ਬਾੜਮੇਰ, 23 ਮਈ (ਪੋਸਟ ਬਿਊਰੋ)- ਰਾਜਸਥਾਨ ਵਿੱਚ ਬਾੜਮੇਰ ਤੋਂ ਕਰੀਬ 180 ਕਿਲੋਮੀਟਰ ਦੂਰ ਮੰਡਲੀ ਪਿੰਡ ਦੇ ਆਦਰਸ਼ ਸਿਹਤ ਕੇਂਦਰ ਉੱਤੇ ਨਰਸਿੰਗ ਅਫਸਰ ਦੀ ਸੂਝ ਨਾਲ ਇੱਕ ਬੱਚੇ ਅਤੇ ਔਰਤ ਦੀ ਜਾਨ ਬਚ ਗਈ।
ਅਸਲ ਵਿੱਚ ਡਿਲਿਵਰੀ ਪਿੱਛੋਂ ਬੱਚੇ ਦੀ ਧੜਕਣ ਬੰਦ ਹੋ ਗਈ ਸੀ। ਨਰਸਿੰਗ ਮੁਲਾਜ਼ਮ ਨੇ ਬੱਚੇ ਨੂੰ ਆਕਸੀਜਨ ਉੱਤੇ ਲੈ ਲਿਆ, ਪ੍ਰੰਤੂ ਓਸੇ ਵੇਲੇ ਲਾਈਟ ਚਲੀ ਗਈ। ਇਸ ਦੇ ਬਾਅਦ ਨਰਸ ਬੱਚੇ ਨੂੰ ਕਰੀਬ 10 ਮਿੰਟ ਤਕ ਮੂੰਹ ਨਾਲ ਸਾਹ (ਰਿਸਸਿਟੈਸ਼ਨ ਪ੍ਰੋਸੈਸ) ਦਿੰਦੀ ਰਹੀ।ਇਸ ਨਾਲ ਬੱਚੇ ਦਾ ਦਿਲ ਧੜਕਣ ਲੱਗਾ ਤੇ ਉਸ ਦੀ ਜਾਨ ਬਚ ਗਈ। ਇਸ ਦੇ ਬਾਅਦ ਸੋਸ਼ਲ ਮੀਡੀਆ ਉੱਤੇ ਨਰਸ ਦੀ ਤਾਰੀਫ ਹੋ ਰਹੀ ਹੈ। ਇਸ ਦਾ ਇੱਕ ਵੀਡੀਓ ਸਾਹਮਣੇ ਆਇਆ ਹੈ। ਔਰਤ ਦੇ ਪਰਵਾਰ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੀ ਸੂਝ ਨਾਲ ਮਾਂ ਅਤੇ ਬੱਚੇ ਦੋਵਾਂ ਦੀ ਜਾਨ ਬਚ ਗਈ। ਉਹ ਛੇ ਸਾਲ ਤੋਂ ਇਸ ਹਸਪਤਾਲ `ਚ ਤੈਨਾਤ ਹੈ। ਪਹਿਲਾਂ ਵੀ ਉਹ ਔਰਤਾਂ ਸਮੇਤ ਕਈ ਬੱਚਿਆਂ ਦੀ ਜਾਨ ਬਚਾਅ ਚੁੱਕੀ ਹੈ।
ਨਰਸਿੰਗ ਅਫਸਰ ਨਿਰਮਲਾ ਬਿਸ਼ਨੋਈ ਨੇ ਦੱਸਿਆ ਕਿ ਡਿਲਿਵਰੀ ਪਿੱਛੋਂ ਪ੍ਰੀਮੈਚਿਓਰ ਬੱਚੇ ਦੀ ਹਾਰਟਬੀਟ ਨਹੀਂ ਚੱਲ ਰਹੀ ਸੀ। ਬੱਚਾ ਰੋ ਵੀ ਨਹੀਂ ਰਿਹਾ ਸੀ। ਉਸ ਨੂੰ ਆਕਸੀਜਨ ਉੱਤੇ ਲੈਂਦੇ ਹੀ ਲਾਈਟ ਚਲੀ ਗਈ। ਇਨਵਰਟਰ ਵੀ ਸਪੋਰਟ ਨਹੀਂ ਕਰ ਰਿਹਾ ਸੀ। ਓਦੋਂ ਬੱਚੇ ਨੂੰ ਕਰੀਬ 10 ਮਿੰਟ ਤਕ ਮੂੰਹ ਨਾਲ ਸਾਹ ਦਿੱਤਾ ਗਿਆ ਤਾਂ ਬੱਚਾ ਰੋਣ ਲੱਗਾ ਅਤੇ ਹਾਰਟਬੀਟ ਚਲ ਪਈ। ਇਸ ਦੇ ਬਾਅਦ ਬੱਚੇ ਦੀ ਮਾਂ ਅਤੇ ਘਰਦਿਆਂ ਨੇ ਸੁੱਖ ਦਾ ਸਾਹ ਲਿਆ।