ਆਕਲੈਂਡ, 13 ਜਨਵਰੀ (ਪੋਸਟ ਬਿਊਰੋ)- ਅਮਰੀਕਾ ਦੀ ਦਿੱਗਜ ਮਹਿਲਾ ਟੈਨਿਸ ਖ਼ਿਡਾਰਨ ਸੈਰੇਨਾ ਵਿਲੀਅਮਜ਼ ਨੇ ਕੱਲ੍ਹ ਨੂੰ ਡਬਲਿਊ ਟੀ ਏ ਆਕਲੈਂਡ ਕਲਾਸਿਕ ਫਾਈਨਲ 'ਚ ਹਮ-ਵਤਨ ਖਿਡਾਰਨ ਜੈਸਿਕਾ ਪੇਗੁਲਾ ਨੂੰ ਹਰਾ ਕੇ ਖ਼ਿਤਾਬ ਆਪਣੇ ਨਾਂਅ ਕੀਤਾ। ਸੈਰੇਨਾ ਨੇ ਟੂਰਨਾਮੈਂਟ ਵਿੱਚ ਮਿਲੀ ਖ਼ਿਤਾਬੀ ਜਿੱਤ ਦੀ ਇਨਾਮੀ ਰਾਸ਼ੀ ਆਸਟ੍ਰੇਲੀਆ ਦੇ ਜੰਗਲਾਂ 'ਚ ਲੱਗੀ ਅੱਗ ਦੇ ਪੀੜਤਾਂ ਨੂੰ ਦਾਨ ਕਰ ਦਿੱਤੀ ਹੈ।
ਵਰਨਣ ਯੋਗ ਹੈ ਕਿ ਸੇਰੇਨਾ ਨੇ ਇਸ ਤਰ੍ਹਾਂ ਤਿੰਨ ਸਾਲ ਦੇ ਖ਼ਿਤਾਬੀ ਸੋਕੇ ਨੂੰ ਸਮਾਪਤ ਕੀਤਾ ਅਤੇ ਇਸ ਮਹੀਨੇ ਹੋਣ ਵਾਲੇ ਸਾਲ ਦੇ ਪਹਿਲੇ ਗ੍ਰੈਂਡਸਲੈਮ ਆਸਟ੍ਰੇਲੀਅਨ ਓਪਨ ਲਈ ਉਮੀਦਾਂ ਵਧਾ ਦਿੱਤੀਆਂ, ਜਿਸ 'ਚ ਉਹ ਮਾਰਗਰੇਟ ਕੋਰਟ ਦੇ 24 ਗ੍ਰੈਂਡਸਲੈਮ ਖ਼ਿਤਾਬ ਦੀ ਬਰਾਬਰੀ ਕਰਨ ਦੀ ਕੋਸ਼ਿਸ਼ ਕਰੇਗੀ। ਸੈਰੇਨਾ ਨੇ ਪੇਗੁਲਾ ਨੂੰ ਲਗਾਤਾਰ ਸੈਂਟ 'ਚ 6-3, 6-4 ਨਾਲ ਮਾਤ ਦੇ ਕੇ 2017 ਵਿੱਚ ਮੈਲਬੌਰਨ 'ਚ ਆਸਟ੍ਰੇਲੀਅਨ ਓਪਨ 'ਚ ਹਾਸਲ ਕੀਤੇ ਖ਼ਿਤਾਬ ਤੋਂ ਬਾਅਦ ਇਹ ਉਨ੍ਹਾਂ ਦਾ ਪਹਿਲਾ ਖ਼ਿਤਾਬ ਹੈ। ਇਸ ਵਿੱਚ ਉਨ੍ਹਾਂ ਨੇ 43000 ਅਮਰੀਕੀ ਡਾਲਰ ਦਾ ਚੈਂਕ ਮਿਲਿਆ, ਜੋ ਉਨ੍ਹਾਂ ਨੇ ਆਸਟ੍ਰੇਲੀਆ ਦੇ ਲਈ ਰਾਹਤ ਕੋਸ਼ 'ਚ ਦਾਨ ਦੇ ਦਿੱਤਾ। ਸੇਰੇਨਾ ਨੇ ਕੈਰੋਲਿਨਾ ਵੋਜਿਨਿਆਕੀ ਨਾਲ ਜੋੜੀ ਦੇ ਫਾਈਨਲ 'ਚ ਜਗ੍ਹਾ ਬਣਾਈ ਸੀ ਪਰ ਉਨ੍ਹਾਂ ਨੂੰ ਆਸੀਆ ਮੁਹੰਮਦ ਅਤੇ ਟੇਲਰ ਟਾਊਨਸੈਂਡ ਖ਼ਿਲਾਫ਼ 4-6, 4-6 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਉਹ ਅੱਗੋਂ ਵੱਡੀ ਆਸ ਲਾਈ ਬੈਠੀ ਹੈ।