* 2.5 ਮਿਲੀਅਨ ਡਾਲਰ ਤੋਂ ਵੱਧ ਮੁੱਲ ਦੀਆਂ ਨਸ਼ੀਲੀਆਂ ਦਵਾਈਆਂ ਕੀਤੀਆਂ ਜ਼ਬਤ
ਟੋਰਾਂਟੋ, 11 ਜੂਨ (ਪੋਸਟ ਬਿਊਰੋ): ਓਂਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ ਨੇ ਇੱਕ ਡਰੱਗ ਰਿੰਗ ਦਾ ਪਰਦਫਾਸ਼ ਕੀਤਾ ਹੈ, ਜੋ ਕਥਿਤ ਤੌਰ 'ਤੇ ਡਾਰਕ ਵੈੱਬ ਅਤੇ ਕੈਨੇਡਾ ਪੋਸਟ ਨੂੰ ਦੇਸ਼ ਭਰ ਵਿੱਚ ਨਸ਼ੀਲੇ ਪਦਾਰਥਾਂ ਦੀ ਸਪਲਾਈ ਕਰਨ ਲਈ ਵਰਤਦਾ ਸੀ।ਮੰਗਲਵਾਰ ਨੂੰ ਕਾਨਫਰੰਸ ਵਿੱਚ ਪੁਲਿਸ ਨੇ ਐਲਾਨ ਕੀਤਾ ਕਿ ਉਨ੍ਹਾਂ ਨੇ ਸ਼ੱਕੀਆਂ ਦੇ ਇੱਕ ਸਮੂਹ ਤੋਂ 2.5 ਮਿਲੀਅਨ ਡਾਲਰ ਤੋਂ ਵੱਧ ਮੁੱਲ ਦੀਆਂ ਨਸ਼ੀਲੀਆਂ ਦਵਾਈਆਂ ਜ਼ਬਤ ਕੀਤੀਆਂ ਹਨ ਜੋ ਆਨਲਾਈਨ ਮਾਰਕੀਟਪਲੇਸ ਚਲਾਉਂਦੇ ਸਨ। ਜਾਂਚ ਤੋਂ ਪਤਾ ਲੱਗਾ ਕਿ ਆਰਡਰ ਦਿੱਤੇ ਗਏ ਸਨ, ਪੈਕ ਕੀਤੇ ਗਏ ਸਨ ਅਤੇ ਫਿਰ ਬ੍ਰਿਟਿਸ਼ ਕੋਲੰਬੀਆ, ਨੁਨਾਵੁਤ, ਅਲਬਰਟਾ, ਮੈਨੀਟੋਬਾ, ਓਨਟਾਰੀਓ, ਕਿਊਬਿਕ, ਨੋਵਾ ਸਕੋਸ਼ੀਆ, ਨਿਊ ਬਰੰਸਵਿਕ ਅਤੇ ਪ੍ਰਿੰਸ ਐਡਵਰਡ ਆਈਲੈਂਡ ਨੂੰ ਰਾਸ਼ਟਰੀ ਡਾਕ ਸੇਵਾ ਅਤੇ ਹੋਰ ਕੋਰੀਅਰਾਂ ਰਾਹੀਂ ਭੇਜੇ ਗਏ ਸਨ।
ਪੁਲਿਸ ਨੇ ਕਿਹਾ ਕਿ ਉਨ੍ਹਾਂ ਨੇ ਨਵੰਬਰ 2024 ਵਿੱਚ ਕਥਿਤ ਅਪਰਾਧਿਕ ਨੈੱਟਵਰਕ ਦੀ ਜਾਂਚ ਸ਼ੁਰੂ ਕੀਤੀ। 10 ਮਾਰਚ ਨੂੰ, ਓਪੀਪੀ ਅਧਿਕਾਰੀਆਂ ਨੇ ਓਟਾਵਾ ਵਿੱਚ ਇੱਕ ਕੈਨੇਡਾ ਪੋਸਟ ਸਥਾਨ 'ਤੇ ਦੋ ਸ਼ੱਕੀਆਂ ਨੂੰ ਗ੍ਰਿਫਤਾਰ ਕੀਤਾ ਅਤੇ ਵੱਖ-ਵੱਖ ਨਸ਼ੀਲੇ ਪਦਾਰਥਾਂ ਵਾਲੇ 86 ਪੈਕੇਜ ਜ਼ਬਤ ਕੀਤੇ ਜਿਨ੍ਹਾਂ ਬਾਰੇ ਪੁਲਿਸ ਦਾ ਕਹਿਣਾ ਹੈ ਕਿ ਦੇਸ਼ ਭਰ ਵਿੱਚ ਭੇਜੇ ਜਾਣ ਵਾਲੇ ਸਨ। ਫਿਰ ਓਟਾਵਾ ਖੇਤਰ ਵਿੱਚ ਚਾਰ ਸਰਚ ਵਾਰੰਟ ਲਾਗੂ ਕੀਤੇ ਜਿਸ ਕਾਰਨ ਉਨ੍ਹਾਂ ਨੂੰ 37 ਵੱਖ-ਵੱਖ ਗੈਰ-ਕਾਨੂੰਨੀ ਨਸ਼ੀਲੇ ਪਦਾਰਥਾਂ ਦੀਆਂ ਕੁੱਲ 27 ਕਿਲੋਗ੍ਰਾਮ ਅਤੇ 64 ਹਜ਼ਾਰ ਗੋਲੀਆਂ ਜ਼ਬਤ ਕਰਨ ਵਿੱਚ ਮਦਦ ਮਿਲੀ, ਨਾਲ ਹੀ 4 ਲੱਖ ਡਾਲਰ ਤੋਂ ਵੱਧ ਕੀਮਤ ਵਾਲੀ ਇੱਕ ਚੋਰੀ ਹੋਈ 2018 ਫੇਰਾਰੀ 488 ਸਪਾਈਡਰ ਕਨਵਰਟੀਬਲ, 7 ਲੱਖ 30 ਹਜ਼ਾਰ ਡਾਲਰ ਦੀ ਕੀਮਤ ਵਾਲੀਆਂ 11 ਹੋਰ ਚੋਰੀ ਹੋਈਆਂ ਗੱਡੀਆਂ, ਇੱਕ ਹੈਂਡਗਨ ਅਤੇ 95 ਹਜ਼ਾਰ ਡਾਲਰ ਨਕਦੀ ਜ਼ਬਤ ਕੀਤੀ ਗਈ।
ਓਪੀਪੀ ਕਮਿਸ਼ਨਰ ਥਾਮਸ ਕੈਰੀਕ ਨੇ ਕਿਹਾ ਕਿ ਇਹ ਛਾਪਾ ਡਾਰਕ ਵੈੱਬ 'ਤੇ ਵੇਚੇ ਜਾ ਰਹੇ ਖਤਰਨਾਕ ਨਸ਼ੀਲੇ ਪਦਾਰਥਾਂ ਦੀ ਚਿੰਤਾਜਨਕ ਮਾਤਰਾ ਦਾ ਪਰਦਾਫਾਸ਼ ਕਰਦਾ ਹੈ। ਪੁਲਿਸ ਡਾਰਕ ਵੈੱਬ ਨੂੰ ਇੰਟਰਨੈੱਟ ਦੇ ਇੱਕ ਲੁਕਵੇਂ ਹਿੱਸੇ ਵਜੋਂ ਦਰਸਾਉਂਦੀ ਹੈ, ਜੋ ਕਿ ਰਵਾਇਤੀ ਸਰਚ ਇੰਜਣਾਂ 'ਤੇ ਨਹੀਂ ਮਿਲ ਸਕਦਾ ਅਤੇ ਅਕਸਰ ਐਕਸੈੱਸ ਕਰਨ ਲਈ ਵਿਸ਼ੇਸ਼ ਸਾਫਟਵੇਅਰ ਦੀ ਲੋੜ ਹੁੰਦੀ ਹੈ। ਓਟਵਾ ਦੇ ਚਾਰ ਸ਼ੱਕੀ ਵਿਅਕਤੀਆਂ ਨੂੰ ਇਸ ਮਾਮਲੇ ਵਿਚ 85 ਦੋਸ਼ਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।