ਅੰਬਾਲਾ, 19 ਮਈ (ਪੋਸਟ ਬਿਊਰੋ)- ਪਿੰਡ ਕੇਸਰੀ ਦੇ ਸਰਕਾਰੀ ਸਕੂਲ ਦੇ ਚੌਕੀਦਾਰ ਦੇ ਪੁੱਤ ਨੇ ਰੰਜਿਸ਼ ਕਾਰਨ ਇੱਕ ਔਰਤ ਦੇ ਸਿਰ ਉੱਤੇ ਹਥੌੜਾ ਮਾਰ ਕੇ ਉਸ ਦੀ ਹੱਤਿਆ ਕਰ ਦਿੱਤੀ। ਸਾਹਾ ਪੁਲਸ ਨੇ ਔਰਤ ਦੇ ਪੁੱਤਰ ਜਗਤਾਰ ਸਿੰਘ ਦੀ ਸ਼ਿਕਾਇਤ ਉੱਤੇ ਮੁਲਜ਼ਮ ਕ੍ਰਿਸ਼ਨ ਖਿਲਾਫ ਧਾਰਾ 302 ਦਾ ਮਾਮਲਾ ਦਰਜ ਕਰ ਲਿਆ ਹੈ।
ਜਗਤਾਰ ਸਿੰਘ ਨੇ ਦੱਸਿਆ ਕਿ ਕੱਲ੍ਹ ਸਵੇਰੇ ਉਸ ਦੀ ਮਾਂ ਮੇਮੋ ਦੇਵੀ ਰੂੜੀ ਉਤੇ ਗੋਹਾ ਸੁੱਟਣ ਗਈ ਸੀ। ਉਹ ਵੀ ਸੈਰ ਕਰਨ ਲਈ ਬਜੀਦਪੁਰ ਪਿੰਡ ਵੱਲ ਨਿਕਲਿਆ ਸੀ। ਰਾਹ ਵਿੱਚ ਉਸ ਨੇ ਦੇਖਿਆ ਕਿ ਜਗਮਾਲ ਦੇ ਪਸ਼ੂਆਂ ਦੇ ਵਾੜੇ ਨੇੜੇ ਕ੍ਰਿਸ਼ਨ ਉਸ ਦੀ ਮਾਂ ਨਾਲ ਹੱਥੋਪਾਈ ਕਰ ਰਿਹਾ ਸੀ। ਇਸ ਤੋਂ ਪਹਿਲਾਂ ਕਿ ਉਹ ਦੌੜ ਕੇ ਮਾਂ ਕੋਲ ਪਹੁੰਚਦਾ, ਕ੍ਰਿਸ਼ਨ ਨੇ ਉਸ ਦੀ ਮਾਂ ਦੇ ਸਿਰ ਉੱਤੇ ਹਥੌੜੇ ਨਾਲ ਦੋ-ਤਿੰਨ ਵਾਰ ਕੀਤੇ, ਜਿਸ ਨਾਲ ਉਹ ਗਲੀ ਵਿੱਚ ਡਿੱਗ ਪਈ ਸੀ। ਵਾਰਦਾਤ ਮਗਰੋਂ ਦੋਸ਼ੀ ਮੌਕੇ ਤੋਂ ਦੌੜ ਗਿਆ। ਉਹ ਆਪਣੀ ਮਾਂ ਨੂੰ ਇਲਾਜ ਲਈ ਆਦੇਸ਼ ਮੈਡੀਕਲ ਕਾਲਜ ਟੌਹੜਾ ਲੈ ਕੇ ਗਿਆ, ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ।ਜਗਤਾਰ ਨੇ ਦੱਸਿਆ ਕਿ 15 ਦਿਨ ਪਹਿਲਾਂ ਉਨ੍ਹਾਂ ਦਾ ਗੁਆਂਢੀ ਕ੍ਰਿਸ਼ਨ ਨਾਲ ਮਕਾਨ ਦੇ ਛੱਜੇ ਸਬੰਧੀ ਕੁਝ ਬੋਲ-ਬੁਲਾਰਾ ਹੋ ਗਿਆ ਸੀ। ਪੁਲਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।