ਚੰਡੀਗੜ੍ਹ, 18 ਅਗਸਤ, (ਪੋਸਟ ਬਿਊਰੋ)- ਸਕ੍ਰੈਪ ਕਾਰਾਂ ਦੀ ਵਿਕਰੀ ਵਿੱਚ ਵੱਡੇ ਘੁਟਾਲੇ ਦਾ ਪਰਦਾਫਾਸ਼ ਕਰਦਿਆਂ ਪੰਜਾਬ ਪੁਲਿਸ ਨੇ ਮਾਨਸਾ ਦੇ ਇੱਕ ਸਕਰੈਪ ਡੀਲਰ ਸਣੇ ਤਿੰਨ ਜਣਿਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ।ਮਾਰੂਤੀ ਸੁਜ਼ੂਕੀ ਕਾਰਾਂ ਦੇ ਚੈਸੀ ਨੰਬਰਾਂ ਨਾਲ ਛੇੜਛਾੜ ਕਰਕੇ ਅਤੇ ਗਾਹਕਾਂ ਨੂੰ ਜਾਇਜ਼ ਕਾਰਾਂ ਵਜੋਂ ਰਜਿਸਟਰਡ ਕਰਵਾਉਣ ਲਈ ਧੋਖੇ ਨਾਲ ਵੇਚਣ ਦੇ ਦੋਸ਼ ਹੇਠ ਇਨ੍ਹਾਂ ਮੁਲਜ਼ਮਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ।
ਅੱਜਏਥੇ ਰੋਪੜ ਰੇਂਜ ਦੇ ਡਿਪਟੀ ਇੰਸਪੈਕਟਰ ਜਨਰਲ (ਡੀਆਈਜੀ) ਗੁਰਪ੍ਰੀਤ ਸਿੰਘ ਭੁੱਲਰ ਨੇ ਦੱਸਿਆ ਕਿ ਪਟਿਆਲਾ ਦੇ ਬਹਾਦਰਗੜ੍ਹ ਵਿਖੇ ਅਟੇਲੀਅਰ ਆਟੋਮੋਬਾਈਲਜ਼ ਨਾਂਅ ਦੀ ਮਾਰੂਤੀ ਸੁਜ਼ੂਕੀ ਡੀਲਰਸਿ਼ਪ ਨੇ ਸ਼ੋਅਰੂਮ ਦੇ ਅਹਾਤੇ ਵਿੱਚ ਹੜ੍ਹ ਨਾਲ ਨੁਕਸਾਨੀਆਂ ਘੱਟੋ-ਘੱਟ 87 ਕਾਰਾਂ ਨੂੰ ਵੇਚਿਆ ਹੈ। ਸਕਰੈਪ ਕੁੱਲ 85 ਲੱਖ ਰੁਪਏ ਦਾ ਲਿਆ ਸੀ। ਇਹ ਕਾਰਾਂ ਬਿਲਕੁਲ ਨਵੀਆਂ ਸਨ, ਪਰ ‘ਵਰਤਣ ਲਈ ਅਯੋਗ’ ਕਰਾਰ ਸਨ, ਕਿਉਂਕਿ ਉਹ ਕੁਝ ਸਮੇਂ ਤੋਂ ਹੜ੍ਹਾਂ ਵਾਲੇ ਸ਼ੋਅਰੂਮ ਵਿੱਚ ਪਈਆਂ ਸਨ। ਇਨ੍ਹਾਂ ਨੂੰ 27 ਜੁਲਾਈ 2019 ਨੂੰ ਮਾਨਸਾ ਦੇ ਸਕਰੈਪ ਡੀਲਰ ਨੂੰ ਵੇਚਿਆ ਸੀ, ਜਿਸ ਦੀ ਪਛਾਣ ਪੁਨੀਤ ਗੋਇਲ ਦੀ ਮਾਲਕੀ ਵਾਲੀ ਮੈਸਰਜ਼ ਪੁਨੀਤ ਟਰੇਡਿੰਗ ਕੰਪਨੀ ਵਜੋਂ ਹੋਈ ਹੈ। ਪੁਨੀਤ ਗੋਇਲ ਫਰਾਰ ਹੈ ਤੇ ਪੁਲਿਸ ਨੇ ਉਸ ਦੀ ਗ੍ਰਿਫਤਾਰੀ ਲਈ ਛਾਪੇਮਾਰ ਰਹੀ ਹੈ। ਫੜੇ ਗਏ ਲੋਕਾਂ ਵਿੱਚ ਰਾਜਪਾਲ ਸਿੰਘ (ਪੁਨੀਤ ਗੋਇਲ ਦੇ ਪਿਤਾ), ਜਸਪ੍ਰੀਤ ਸਿੰਘ ਉਰਫ਼ ਰਿੰਕੂ (ਮੁੱਖ ਦੋਸ਼ੀ ਅਤੇ ਕਾਰ ਡੀਲਰ) ਅਤੇ ਦੋਵੇਂ ਵਾਸੀ ਮਾਨਸਾ ਅਤੇ ਨਵੀਨ ਕੁਮਾਰ (ਬਠਿੰਡਾ ਟਰਾਂਸਪੋਰਟ ਅਥਾਰਟੀ ਦਾ ਏਜੰਟ) ਸ਼ਾਮਲ ਹਨ। ਪੁਲਿਸ ਨੇ ਪੁਨੀਤ ਗੋਇਲਉੱਤੇ ਕੇਸ ਦਰਜ ਕੀਤਾ ਅਤੇ 40 ਕਾਰਾਂ ਫੜੀਆਂ ਹਨ, ਜਿਨ੍ਹਾਂ ਵਿੱਚ ਅੱਠ ਸਿਆਜ਼, ਦੋ ਸਵਿਫਟ, ਅੱਠ ਸਵਿਫਟ ਡਿਜ਼ਾਇਰ, ਚਾਰ ਬਲੇਨੋ, ਤਿੰਨ ਬਰੇਜ਼ਾ, 10 ਆਲਟੋ ਕੇ10, ਦੋ ਸੇਲੇਰੀਓ ਅਤੇ ਇੱਕ-ਇੱਕ ਅਰਟਿਗਾ, ਐਸ-ਕਰਾਸ ਅਤੇ ਇਗਨਿਸ ਸ਼ਾਮਲ ਹਨ।
ਡੀਆਈਜੀ ਗੁਰਪ੍ਰੀਤ ਸਿੰਘ ਭੁੱਲਰ ਨੇ ਦੱਸਿਆ ਕਿ ਪੇਪਰ ਟਰੇਲ ਦੀ ਜਾਂਚ ਵਿੱਚ ਪਤਾ ਲੱਗਾ ਕਿ 87 ਗੱਡੀਆਂ, ਜਿਨ੍ਹਾਂ ਦੇ ਚੈਸੀ ਨੰਬਰ ਪੀਸ ਕੇ ਏਜੰਸੀ ਨੇ ਸਕ੍ਰੈਪ ਕਰਨ ਦੇ ਲਈ ਰੱਖੇ ਸਨ, ਜਾਅਲਸਾਜ਼ੀ ਨਾਲ ਜਾਇਜ਼ ਵਾਹਨਾਂ ਵਜੋਂ ਰਜਿਸਟਰਡ ਕੀਤੇ ਗਏ ਹਨ।ਇਸ ਬਾਰੇ ਪੰਜਾਬ ਅਤੇ ਹੋਰ ਰਾਜਾਂ ਦੇ ਵੱਖ-ਵੱਖਟਰਾਂਸਪੋਰਟ ਦਫ਼ਤਰਾਂ ਦੇ ਅਧਿਕਾਰੀਆਂ ਬਾਰੇ ਵੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਹੋਰ ਗ੍ਰਿਫਤਾਰੀਆਂ ਹੋ ਸਕਦੀਆਂ ਹਨ।