ਅਹਿਮਦਾਬਾਦ, 24 ਫਰਵਰੀ, (ਪੋਸਟ ਬਿਊਰੋ)- ਭਾਰਤੀ ਦੌਰੇ ਉੱਤੇ ਆਏ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਤੇ ਉਨ੍ਹਾਂ ਦੀ ਪਤਨੀ ਮੇਲਾਨੀਆ ਨੇ ਅੱਜ ਪਹਿਲੇ ਦਿਨ ਗਾਂਧੀ ਆਸ਼ਰਮ ਦਾ ਦੌਰਾ ਕੀਤਾ ਅਤੇ ਇਸ ਦੌਰਾਨ ਚਰਖਾ ਕੱਤਿਆ। ਆਸ਼ਰਮ ਦੇਖਣ ਪਿੱਛੋਂ ਡੋਨਾਲਡ ਟਰੰਪ ਨੇ ਮੋਦੀ ਨੂੰ ਮਹਾਨ ਮਿੱਤਰ ਦੱਸਦਿਆਂ ਇਥੇ ਲਿਆਉਣ ਦੇ ਲਈ ਧੰਨਵਾਦ ਕੀਤਾ। ਮੋਦੀ ਨੇ ਉਨ੍ਹਾਂ ਨੂੰ ਮਹਾਤਮਾ ਗਾਂਧੀ ਦਾ ਸੰਦੇਸ਼ ਦਿੰਦਿਆਂ ਤਿੰਨ ਬਾਂਦਰਾਂ ਵਾਲੀ ਮੂਰਤੀ ਭੇਟ ਕੀਤੀ।
ਅਮਰੀਕੀ ਰਾਸ਼ਟਰਪਤੀ ਟਰੰਪ ਦੀ ਪਤਨੀ ਮੇਲਾਨੀਆ, ਧੀ ਇਵਾਂਕਾ ਤੇ ਦਾਮਾਦ ਜੇਅਰਡ ਕੁਸ਼ਨਰ ਦੇ ਦੌਰੇ ਦੌਰਾਨ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਇਕ ਵਾਰ ਫਿਰ ਗਾਈਡ ਦੀ ਭੂਮਿਕਾ ਵਿੱਚ ਨਜ਼ਰ ਆਏ। ਉਨ੍ਹਾਂ ਨੇ ਡੋਨਾਲਡ ਟਰੰਪ ਅਤੇ ਮੇਲਾਨੀਆ ਨੂੰ ਮਹਾਤਮਾ ਗਾਂਧੀ ਨਾਲ ਜੁੜੀਆਂ ਗੱਲਾਂ ਅਤੇ ਆਸ਼ਰਮ ਦੇ ਇਤਿਹਾਸ ਦੀ ਕਾਫੀਂ ਜਾਣਕਾਰੀ ਦਿੱਤੀ। ਇਸ ਤੋਂ ਪਹਿਲਾਂ ਨਰਿੰਦਰ ਮੋਦੀ ਚੀਨ ਦੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ, ਜਾਪਾਨ ਦੇ ਪ੍ਰਧਾਨ ਮੰਤਰੀ ਸ਼ਿੰਜੋ ਅਬੇ ਅਤੇ ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਦੇ ਦੌਰੇ ਦੌਰਾਨ ਵੀ ਗਾਈਡ ਦੀ ਭੂਮਿਕਾ ਨਿਭਾ ਚੁੱਕੇ ਹਨ। ਆਸ਼ਰਮ ਵਿੱਚ ਮੋਦੀ ਨੇ ਟਰੰਪ ਤੇ ਮੇਲਾਨੀਆ ਨੂੰ ਖਾਦੀ ਦਾ ਦੁਪੱਟਾ ਦੇ ਕੇ ਸਨਮਾਨਤ ਕੀਤਾ। ਇਸ ਤੋਂ ਬਾਅਦ ਟਰੰਪ ਨੂੰ ਭਾਰਤ ਸਰਕਾਰ ਵੱਲੋਂ ਮਹਾਤਮਾ ਗਾਂਧੀ ਦੇ ਤਿੰਨ ਬਾਂਦਰਾਂ ਵਾਲੀ ਮੂਰਤੀ ਭੇਟ ਕੀਤੀ। ਇਹ ਮੂਰਤੀ ਜਾਪਾਨ ਦੇ ਬੁੱਧ ਭਿਕਸ਼ੂ ਨੇ ਗਾਂਧੀ ਨੂੰ ਵਰਧਾ ਵਿੱਚ 1933 ਵਿੱਚ ਭੇਟ ਕੀਤੀ ਸੀ, ਜੋ ਇਹ ਸੰਦੇਸ਼ ਦਿੰਦੀ ਹੈ ਕਿ ਨਾ ਬੁਰਾ ਕਹੋ, ਨਾ ਬੁਰਾ ਸੁਣੋ ਤੇ ਨਾ ਬੁਰਾ ਦੇਖੋ।
ਬਾਅਦ ਵਿੱਚ ਦਿੱਲੀ ਆਉਣ ਤੋਂ ਪਹਿਲਾਂ ਡੋਨਾਲਡ ਟਰੰਪ ਅਤੇ ਉਨ੍ਹਾ ਸਾਰਾ ਪਰਵਾਰ ਆਗਰੇ ਵਿੱਚ ਤਾਜ ਮਹਿਲ ਵੇਖਣ ਲਈ ਗਿਆ ਅਤੇ ਸ਼ਾਮ ਤੱਕ ਅਗਲੇ ਪ੍ਰੋਗਰਾਮ ਲਈ ਦਿੱਲੀ ਜਾ ਪਹੁੰਚੇ।