ਨਵੀਂ ਦਿੱਲੀ, 13 ਸਤੰਬਰ (ਪੋਸਟ ਬਿਊਰੋ)- ਪਹਿਲੇ ਦਰਜੇ ਵਾਲੀ ਭਾਰਤੀ ਬੈਡਮਿੰਟਨ ਖਿਡਾਰੀ ਪੀ ਵੀ ਸਿੰਧੂ ਨੇ ਕਿਹਾ ਕਿ ਵਿਸ਼ਵ ਚੈਂਪੀਅਨਸ਼ਿਪ ਦੇ ਸੋਨ ਤਮਗੇ ਨੇ ਰੀਓ ਉਲੰਪਿੰਕ ਨੂੰ ਛੱਡ ਕੇ ਪਿਛਲੇ ਸਾਰੇ ਫਾਈਨਲ ਵਿੱਚ ਹਾਰਨ ਦੇ ਜ਼ਖਮ ਭਰ ਦਿੱਤੇ ਹਨ। ਉਨ੍ਹਾਂ ਨੂੰ ਆਸ ਹੈ ਕਿ ਅਗਲੇ ਸਾਲ ਟੋਕੀਓ ਵਿੱਚ ਉਹ ਇਸ ਕਮੀ ਨੂੰ ਪੂਰਾ ਕਰ ਲਵੇਗੀ ਅਤੇ ਇਸ ਲਈ ਉਨ੍ਹਾਂ ਨੇ ਟਰਾਫੀਆਂ ਦੀ ਅਲਮਾਰੀ ਵਿੱਚ ਇਕ ਥਾਂ ਖਾਲੀ ਰੱਖੀ ਹੈ।
ਉਲੰਪਿਕ ਚਾਂਦੀ ਤਮਗਾ ਜੇਤੂ ਪੀ ਵੀ ਸਿੰਧੂ ਨੇ ਕਿਹਾ ਕਿ ਵਿਸ਼ਵ ਚੈਂਪੀਅਨਸ਼ਿਪ ਸੋਨ ਤਮਗਾ ਉਨ੍ਹਾਂ ਸਾਰੀਆਂ ਹਾਰਾਂ ਦੀ ਭਰਪਾਈ ਹੈ। ਲੋਕ ਫਾਈਨਲ ਵਿੱਚ ਹਾਰਨ ਦੇ ਮੇਰੇ ਡਰ ਬਾਰੇ ਗੱਲ ਕਰ ਰਹੇ ਹਨ ਕਿ ਫਾਈਨਲ ਵਿੱਚ ਕਿਸ ਤਰ੍ਹਾਂ ਦਬਾਅ ਵਿੱਚ ਆ ਜਾਂਦੀ ਹਾਂ। ਕਹਿ ਸਕਦੀ ਹਾਂ ਕਿ ਮੈਂ ਆਪਣੇ ਰੈਕੇਟ ਨਾਲ ਜਵਾਬ ਦਿੱਤਾ ਹੈ। ਉਲੰਪਿਕ ਪੂਰੀ ਤਰ੍ਹਾਂ ਅਲੱਗ ਹੈ। ਰੀਓ ਉਲੰਪਿਕ ਅਤੇ ਵਿਸ਼ਵ ਚੈਂਪੀਅਨਸ਼ਿਪ ਨੇ ਮੈਨੂੰ ਵੱਕ ਤਰ੍ਹਾਂ ਦੀਆਂ ਯਾਦਾਂ ਦਿੱਤੀਆਂ ਹਨ। ਇਕ ਸੋਨ ਤਮਗਾ ਹੋਰ ਜਿੱਤਣਾ ਹੈ। ਇਸ ਲਈ ਯਕੀਨੀ ਰੂਪ ਨਾਲ ਮੈਂ ਸਖਤ ਮਿਹਨਤ ਕਰਾਂਗੀ ਤੇ ਟੋਕੀਓ ਉਲੰਪਿਕ ਵਿੱਚ ਸੋਨ ਤਮਗਾ ਜਿੱਤਣ ਦੀ ਕੋਸ਼ਿਸ਼ ਕਰਾਂਗੀ। ਉਸ ਨੇ ਹੱਸਦੇ ਹੋਏ ਕਿਹਾ, ‘ਉਸ ਸੋਨ (ਉਲੰਪਿਕ ਤਮਗੇ) ਲਈ ਮੇਰੀ ਅਲਮਾਰੀ ਵਿੱਚ ਇਕ ਥਾਂ ਖਾਲੀ ਹੈ। ਉਲੰਪਿਕ ਕੁਆਲੀਫਿਕੇਸ਼ਨ ਚੱਲ ਰਹੇ ਹਨ ਅਤੇ ਇਸ ਜਿੱਤ ਨਾਲ ਅੱਗੇ ਵਧਣ ਲਈ ਮੇਰਾ ਆਤਮ ਵਿਸ਼ਵਾਸ ਵਧੇਗਾ। 2016 ਵਿੱਚ (ਰੀਓ) ਮੇਰਾ ਪਹਿਲਾਂ ਉਲੰਪਿਕ ਸੀ ਅਤੇ ਉਦੋਂ ਮੈਨੂੰ ਕੋਈ ਜਾਣਦਾ ਨਹੀਂ ਸੀ।
ਆਪਣੀ ਵਿਦੇਸ਼ੀ ਮਹਿਲਾ ਕੋਚ ਬਾਰੇ ਵਿੱਚ ਸਿੰਧੂ ਨੇ ਕਿਹਾ, ‘ਮੈਂ ਕਿਮ ਦੇ ਨਾਲ ਕੰਮ ਕਰ ਰਹੀ ਹਾਂ। ਉਨ੍ਹਾਂ ਨੇ ਮੇਰੇ ਵਿੱਚ ਕੁਝ ਬਦਲਾਅ ਲਿਆਂਦੇ ਹਨ ਤੇ ਇਸ ਨਾਲ ਮੈਨੂੰ ਕਾਫੀ ਮਦਦ ਮਿਲੀ ਹੈ। ਮੈਂ ਕੁਝ ਨਵੀਆਂ ਚੀਜ਼ਾਂ ਸਿੱਖਣੀਆਂ ਹਨ। ਮੈਨੂੰ ਨੈਟ ਪਲੇਅ ਉੱਤੇ ਕੰਮ ਕਰਨ ਦੀ ਜ਼ਰੂਰਤ ਹੈ।'