ਨਵੀਂ ਦਿੱਲੀ, 23 ਮਈ (ਪੋਸਟ ਬਿਊਰੋ)- ਪੰਜਾਬ ਨੈਸ਼ਨਲ ਬੈਂਕ ਨਾਲ ਠੱਗੀ ਮਾਰਨ ਵਾਲੇ ਭਗੌੜੇ ਮੇਹੁਲ ਚੋਕਸੀ (62) ਬਾਰੇ ਡੋਮੀਨਿਕਾ ਸਰਕਾਰ ਨੇ ਉਸ ਖਿਲਾਫ ਦੇਸ਼ ਵਿੱਚ ਗੈਰ ਕਾਨੂੰਨੀ ਦਾਖਲੇ ਦੇ ਦੋਸ਼ ਰੱਦ ਕਰ ਦਿੱਤੇ ਹਨ।
ਵਰਨਣ ਯੋਗ ਹੈ ਕਿ ਮੇਹੁਲ ਚੋਕਸੀ ਨੂੰ ਡੋਮੀਨਿਕਾ ਨੇ ਪਿਛਲੇ ਸਾਲ ਮਈ ਵਿੱਚ ਗ੍ਰਿਫਤਾਰ ਕੀਤਾ ਸੀ, ਜਦੋਂ ਉਹ ਐਂਟੀਗੁਆ ਅਤੇ ਬਰਬੂਡਾ ਤੋਂ ਲਾਪਤਾ ਹੋ ਗਿਆ ਸੀ। ਡੋਮੀਨਿਕਾ ਹਾਈ ਕੋਰਟ ਨੇ ਉਸ ਨੂੰ 51 ਦਿਨ ਦੀ ਜ਼ਮਾਨਤ ਉੱਤੇ ਛੱਡ ਦਿੱਤਾ ਸੀ। ਇਸ ਦੌਰਾਨ ਭਾਰਤ ਨੇ ਉਸ ਨੂੰ ਦੇਸ਼ ਵਾਪਸ ਲਿਆਉਣ ਦੀਆਂ ਕੋਸ਼ਿਸ਼ਾਂ ਕੀਤੀਆਂ ਅਤੇ ਸੀ ਬੀ ਆਈ ਦੀ ਟੀਮ ਪ੍ਰਾਈਵੇਟ ਜ਼ੈਟ ਲੈ ਕੇ ਉਥੇ ਗਈ ਸੀ। ਉਸ ਦੇ ਵਕੀਲਾਂ ਨੇ ਦੋਸ਼ ਲਾਇਆ ਕਿ ਮੇਹੁਲ ਨੂੰ ਐਂਟੀਗੁਆ ਤੋਂ ਭਾਰਤੀ ਦਿੱਖ ਵਾਲੇ ਵਿਅਕਤੀ ਅਗਵਾ ਕਰ ਕੇ ਡੋਮੀਨਿਕਾ ਲੈ ਆਏ ਸਨ।
ਇਸ ਬਾਰੇ ਮੇਹੁਲ ਦੇ ਬੁਲਾਰੇ ਨੇ ਲੰਡਨ ਵਿੱਚ ਦੱਸਿਆ ਕਿ ਚੋਕਸੀ ਦੇ ਖਿਲਾਫ ਡੋਮੀਨਿਕਾ ਵਿੱਚ ਗੈਰ ਕਾਨੂੰਨੀ ਦਾਖਲੇ ਦੇ ਸਾਰੇ ਦੋਸ਼ 20 ਮਈ ਨੂੰ ਰੱਦ ਕਰ ਦਿੱਤੇ ਗਏ ਹਨ। ਉਸ ਨੇ ਕਿਹਾ, ‘‘ਡੋਮੀਨਿਕਾ ਦੇ ਇਸ ਫੈਸਲੇ ਨਾਲ ਤੈਅ ਹੋ ਗਿਆ ਹੈ ਕਿ ਮੇਹੁਲ ਖਿਲਾਫ ਕੋਈ ਕੇਸ ਨਹੀਂ ਹੈ। ਚੋਕਸੀ ਨੂੰ ਐਂਟੀਗੁਆ ਤੋਂ ਭਾਰਤੀ ਏਜੰਟਾਂ ਨੇ ਜਬਰੀ ਚੁੱਕਿਆ ਸੀ ਅਤੇ ਕੁੱਟ ਕੇ ਕਿਸ਼ਤੀ ਰਾਹੀਂ ਡੋਮੀਨਿਕਾ ਲਿਆਂਦਾ ਸੀ, ਜਿੱਥੇ ਉਸ ਨੂੰ ਫਿਰ ਗੈਰ ਕਾਨੂੰਨੀ ਢੰਗ ਨਾਲ ਅਧਿਕਾਰੀਆਂ ਦੇ ਹਵਾਲੇ ਕਰ ਦਿੱਤਾ ਗਿਆ ਸੀ।'' ਉਸ ਨੇ ਆਸ ਪ੍ਰਗਟਾਈ ਕਿ ਚੋਕਸੀ ਨੂੰ ਐਂਟੀਗੁਆ ਤੋਂ ਅਗਵਾ ਕਰਨ ਲਈ ਜ਼ਿੰਮੇਵਾਰ ਵਿਅਕਤੀਆਂ ਖਿਲਾਫ ਕਾਰਵਾਈ ਕੀਤੀ ਜਾਵੇਗੀ। ਚੋਕਸੀ ਨੂੰ ਡੋਮੀਨਿਕਾ ਹਾਈ ਕੋਰਟ ਨੇ ਪਿਛਲੇ ਸਾਲ ਜੁਲਾਈ ਵਿੱਚ ਇਲਾਜ ਲਈ ਐਂਟੀਗੁਆ ਜਾਣ ਵਾਸਤੇ ਜ਼ਮਾਨਤ ਦੇ ਦਿੱਤੀ ਸੀ।