ਗੜ੍ਹਵਾਲ, 24 ਮਈ (ਪੋਸਟ ਬਿਊਰੋ)- ਮਨੁੱਖ ਵੱਲੋਂ ਵਰਤੇ ਜਾਂਦੇ ਖਤਰਨਾਕ ਪਲਾਸਟਿਕ ਦੇ ਪ੍ਰਭਾਵ ਤੋਂ ਨਦੀਆਂ ਵਿੱਚ ਮੱਛੀਆਂ ਵੀ ਨਹੀਂ ਬਚ ਸਕੀਆਂ। ਮੱਛੀਆਂ ਦੇ ਸਰੀਰ ਵਿੱਚ ਵੀ ਪਲਾਸਟਿਕ ਦੇ ਕਣ ਮਿਲ ਰਹੇ ਹਨ। ਪਾਲਤੂ ਪਸ਼ੂਆਂ ਸਮੇਤ ਹੋਰ ਜਾਨਵਰਾਂ ਦੇ ਸਰੀਰ ਵਿੱਚ ਜ਼ਹਿਰੀਲੇ ਪਲਾਸਟਿਕ ਦੀ ਮੌਜੂਦਗੀ ਆਮ ਗੱਲ ਮੰਨੀ ਜਾਣ ਲੱਗੀ ਹੈ ਪਰ ਨਦੀਆਂ ਵਿੱਚ ਮੱਛੀਆਂ ਦੇ ਢਿੱਡ ਵਿੱਚ ਪਲਾਸਟਿਕ ਦੇ ਕਣ ਮਿਲਣ ਤੋਂ ਵਿਗਿਆਨੀ ਹੈਰਾਨੀ ਵਿੱਚ ਹਨ।
ਉਤਰਾਖੰਡ ਦੇ ਪੌੜੀ ਜ਼ਿਲ੍ਹੇ ਤੋਂ ਹੋ ਕੇ ਵਗਦੀ ਪ੍ਰਮੁੱਖ ਨਦੀ ਅਲਕਨੰਦਾ ਵਿੱਚ ਮੱਛੀਆਂ ਦੇ ਢਿੱਡ ਵਿੱਚ ਹਾਨੀਕਾਰਕ ਪੌਲੀਮਰ ਦੇ ਟੁੱਕੜੇ ਅਤੇ ਮਾਈਕ੍ਰੋ-ਪਲਾਸਟਿਕ ਸਮੇਤ ਨਾਈਲੋਨ ਦੇ ਸੂਖਮ ਕਣ ਮਿਲਣ ਦਾ ਪ੍ਰਗਟਾਵਾ ਹੇਮਵਤੀ ਨੰਦਨ ਬਹੁਗੁਣਾ ਗੜ੍ਹਵਾਲ ਯੂਨੀਵਰਸਿਟੀ ਦੇ ਹਿਮਾਲਿਆ ਐਕਆਟਿਕ ਜੈਵ ਵਿਭਿੰਨਤਾ ਵਿਭਾਗ ਦੀ ਖੋਜ ਤੋਂ ਹੋਇਆ ਹੈ। ਇਹ ਪਲਾਸਟਿਕ ਦੇ ਕਣ ਮੱਛੀਆਂ ਦੇ ਨਾਲ ਹੀ ਮਾਸਾਹਾਰੀ ਮਨੁੱਖਾਂ ਲਈ ਵੀ ਹਾਨੀਕਾਰਕ ਸਾਬਤ ਹੋ ਸਕਦੇ ਹਨ।ਵਿਭਾਗ ਦੇ ਮੁਖੀ ਨੇ ਦੱਸਿਆ ਕਿ ਉਹ ਆਪਣੀ ਖੋਜੀ ਟੀਮ ਨਾਲ ਪਿਛਲੇ ਕਈ ਮਹੀਨਿਆਂ ਤੋਂ ਅਲਕਨੰਦਾ ਦੀਆਂ ਮੱਛੀਆਂ ਉੱਤੇਖੋਜ ਕਰ ਰਹੇ ਹਨ। ਇਸ ਦੌਰਾਨ ਮੱਛੀਆਂ ਦੇ ਸਰੀਰ ਵਿੱਚ ਪਲਾਸਟਿਕ ਪਦਾਰਥਾਂ ਦੇ ਛੋਟੇ ਕਣਾਂ ਅਤੇ ਰੇਸ਼ਿਆਂ ਦੀ ਮੌਜੂਦਗੀ ਪਤਾ ਲੱਗੀ ਹੈ। ਇਸ ਦੀ ਪੁਸ਼ਟੀ ਹੋਣ ਮਗਰੋਂ ਨਮੂਨਿਆਂ ਨੂੰ ਵਿਸ਼ਲੇਸ਼ਣ ਲਈ ਆਈ ਆਈ ਟੀ ਰੂੜਕੀ ਅਤੇ ਚੰਡੀਗ਼ੜ੍ਹ ਦੀਆਂ ਸੰਸਥਾਵਾਂ ਨੂੰ ਭੇਜਿਆ ਗਿਆ।ਡਾ. ਸਿੰਘ ਨੇ ਚਿੰਤਾ ਪ੍ਰਗਟਾਈ ਕਿ ਜੇ ਪਹਾੜਾਂ ਦੀਆਂ ਮੱਛੀਆਂ ਦੀ ਸਥਿਤੀ ਇਹ ਹੈ ਤਾਂ ਮੈਦਾਨੀ ਖੇਤਰਾਂ ਦੀ ਸਥਿਤੀ ਇਸ ਤੋਂ ਵੱਧ ਖਤਰਨਾਕ ਹੋੋ ਸਕਦੀ ਹੈ, ਜਿੱਥੇ ਵੱਡੇ ਪੱਧਰ ਉੱਤੇ ਪਲਾਸਟਿਕ ਅਤੇ ਹੋਰ ਰਹਿੰਦ-ਖੂੰਹਦ ਸਿੱਧੀ ਨਦੀਆਂ ਵਿੱਚਸੁੱਟੀ ਜਾਂਦੀ ਹੈ। ਇਨ੍ਹਾਂ ਮੱਛੀਆਂ ਨੂੰ ਖਾਣ ਵਾਲੇ ਮਨੁੱਖਾਂ ਦੇ ਸਰੀਰ ਵਿੱਚ ਇਹ ਕਣ ਜਾ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਖੋਜ ਦਾ ਘੇਰਾ ਵਧਾ ਦਿੱਤਾ ਗਿਆ ਹੈ। ਗੰਗਾ ਸਮੇਤ ਹੋਰ ਨਦੀਆਂ ਦੀਆਂ ਮੱਛੀਆਂ ਉੱਤੇ ਵੀ ਅਧਿਐਨ ਕੀਤਾ ਜਾਵੇਗਾ। ਇਸ ਵਿੱਚ ਪਹਾੜੀ ਦੇ ਨਾਲ ਹੀ ਮੈਦਾਨੀ ਖੇਤਰ ਦੀ ਨਦੀਆਂ ਵੀ ਸ਼ਾਮਲ ਹਨ।