ਨਵੀਂ ਦਿੱਲੀ, 16 ਮਈ (ਪੋਸਟ ਬਿਊਰੋ)- ਰਾਜਧਾਨੀ ਦਿੱਲੀ ਵਿੱਚ ਮੁੰਡਕਾ ਇਲਾਕੇ ਵਿੱਚ ਮੈਟਰੋ ਸਟੇਸ਼ਨ ਨੇੜੇ ਦੀ ਚਾਰ ਮੰਜ਼ਿਲਾ ਵਪਾਰਕ ਇਮਾਰਤ ਵਿੱਚ ਅੱਗ ਲੱਗਣ ਕਾਰਨ 27 ਵਿਅਕਤੀਆਂ ਦੀ ਮੌਤ ਹੋਣ ਦੇ ਦੋ ਦਿਨ ਬਾਅਦ ਦਿੱਲੀ ਪੁਲਸ ਨੇ ਕੱਲ੍ਹ ਇਮਾਰਤ ਦੇ ਮਾਲਕਮਨੀਸ਼ ਲਾਕਰਾ ਨੂੰ ਗ੍ਰਿਫਤਾਰ ਕਰਲਿਆ ਹੈ। ਪੁਲਸ ਟੀਮ ਨੇ ਉਸ ਨੂੰ ਦਿੱਲੀ ਤੇ ਹਰਿਆਣਾ ਵਿੱਚ ਕਈ ਥਾਈਂ ਛਾਪੇ ਮਾਰਨ ਮਗਰੋਂ ਗ੍ਰਿਫਤਾਰ ਕੀਤਾ ਹੈ।
ਪਤਾ ਲੱਗਾ ਹੈ ਕਿ ਮਨੀਸ਼ ਲਾਕਰਾ ਇਸ ਇਮਾਰਤ ਦੀ ਜ਼ਮੀਨੀ ਮੰਜ਼ਿਲ ਤੋਂ ਪ੍ਰਾਪਰਟੀ ਡੀਲਿੰਗਕਰਦਾ ਸੀ। ਪੁਲਸ ਨੇ ਦੱਸਿਆ ਕਿ ਦੋ ਭਰਾਵਾਂ ਹਰੀਸ਼ ਗੋਇਲ ਤੇ ਵਰੁਣ ਗੋਇਲ ਨੇ ਆਪਣੀ ਕੰਪਨੀ ਲਈ ਇਮਾਰਤ ਦੀਆਂ ਤਿੰਨ ਮੰਜ਼ਿਲਾ ਕਿਰਾਏ ਉੱਤੇ ਲਈਆਂ ਸਨ, ਜੋ ਮੁੱਖ ਤੌਰ ਉੱਤੇ ਸੀ ਸੀ ਟੀ ਵੀ ਅਤੇ ਵਾਈ ਫਾਈ ਰਾਊਟਰਾਂ ਬਣਾਉਣ, ਮੁਰੰਮਤ ਅਤੇ ਵੇਚਣ ਦਾ ਕੰਮ ਕਰਦੇ ਸਨ। ਗੋਇਲ ਭਰਾਵਾਂ ਨੇ ਮਨੀਸ਼ ਤੋਂ 2018 ਵਿੱਚ ਇਮਾਰਤ ਦੀ ਪਹਿਲੀ ਮੰਜ਼ਿਲ ਕਿਰਾਏ ਉੱਤੇ ਲਈ, ਫਿਰ ਸਾਲ 2019 ਵਿੱਚ ਦੂਜੀ ਅਤੇ ਤੀਜੀ ਮੰਜ਼ਿਲ 2021 ਵਿੱਚ ਕਿਰਾਏ ਉੱਤੇ ਲੈ ਲਈ। ਉਨ੍ਹਾਂ ਲਾਕਰਾ, ਉਸ ਦੀ ਪਤਨੀ ਅਤੇ ਮਾਂ ਨੂੰ 1.2 ਲੱਖ ਰੁਪਏ ਨਕਦ ਦਿੱਤੇ ਸਨ। ਗੋਇਲ ਭਰਾਵਾਂ ਨੂੰ ਸ਼ੁੱਕਰਵਾਰ ਦੀ ਰਾਤ ਗ੍ਰਿਫਤਾਰ ਕਰ ਲਿਆ ਗਿਆ ਸੀ। ਪੁਲਸ ਨੇ ਦੱਸਿਆ ਕਿ ਲਾਕਰਾ ਆਪਣੇ ਪਰਵਾਰ ਨਾਲ ਇਮਾਰਤ ਦੀ ਉਪਰਲੀ ਮੰਜ਼ਿਲ ਉੱਤੇ ਰਹਿੰਦਾ ਸੀ, ਜਿਸ ਨੂੰ ਸ਼ੁੱਕਰਵਾਰ ਅੱਗ ਲੱਗ ਗਈ ਸੀ ਤੇ ਉਹ ਨਾਲ ਲੱਗਦੀ ਇਮਾਰਤ ਦੀ ਛੱਤ ਤੋਂ ਛਾਲ ਮਾਰ ਕੇ ਫਰਾਰ ਹੋ ਗਿਆ ਸੀ। ਇਮਾਰਤ ਦਾ ਸਿਰਫ ਇੱਕੋ ਨਿਕਾਸ ਸੀ, ਜਿੱਥੇ ਪੌੜੀਆਂ ਉੱਤੇ ਡੱਬੇ ਰੱਖੇ ਹੋਣ ਕਾਰਨ ਲੋਕ ਉਥੇ ਫਸ ਗਏ। ਦਿੱਲੀ ਫਾਇਰ ਸਰਵਿਸਿਜ਼ (ਡੀ ਐਫ ਐਸ) ਦੇ ਮੁਖੀ ਅਤੁਲ ਗਰਗ ਨੇ ਜਾਂਚ ਦੌਰਾਨ ਕਿਹਾ ਸੀ ਕਿ ਇਮਾਰਤ ਕੋਲ ਅੱਗ ਸਬੰਧੀ ਐਨ ਓ ਸੀ ਅਤੇ ਦਿੱਲੀ ਨਗਰ ਨਿਗਮ ਤੋਂ ਕਲੀਅਰੈਂਸ ਨਹੀਂ ਸੀ।
ਇਸ ਦੌਰਾਨ ਆਮ ਆਦਮੀ ਪਾਰਟੀ ਨੇ ਕੱਲ੍ਹ ਇੱਥੇ ਦਾਅਵਾ ਕੀਤਾ ਕਿ ਅੱਗ ਕਾਰਨ ਤਬਾਹ ਹੋਈ ਮੁੰਡਕਾ ਇਲਾਕੇ ਦੀ ਇਮਾਰਤ ਦੇ ਮਾਲਕ ਮਨੀਸ਼ ਲਾਕਰਾ ਦੇ ਸੰਬੰਧ ਭਾਜਪਾ ਨਾਲ ਹਨ ਅਤੇ ਭਾਜਪਾ ਦੀ ਮਦਦ ਨਾਲ ਉਹ ਗੈਰ ਕਾਨੂੰਨੀ ਉਦਯੋਗਿਕ ਗਤੀਵਿਧੀਆਂ ਚਲਾ ਰਿਹਾ ਸੀ। ਪ੍ਰੈਸ ਕਾਨਫਰੰਸ ਵਿੱਚ ਪਾਰਟੀ ਆਗੂ ਦੁਰਗੇਸ਼ ਪਾਠਕ ਨੇ ਭਾਜਪਾ ਆਗੂਆਂ ਨਾਲ ਮੁਲਜ਼ਮ ਮਨੀਸ਼ ਲਾਕਰਾ ਦੀਆਂ ਦੋ ਫੋਟੋ ਵੀ ਦਿਖਾਈਆਂ। ਇਸ ਦੇ ਬਾਅਦਭਾਜਪਾ ਦੇ ਬੁਲਾਰੇ ਨੇ ਕਿਹਾ ਕਿ ਭਾਜਪਾ ਦਾ ਲਾਕਰਾ ਨਾਲ ਕੋਈ ਸੰਬੰਧ ਨਹੀਂ, ਇਹ ਝੂਠਾ ਦੋਸ਼ ਲਾਇਆ ਗਿਆ ਹੈ।