ਨਵੀਂ ਦਿੱਲੀ, 24 ਜਨਵਰੀ (ਪੋਸਟ ਬਿਊਰੋ) – 95ਵੇਂ ਅਕੈਡਮੀ ਐਵਾਰਡਜ਼ ਲਈ ਨਾਮਜ਼ਦਗੀਆਂ ਦਾ ਐਲਾਨ ਕਰ ਦਿੱਤਾ ਗਿਆ ਹੈ ਅਤੇ ਉਮੀਦ ਮੁਤਾਬਕ ਫਿਲਮ ਆਰਆਰਆਰ ਦੇ ਗੀਤ 'ਨਾਟੂ ਨਾਟੂ' ਨੂੰ ਸਰਵੋਤਮ ਮੂਲ ਗੀਤ ਸ਼੍ਰੇਣੀ ਵਿੱਚ ਆਸਕਰ ਲਈ ਨਾਮਜ਼ਦ ਕੀਤਾ ਗਿਆ ਹੈ। ਦੱਸ ਦੇਈਏ ਕਿ ਇਸ ਗੀਤ ਨੇ ਇਸ ਕੈਟਾਗਰੀ ਵਿੱਚ ਗੋਲਡਨ ਗਲੋਬ ਵੀ ਜਿੱਤਿਆ ਹੈ। ਇਸ ਦੇ ਨਾਲ, ਆਰਆਰਆਰ ਆਸਕਰ ਵਿਚ ਜਾਣ ਲਈ ਭਾਰਤੀ ਫਿਲਮਾਂ ਦੇ ਚੋਣਵੇਂ ਸਮੂਹ ਵਿਚ ਸ਼ਾਮਲ ਹੋ ਗਈ ਹੈ। ਮਦਰ ਇੰਡੀਆ, ਸਲਾਮ ਬੰਬੇ ਅਤੇ ਲਗਾਨ ਨੂੰ ਸਰਵੋਤਮ ਅੰਤਰਰਾਸ਼ਟਰੀ ਫੀਚਰ ਫਿਲਮ ਸ਼੍ਰੇਣੀ ਵਿੱਚ ਨਾਮਜ਼ਦ ਕੀਤਾ ਗਿਆ ਸੀ। ਆਸਕਰ ਲਈ ਨਾਮਜ਼ਦਗੀਆਂ ਦਾ ਐਲਾਨ ਅਦਾਕਾਰ ਰਿਜ਼ ਅਹਿਮਦ ਅਤੇ ਐਲੀਸਨ ਵਿਲੀਅਮਜ਼ ਦੁਆਰਾ ਕੀਤਾ ਗਿਆ ਸੀ। 95ਵਾਂ ਅਕੈਡਮੀ ਐਵਾਰਡ 12 ਮਾਰਚ ਨੂੰ ਲਾਸ ਏਂਜਲਸ ਵਿੱਚ ਹੋਵੇਗਾ।
ਤੁਹਾਨੂੰ ਦੱਸ ਦੇਈਏ ਕਿ ਦੱਖਣ ਭਾਰਤੀ ਸਿਨੇਮਾ ਦੀ ਫਿਲਮ ‘ਆਰਆਰਆਰ` ਨੇ ਪੂਰੀ ਦੁਨੀਆ 'ਚ ਕਾਫੀ ਸੁਰਖੀਆਂ ਵਟੋਰੀਆਂ ਹਨ। ਪਿਛਲੇ ਦਿਨੀਂ ਇਸ ਫ਼ਿਲਮ ਦੇ ਗੀਤ ‘ਨਾਟੂ-ਨਾਟੂ’ ਨੇ ਗੋਲਡਨ ਗਲੋਬ ਐਵਾਰਡ ਜਿੱਤ ਕੇ ਭਾਰਤੀ ਸਿਨੇਮਾ ਵਿੱਚ ਇਤਿਹਾਸ ਰਚ ਦਿੱਤਾ ਸੀ। ਇਸ ਗੀਤ ਲਈ ਮਿਊਜ਼ਿਕ ਡਾਇਰੈਕਟਰ ਐਮ ਐਮ ਕੀਰਵਾਨੀ ਨੂੰ ਇਹ ਇਤਿਹਾਸਕ ਐਵਾਰਡ ਦਿੱਤਾ ਗਿਆ। ਗੀਤ ਨਾਟੂ-ਨਾਟੂ ਤੇਲਗੂ ਵਿਚ ਲਿਿਖਆ ਗਿਆ ਸੀ, ਪਰ ਬਾਅਦ ਵਿੱਚ 'ਨਾਚੋ ਨਾਚੋ' ਨਾਮ ਹੇਠ ਹਿੰਦੀ ਲਈ ਬਣਾਇਆ ਗਿਆ ਸੀ। ਆਰਆਰਆਰ ਫਿਲਮ ਪਿਛਲੇ ਸਾਲ ਦੁਨੀਆ ਭਰ ਦੇ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਹੋਈ ਸੀ। ਫਿਲਮ ਨੂੰ 'ਗੋਲਡਨ ਗਲੋਬ ਅਵਾਰਡਸ 2023' ਦੀਆਂ ਦੋ ਸ਼੍ਰੇਣੀਆਂ 'ਚ ਸਰਵੋਤਮ ਮੂਲ ਗੀਤ ਅਤੇ ਸਰਵੋਤਮ ਗੈਰ-ਇੰਗਲਿਸ਼ ਫਿਲਮ ਲਈ ਨਾਮਜ਼ਦ ਕੀਤਾ ਗਿਆ ਸੀ। ਬਾਅਦ ਵਿੱਚ ਇਹ ਫਿਲਮ ਇੱਕ ਪੁਰਸਕਾਰ ਜਿੱਤਣ ਵਿੱਚ ਸਫਲ ਰਹੀ।