ਕੋਲਕਾਤਾ, 25 ਮਾਰਚ (ਪੋਸਟ ਬਿਊਰੋ)- ਭਾਜਪਾ ਦੇ ਪੱਛਮੀ ਬੰਗਾਲ ਦੇ ਪ੍ਰਧਾਨ ਦਿਲੀਪ ਘੋਸ਼ ਇੱਕ ਵੀਡੀਓ ਵਿੱਚ ਇਹ ਸੁਝਾਅ ਦਿੰਦੇ ਨਜ਼ਰ ਆ ਰਹੇ ਹਨ ਕਿ ਇਸ ਰਾਜ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਨੂੰ ਆਪਣੀ ਸੱਟ ਵਾਲਾ ਪੈਰ ਲੋਕਾਂ ਨੂੰ ਵਿਖਾਉਣ ਲਈ ‘ਬਰਮੂਡਾ’ (ਨਿੱਕਰ) ਪਾਉਣੀ ਚਾਹੀਦੀ ਹੈ।
ਆਪਣੇ ਵਿਵਦਿਤ ਬਿਆਨਾਂ ਲਈਪਹਿਲਾਂ ਤੋਂ ਮਸ਼ਹੂਰ ਘੋਸ਼ ਦੇ ਇਸ ਬਿਆਨ ਵਿੱਚ ਕਿਸੇ ਦਾ ਨਾਮ ਨਹੀਂ ਲਿਆ ਗਿਆ, ਪਰ ਮੰਨਿਆ ਗਿਆ ਹੈ ਕਿ ਇਹ ਟਿੱਪਣੀ ਮਮਤਾ ਬੈਨਰਜੀ ਨੂੰ ਟਾਰਗੇਟ ਕਰਕੀਤੀ ਗਈ ਹੈ। ਵੀਡੀਓ ਵਿੱਚ ਘੋਸ਼ ਕੱਲ੍ਹ ਪੁਰੂਲੀਆ ਵਿੱਚ ਇੱਕ ਚੋਣ ਸਭਾ ਵਿੱਚ ਕਹਿੰਦੇ ਸੁਣੇ ਜਾ ਰਹੇ ਹਨ- ‘ਪਲਾਸਟਰ ਉਤਾਰੇ ਜਾਣ ਤੋਂ ਬਾਅਦ ਪੈਰ ਉੱਤੇ ਪੱਟੀ ਬੰਨ੍ਹ ਦਿੱਤੀ ਗਈ ਅਤੇ ਉਹ ਹਰ ਕਿਸੇ ਨੂੰ ਪੈਰ ਵਿਖਾ ਰਹੀ ਹੈ। ਉਹ ਅਜਿਹੀ ਸਾੜ੍ਹੀ ਪਹਿਨ ਰਹੀ ਹੈ ਕਿ ਇੱਕ ਪੈਰ ਢੱਕਿਆ ਹੋਇਆ ਅਤੇ ਦੂਜਾ ਵਿਖਾਉਣ ਲਈ ਖੁੱਲ੍ਹਾ ਰੱਖਿਆ ਹੈ। ਕਿਸੇ ਨੂੰ ਏਦਾਂ ਸਾੜ੍ਹੀ ਪਹਿਨੇ ਨਹੀਂ ਵੇਖਿਆ। ਜੇ ਉਨ੍ਹਾਂ ਨੇ ਵਿਖਾਉਣ ਲਈ ਪੈਰ ਦਾ ਪ੍ਰਦਰਸ਼ਨ ਕਰਨਾ ਹੈ ਤਾਂ ਬਰਮੂਡਾ ਸ਼ਾਰਟਸ ਪਾ ਸਕਦੀ ਹੈ। ਇਸ ਨਾਲ ਪੈਰ ਜ਼ਿਆਦਾ ਬਿਹਤਰ ਤਰੀਕੇ ਨਾਲ ਨਜ਼ਰ ਆਵੇਗਾ।ਘੋਸ਼ ਦੇ ਇਸ ਬਿਆਨ ਤੋਂ ਬਾਅਦ ਵਿਵਾਦ ਸ਼ੁਰੂ ਹੋ ਗਿਆ। ਤਿ੍ਰਣਮੂਲ ਕਾਂਗਰਸ ਨੇ ਬੰਗਾਲੀ ਵਿੱਚ ਕੀਤੇ ਇੱਕ ਟਵੀਟ ਵਿੱਚ ਕਿਹਾ: ਅਸੀਂ ਦਲੀਪ ਘੋਸ਼ ਤੋਂ ਇਨ੍ਹਾਂ ਘਟੀਆ ਟਿੱਪਣੀਆਂ ਦੀ ਆਸ ਕਰ ਸਕਦੇ ਹਾਂ ਅਤੇ ਬੰਗਾਲ ਦੀਆਂ ਮਾਵਾਂ ਅਤੇ ਭੈਣਾਂ ਮਮਤਾ ਬੈਨਰਜੀ ਦੀ ਇਸ ਬੇਇੱਜ਼ਤੀ ਦਾ ਦੋ ਮਈ ਨੂੰ ਯੋਗ ਜਵਾਬ ਦੇਣਗੀਆਂ।