਰਾਣੀ ਦੀਆਂ ਅੰਤਿਮ ਰਸਮਾਂ ਦਾ ਹਿੱਸਾ ਬਣਨਗੇ।
ਮਹਾਰਾਣੀ ਐਲਿਜ਼ਾਬੈੱਥ ਦਾ ਅੰਤਿਕ ਸਸਕਾਰ ਸੋਮਵਾਰ ਨੂੰ ਲੰਡਨ ਵਿੱਚ ਕੀਤਾ ਜਾਵੇਗਾ।ਅੰਤਿਮ ਰਸਮਾਂ ਤੋਂ ਬਾਅਦ ਓਟਵਾ ਵਿੱਚ ਮਹਾਰਾਣੀ ਦੀ ਯਾਦ ਵਿੱਚ ਇੱਕ ਕੌਮੀ ਸਮਾਰੋਹ ਕਰਵਾਇਆ ਜਾਵੇਗਾ ਜਿਸ ਵਿੱਚ ਸਾਬਕਾ ਪ੍ਰਧਾਨ ਮੰਤਰੀ ਬ੍ਰਾਇਨ ਮਲਰੋਨੀ ਤੇ ਜੋਅ ਕਲਾਰਕ ਹਿੱਸਾ ਲੈਣਗੇ। ਇਸ ਮੌਕੇ ਮੈ਼ਬਰ ਪਾਰਲੀਆਮੈ਼ਟ ਤੋਂ ਇਲਾਵਾ ਕਈ ਹੋਰ ਅਹਿਮ ਹਸਤੀਆਂ ਮੌਜੂਦ ਰਹਿਣਗੀਆਂ। ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵੱਲੋਂ 19 ਸਤੰਬਰ ਨੂੰ ਫੈਡਰਲ ਛੁੱਟੀ ਦਾ ਐਲਾਨ ਕੀਤਾ ਗਿਆ ਹੈ। ਇਸ ਦੇ ਨਾਲ ਹੀ ਸੋਮਵਾਰ ਨੂੰ ਓਟਵਾ ਵਿੱਚ ਮਨਾਏ ਜਾਣ ਵਾਲੇ ਯਾਦਗਾਰੀ ਸਮਾਰੋਹ ਦੌਰਾਨ ਮਿਲਟਰੀ ਪਰੇਡ ਤੇ ਗੰਨ ਸਲਾਮੀ ਵੀ ਦਿੱਤੀ ਜਾਵੇਗੀ।