ਨਵੀਂ ਦਿੱਲੀ, 9 ਜੂਨ (ਪੋਸਟ ਬਿਊਰੋ): ਮਹਾਰਾਸ਼ਟਰ ਦੇ ਕਲਿਆਣ ਵਿੱਚ ਇੱਕ ਵੱਡਾ ਰੇਲ ਹਾਦਸਾ ਵਾਪਰਿਆ ਹੈ। ਦੱਸ ਦੇਈਏ ਕਿ ਇਹ ਰੇਲ ਹਾਦਸਾ ਸੋਮਵਾਰ 9 ਜੂਨ ਨੂੰ ਸਵੇਰੇ ਵਾਪਰਿਆ ਹੈ, ਇਹ ਹਾਦਸਾ ਉਦੋਂ ਵਾਪਰਿਆ ਜਦੋ ਕਲਿਆਣ ਜੰਕਸ਼ਨ `ਤੇ ਪੁਸ਼ਪਕ ਐਕਸਪ੍ਰੈੱਸ ਤੋਂ ਪੰਜ ਯਾਤਰੀ ਹੇਠਾਂ ਡਿੱਗ ਪਏ। ਦੱਸਿਆ ਜਾ ਰਿਹਾ ਹੈ ਕਿ ਜਦੋਂ ਰੇਲਗੱਡੀ ਕਲਿਆਣ ਜੰਕਸ਼ਨ `ਤੇ ਰੁਕੀ ਤਾਂ ਹਰ ਰੋਜ਼ ਦਫ਼ਤਰ ਜਾਣ ਵਾਲੇ ਲੋਕ ਇਸ ਵਿੱਚ ਚੜ੍ਹਨ ਲਈ ਭੱਜੇ ਆਏ। ਇਸ ਦੌਰਾਨ ਭਾਰੀ ਭੀੜ ਅਤੇ ਧੱਕਾ-ਮੁੱਕੀ ਕਾਰਨ ਇਹ ਹਾਦਸਾ ਵਾਪਰਿਆ।
ਦੱਸਿਆ ਜਾ ਰਿਹਾ ਹੈ ਕਿ ਇਹ ਲੋਕ ਆਪਣੇ-ਆਪਣੇ ਦਫ਼ਤਰਾਂ ਤੱਕ ਪਹੁੰਚਣ ਲਈ ਹਰ ਰੋਜ਼ ਰੇਲਗੱਡੀ ਰਾਹੀਂ ਯਾਤਰਾ ਕਰਦੇ ਹਨ। ਇਹ ਸਾਰੇ ਇਸ ਰੇਲਗੱਡੀ `ਤੇ ਚੜ੍ਹਦੇ ਹਨ ਅਤੇ ਛਤਰਪਤੀ ਸਿ਼ਵਾਜੀ ਟਰਮੀਨਲ (ਸੀਐਸਟੀ) ਵੱਲ ਜਾਂਦੇ ਹਨ। ਸੋਮਵਾਰ ਨੂੰ ਦਫ਼ਤਰੀ ਸਮੇਂ ਦੌਰਾਨ ਵਧਦੀ ਭੀੜ ਅਤੇ ਫਿਰ ਰੇਲਗੱਡੀ ਵਿੱਚ ਚੜ੍ਹਨ ਦੀ ਕਾਹਲੀ ਕਾਰਨ ਜ਼ਰੂਰ ਧੱਕਾ-ਮੁੱਕੀ ਹੋਈ ਹੋਵੇਗੀ, ਜਿਸ ਕਾਰਨ ਇਹ ਹਾਦਸਾ ਵਾਪਰਿਆ।
ਦੱਸ ਦੇਈਏ ਕਿ ਰੇਲਵੇ ਸਟੇਸ਼ਨ `ਤੇ ਇੱਕ ਰੇਲਗੱਡੀ ਤੋਂ ਲਗਭਗ 10 ਯਾਤਰੀ ਡਿੱਗ ਪਏ। ਇਨ੍ਹਾਂ ਵਿੱਚੋਂ 5 ਦੀ ਮੌਤ ਹੋ ਗਈ। ਸ਼ੱਕ ਹੈ ਕਿ ਇਹ ਯਾਤਰੀ ਰੇਲਗੱਡੀ ਦੇ ਗੇਟ `ਤੇ ਬੈਠੇ ਸਨ, ਜਿੱਥੋਂ ਉਹ ਡਿੱਗ ਪਏ। ਕੇਂਦਰੀ ਰੇਲਵੇ ਮਾਮਲੇ ਦੀ ਜਾਂਚ ਕਰ ਰਿਹਾ ਹੈ।