ਭੁਵਨੇਸ਼ਵਰ, 22 ਮਈ (ਪੋਸਟ ਬਿਊਰੋ)- ਉੜੀਸਾ ਹਾਈ ਕੋਰਟ ਨੇ ਇੱਕ ਤਹਿਸੀਲਦਾਰ ਨੂੰ ਸਜ਼ਾ ਵਜੋਂ ਪੰਜਾਹ ਪੌਦੇ ਲਾਉਣ ਦਾ ਹੁਕਮ ਦਿੱਤਾ ਹੈ। ਇਹ ਸਜ਼ਾ ਤਹਿਸੀਲਦਾਰ ਨੂੰ ਇੱਕ ਅਨਪੜ੍ਹ ਔਰਤ ਦੇ ਕੇਸ ਦੀ ਸਹੀ ਸੁਣਵਾਈ ਨਾ ਕਰਨ ਅਤੇ ਜੁਰਮਾਨਾ ਲਾਉਣ ਦੇ ਦੋਸ਼ ਵਿੱਚ ਸੁਣਾਈ ਗਈ ਹੈ।
ਜਸਟਿਸ ਵਿਸ਼ਵਨਾਥ ਰੱਥ ਨੇ ਪਿਛਲੇ ਦਿਨੀਂ ਪੁਰੀ ਜ਼ਿਲ੍ਹੇ ਦੇ ਕਾਕਤਪੁਰ ਦੇ ਤਹਿਸੀਲਦਾਰ ਬਿਰੰਚੀ ਨਾਰਾਇਣ ਬਹਿਰਾ ਨੂੰ ਕੱਟਕ ਵਿਕਾਸ ਅਥਾਰਟੀ ਖੇਤਰ ਦੇ ਕਿਸੇ ਵੀ ਸੈਕਟਰ ਵਿੱਚ ਸੜਕ ਕੰਢੇ ਰੁੱਖ ਲਾਉਣ ਦਾ ਨਿਰੇਦਸ਼ ਦਿੱਤਾ ਹੈ।ਤਹਿਸੀਲਦਾਰ ਨੇ ਪੀੜਤ ਮਹਿਲਾ ਮੀਤਾ ਦਾਸ ਵਿਰੁੱਧ ਪਿੰਡ ਬਲਾਣਾ ਦੀ 0.08 ਏਕੜ ਗੋਚਰ ਜ਼ਮੀਨ (ਚਰਾਗਾਹ) ਉਤੇ ਕਬਜ਼ਾ ਕਰਨ ਅਤੇ ਉਸ ਉੱਤੇ ਕੱਚਾ ਘਰ ਬਣਾਉਣ ਦੇ ਦੋਸ਼ ਵਿੱਚ ਖੁਦ ਕਾਰਵਾਈ ਕੀਤੀ ਸੀ। ਬਹਿਰਾ ਨੇ ਪਿਛਲੇ ਸਾਲ 15 ਸਤੰਬਰ ਨੂੰ ਔਰਤ ਨੂੰ ਉਥੋਂ ਹਟਣ ਦਾ ਹੁਕਮ ਜਾਰੀ ਕੀਤਾ ਸੀ ਅਤੇ ਨਾਲ 10000 ਰੁਪਏ ਦਾ ਜੁਰਮਾਨਾ ਵੀ ਲਗਾਇਆ ਸੀ।ਔਰਤ ਦੇ ਵਕੀਲ ਵੱਲੋਂ ਦਾਇਰ ਪਟੀਸ਼ਨ ਉੱਤੇ ਸੁਣਵਾਈ ਕਰਦੇ ਹੋਏ ਜਸਟਿਸ ਰੱਥ ਨੇ ਦੇਖਿਆ ਕਿ ਤਹਿਸੀਲਦਾਰ ਨੇ ਔਰਤ ਨੂੰ ਸੁਣਵਾਈ ਦਾ ਮੌਕਾ ਦਿੱਤੇ ਬਿਨਾਂ ਇਹ ਅਨੋਖਾ ਹੁਕਮ ਪਾਸ ਕੀਤਾ ਸੀ। ਅਦਾਲਤ ਨੇ ਕਿਹਾ ਕਿ ਉੜੀਸਾ ਸੂਬੇ ਵਿੱਚ ਅਜਿਹੀ ਕਿਸੇ ਵੀ ਅਥਾਰਟੀ ਵੱਲੋਂ ਇਹ ਕਾਰਵਾਈ ਦੁਹਰਾਈ ਨਹੀਂ ਜਾਣੀ ਚਾਹੀਦੀ ਅਤੇ ਇਸ ਦੇ ਲਈ ਤਹਿਸੀਲਦਾਰ ਨੂੰ ਘੱਟੋ-ਘੱਟ ਪੰਜਾਹ ਰੁੱਖ ਲਾਉਣ ਦੇ ਨਿਰਦੇਸ਼ ਦਿੱਤੇ। ਤਹਿਸੀਲਦਾਰ ਨੇ ਉਕਤ ਔਰਤ ਵਿਰੁੱਧ ਉੜੀਸਾ ਜ਼ਮੀਨੀ ਕਬਜ਼ੇ ਦਾ ਨਿਪਟਾਰਾ ਕਾਨੂੰਨ ਹੇਠ ਇਹ ਕਾਰਵਾਈ ਕੀਤੀ ਸੀ। ਔਰਤ ਦੇ ਵਕੀਲ ਨੇ ਕਿਹਾ ਕਿ ਔਰਤ ਅਨਪੜ੍ਹ ਅਤੇ ਸਬੰਧਤ ਕਾਨੂੰਨ ਤੋਂ ਜਾਣੂ ਨਹੀਂ ਸੀ। ਤਹਿਸੀਲਦਾਰ ਨੂੰ ਉਸ ਨੂੰ ਕਾਰਨ ਦੱਸੋ ਨੋਟਿਸ ਦੇਣਾ ਚਾਹੀਦਾ ਸੀ।