ਓਨਟਾਰੀਓ, 9 ਅਪਰੈਲ (ਪੋਸਟ ਬਿਊਰੋ) : ਸੁ਼ੱਕਰਵਾਰ ਸਵੇਰੇ ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਨੇ ਕੋਵਿਡ-19 ਵੈਕਸੀਨ ਦੀ ਆਪਣੀ ਪਹਿਲੀ ਡੋਜ਼ ਹਾਸਲ ਕੀਤੀ।
ਉਨ੍ਹਾਂ ਸਵੇਰੇ 10:00 ਵਜੇ ਇਟੋਬੀਕੋ ਦੀ ਫਾਰਮੇਸੀ ਵਿੱਚ ਆਕਸਫੋਰਡ ਐਸਟ੍ਰਾਜੈ਼ਨੇਕਾ ਦਾ ਪਹਿਲੀ ਡੋਜ਼ ਲਈ।ਵਾਇਰਸ ਖਿਲਾਫ ਜਨਤਕ ਤੌਰ ਉੱਤੇ ਵੈਕਸੀਨੇਸ਼ਨ ਕਰਵਾਉਣ ਵਾਲੇ ਫੋਰਡ ਕੈਨੇਡਾ ਦੇ ਲੇਟੈਸਟ ਸਿਆਸਤਦਾਨ ਬਣ ਗਏ ਹਨ। ਕਿਊਬਿਕ, ਮੈਨੀਟੋਬਾ, ਨਿਊ ਬਰੰਜ਼ਵਿੱਕ ਤੇ ਕਈ ਹੋਰਨਾ ਟੈਰੇਟਰੀਜ਼ ਦੇ ਪ੍ਰੀਮੀਅਰਜ਼ ਨੇ ਵੀ ਵਿਸ਼ਵ ਦੇ ਕਈ ਹੋਰਨਾਂ ਆਗੂਆਂ ਵਾਂਗ ਜਨਤਕ ਤੌਰ ਉੱਤੇ ਵੈਕਸੀਨੇਸ਼ਨ ਕਰਵਾਈ।
ਓਨਟਾਰੀਓ ਦੀ ਸਿਹਤ ਮੰਤਰੀ ਕ੍ਰਿਸਟੀਨ ਐਲੀਅਟ ਨੇ ਪਿਛਲੇ ਹਫਤੇ ਟੋਰਾਂਟੋ ਦੀ ਹੀ ਫਾਰਮੇਸੀ ਵਿੱਚ ਐਸਟ੍ਰਾਜ਼ੈਨੇਕਾ ਵੈਕਸੀਨ ਦਾ ਪਹਿਲਾ ਸ਼ੌਟ ਲਵਾਇਆ ਸੀ। ਐਲੀਅਟ ਨੇ ਉਸ ਸਮੇਂ ਆਖਿਆ ਸੀ ਕਿ ਜਨਤਕ ਤੌਰ ਉੱਤੇ ਉਸ ਵੱਲੋਂ ਇਹ ਟੀਕਾ ਇਸ ਲਈ ਲਵਾਇਆ ਗਿਆ ਤਾਂ ਕਿ ਲੋਕਾਂ ਵਿੱਚ ਇਸ ਵੈਕਸੀਨ ਨੂੰ ਲੈ ਕੇ ਜਿਹੜੀ ਹਿਚਕਿਚਾਹਟ ਹੈ ਉਹ ਖਤਮ ਹੋ ਸਕੇ।ਅਜਿਹਾ ਕਰਨ ਨਾਲ ਲੋਕਾਂ ਨੂੰ ਇਹ ਸਿੱਧ ਹੋ ਗਿਆ ਕਿ ਇਹ ਟੀਕਾ ਸੇਫ ਹੈ ਤੇ ਇਹ ਜਿ਼ੰਦਗੀਆਂ ਬਚਾਉਂਦਾ ਹੈ।
ਇਸ ਸਮੇਂ ਐਸਟ੍ਰਾਜ਼ੈਨੇਕਾ ਸੌ਼ਟ 55 ਸਾਲ ਜਾਂ ਇਸ ਤੋਂ ਵੱਧ ਉਮਰ ਦੇ ਲੋਕਾਂ ਨੂੰ ਓਨਟਾਰੀਓ ਦੀਆਂ ਚੋਣਵੀਆਂ ਫਾਰਮੇਸੀਜ਼ ਉੱਤੇ ਉਪਲਬਧ ਹੈ।