ਮਾਂਟਰੀਅਲ, 25 ਮਈ (ਪੋਸਟ ਬਿਊਰੋ) : ਏਅਰ ਕੈਨੇਡਾ ਵੱਲੋਂ ਵੀਰਵਾਰ ਨੂੰ ਕੰਪਿਊਟਰ ਸਿਸਟਮ ਵਿੱਚ ਆਈ ਦਿੱਕਤ ਕਾਰਨ ਆਪਣੇ ਜਹਾਜ਼ਾਂ ਨੂੰ ਉਡਾਨ ਨਹੀਂ ਭਰਨ ਦਿੱਤੀ ਗਈ। ਇਸ ਨਾਲ ਅੱਧੀਆਂ ਉਡਾਨਾਂ ਲੇਟ ਹੋ ਗਈਆਂ।
ਮਾਂਟਰੀਅਲ ਸਥਿਤ ਇਸ ਕੰਪਨੀ ਨੇ ਆਖਿਆ ਕਿ ਜਹਾਜ਼ਾਂ ਨਾਲ ਸੰਪਰਕ ਰੱਖਣ ਤੇ ਉਨ੍ਹਾਂ ਦੀ ਕਾਰਗੁਜ਼ਾਰੀ ਉੱਤੇ ਨਿਗਰਾਨੀ ਰੱਖਣ ਵਾਲੇ ਏਅਰਲਾਈਨ ਦੇ ਸਿਸਟਮ ਵਿੱਚ ਤਕਨੀਕੀ ਗੜਬੜੀ ਆ ਜਾਣ ਕਾਰਨ ਇੱਕ ਵਾਰੀ ਲਈ ਸਾਰਾ ਕੰਮਕਾਜ ਰੋਕਣਾ ਪਿਆ। ਵੀਰਵਾਰ ਦੁਪਹਿਰ ਨੂੰ ਏਅਰਲਾਈਨ ਦੇ ਬੁਲਾਰੇ ਪੀਟਰ ਫਿਟਜ਼ਪੈਟ੍ਰਿਕ ਨੇ ਆਖਿਆ ਕਿ ਸਿਸਟਮ ਵਿੱਚ ਇਸ ਗੜਬੜੀ ਕਾਰਨ ਜਹਾਜ਼ਾਂ ਨੂੰ ਉਡਾਨ ਭਰਨ ਵਿੱਚ ਥੋੜ੍ਹੀ ਦੇਰ ਹੋਈ ਪਰ ਹੁਣ ਸਿਸਟਮ ਨੌਰਮਲ ਹੋ ਰਿਹਾ ਹੈ ਤੇ ਅਹਿਤਿਆਤਨ ਅਪਣਾਏ ਜਾ ਰਹੇ ਮਾਪਦੰਡ ਹਟਾ ਲਏ ਗਏ ਹਨ।
ਟਰੈਕਿੰਗ ਸਰਵਿਸ ਫਲਾਈਟਅਵੇਅਰ ਅਨੁਸਾਰ ਵੀਰਵਾਰ ਰਾਤ ਤੱਕ ਏਅਰ ਕੈਨੇਡਾ ਦੀਆਂ 241 ਉਡਾਨਾਂ ਵਿੱਚ ਵਿਘਣ ਪਿਆ। ਬੁੱਧਵਾਰ ਨੂੰ 35 ਫੀ ਸਦੀ ਉਡਾਨਾਂ ਤੇ ਮੰਗਲਵਾਰ ਨੂੰ 30 ਫੀ ਸਦੀ ਉਡਾਨਾਂ ਵਿੱਚ ਦੇਰ ਹੋਈ। ਇਨ੍ਹਾਂ ਤੋਂ ਇਲਾਵਾ ਵੀਰਵਾਰ ਨੂੰ 19 ਉਡਾਨਾਂ ਹੋਰ ਰੱਦ ਹੋਈਆਂ।