ਟੋਰਾਂਟੋ, 5 ਦਸੰਬਰ (ਪੋਸਟ ਬਿਊਰੋ) : ਇੱਕ ਮਨੁੱਖੀ ਅਧਿਕਾਰੀ ਸੰਸਥਾ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਦੁਨੀਆਂ ਭਰ ਵਿੱਚ ਦਰਜਨਾਂ ਅਜਿਹੇ ਪੁਲਿਸ ਸਰਵਿਸ ਸੈਂਟਰ ਮਿਲੇ ਹਨ ਜਿਹੜੇ ਕਥਿਤ ਤੌਰ ਉੱਤੇ ਚੀਨ ਵੱਲੋਂ ਚਲਾਏ ਜਾ ਰਹੇ ਹਨ। ਇਨ੍ਹਾਂ ਵਿੱਚੋਂ ਹੀ ਘੱਟੋ ਘੱਟ ਦੋ ਅਜਿਹੇ ਹਨ ਜਿਹੜੇ ਕੈਨੇਡਾ ਵਿੱਚ ਹਨ।
ਸੋਮਵਾਰ ਨੂੰ ਜਾਰੀ ਕੀਤੀ ਗਈ ਨਵੀਂ ਰਿਪੋਰਟ ਵਿੱਚ ਸਪੇਨ ਸਥਿਤ ਗੈਰ ਸਰਕਾਰੀ ਸੰਸਥਾ ਸੇਫਗਾਰਡ ਡਿਫੈਂਡਰਜ਼ ਨੇ ਆਖਿਆ ਕਿ ਉਨ੍ਹਾਂ ਵੱਲੋਂ ਪੀਪਲਜ਼ ਰਿਪਬਲਿਕ ਆਫ ਚਾਈਨਾ ਦੇ ਅਧਿਕਾਰੀਆਂ, ਚੀਨੀ ਪੁਲਿਸ ਤੇ ਸਟੇਟ ਮੀਡੀਆ ਦੇ ਖੁੱਲ੍ਹੇ ਬਿਆਨ ਦੀ ਵਰਤੋਂ ਕਰਕੇ ਹੀ ਇਸ ਗੱਲ ਦਾ ਪਤਾ ਲਾਇਆ ਗਿਆ ਹੈ ਕਿ ਇਸ ਤਰ੍ਹਾਂ ਦੇ ਪੁਲਿਸ ਸਟੇਸ਼ਨ ਹੋਰਨਾਂ ਮੁਲਕਾਂ ਵਿੱਚ ਸਥਿਤ ਹਨ।ਇਸ ਦਾ ਖੁਲਾਸਾ ਸਪੇਨ ਦੀ ਇਸ ਸੰਸਥਾ ਵੱਲੋਂ ਪੈਟਰੋਲ ਐਂਡ ਪਰਸੂਏਡ ਨਾਂ ਦੀ ਰਿਪੋਰਟ ਵਿੱਚ ਕੀਤਾ।
ਸਤੰਬਰ ਵਿੱਚ ਵੀ ਇਸ ਤਰ੍ਹਾਂ ਦੇ 54 ਸਟੇਸ਼ਨਜ਼ ਹੋਣ ਦਾ ਪਤਾ ਲੱਗਿਆ ਸੀ, ਇਸ ਨਾਲ 53 ਦੇਸ਼ਾਂ ਵਿੱਚ ਇਸ ਤਰ੍ਹਾਂ ਦੇ ਸਟੇਸ਼ਨਾਂ ਦੀ ਕੁੱਲ ਗਿਣਤੀ 102 ਤੱਕ ਅੱਪੜ ਗਈ ਹੈ। ਸੇਫਗਾਰਡ ਡਿਫੈਂਡਰਜ਼ ਨੇ ਆਖਿਆ ਕਿ ਕੁੱਝ ਮੇਜ਼ਬਾਨ ਮੁਲਕਾਂ ਵੱਲੋਂ ਵੀ ਇਸ ਤਰ੍ਹਾਂ ਦੇ ਸੈਂਟਰ ਖੋਲ੍ਹਣ ਵਿੱਚ ਸਹਿਯੋਗ ਕੀਤਾ ਗਿਆ ਹੈ। ਇਹ ਵੀ ਦੋਸ਼ ਲਾਇਆ ਗਿਆ ਹੈ ਕਿ ਇਨ੍ਹਾਂ ਸਟੇਸ਼ਨਾਂ ਰਾਹੀਂ ਉਨ੍ਹਾਂ ਚੀਨੀ ਨਾਗਰਿਕਾਂ ਨੂੰ ਨਿਸ਼ਾਨਾ ਬਣਾਇਆ ਜਾਂਦਾ ਹੈ ਜਿਹੜੇ ਵਿਦੇਸ਼ਾਂ ਵਿੱਚ ਰਹਿ ਰਹੇ ਹਨ ਤੇ ਖਾਸਤੌਰ ਉੱਤੇ ਜਿਨ੍ਹਾਂ ਨੇ ਚੀਨ ਵਿੱਚ ਕੋਈ ਜੁਰਮ ਕੀਤਾ ਹੁੰਦਾ ਹੈ ਤੇ ਉਨ੍ਹਾਂ ਨੂੰ ਦੇਸ਼ ਪਰਤਣ ਲਈ ਮਜਬੂਰ ਵੀ ਕੀਤਾ ਜਾਂਦਾ ਹੈ।
ਸੇਫਗਾਰਡ ਡਿਫੈਂਡਰਜ਼ ਦੀ ਰਿਪੋਰਟ ਅਨੁਸਾਰ ਅਜਿਹੇ ਤਿੰਨ ਪੁਲਿਸ ਸਟੇਸ਼ਨਾਂ ਦੀ ਪੁਸ਼ਟੀ ਪਹਿਲਾਂ ਜੀਟੀਏ ਵਿੱਚ ਹੋਈ, ਜਿਹੜੇ ਚੀਨ ਦੇ ਸ਼ਹਿਰ ਫੁਜੋਊ ਤੋਂ ਆਪਰੇਟ ਕੀਤੇ ਜਾ ਰਹੇ ਹਨ। ਇੱਕ ਹੋਰ ਨਵੇਂ ਸੈਂਟਰ ਦੀ ਪੁਸ਼ਟੀ ਵੈਨਕੂਵਰ ਵਿੱਚ ਹੋਈ ਹੈ ਤੇ ਇਹ ਵੈਨਜ਼ੋਊ ਤੋਂ ਆਪਰੇਟ ਕੀਤਾ ਜਾ ਰਿਹਾ ਹੈ। ਇੱਕ ਹੋਰ ਅਜਿਹਾ ਹੀ ਪੁਲਿਸ ਸਟੇਸ਼ਨ ਹੈ ਜਿਸ ਨੂੰ ਨੈਨਤੌਂਗ ਤੋਂ ਆਪਰੇਟ ਕੀਤਾ ਜਾ ਰਿਹਾ ਹੈ।ਆਰਸੀਐਮਪੀ ਵੱਲੋਂ ਸੋਮਵਾਰ ਨੂੰ ਆਖਿਆ ਗਿਆ ਕਿ ਇਸ ਤਥਾ-ਕਥਿਤ ਪੁਲਿਸ ਸਟੇਸ਼ਨਜ਼ ਤੋਂ ਕਿਸੇ ਕਿਸਮ ਦੀ ਮੁਜਰਮਾਨਾਂ ਗਤੀਵਿਧੀ ਤਾਂ ਨਹੀਂ ਚਲਾਈ ਜਾ ਰਹੀ ਇਸ ਮਾਮਲੇ ਦੀ ਉਨ੍ਹਾਂ ਵੱਲੋਂ ਜਾਂਚ ਕੀਤੀ ਜਾ ਰਹੀ ਹੈ। ਪਰ ਇਸ ਸਬੰਧੀ ਹੋਰ ਵੇਰਵੇ ਮੁਹੱਈਆ ਨਹੀਂ ਕਰਵਾਏ ਗਏ।
ਜਦੋਂ ਅਕਤੂਬਰ ਦੇ ਅੰਤ ਵਿੱਚ ਇਸ ਤਰ੍ਹਾਂ ਦੇ ਸਟੇਸ਼ਨਜ਼ ਦੀ ਖਬਰ ਸਾਹਮਣੇ ਆਈ ਸੀ ਤਾਂ ਚੀਨ ਵੱਲੋਂ ਇਹ ਆਖਿਆ ਗਿਆ ਸੀ ਕਿ ਇਹ ਸਟੇਸ਼ਨ ਚੀਨੀ ਲੋਕਾਂ ਦੇ ਡਰਾਈਵਰ ਲਾਇਸੰਸ ਆਦਿ ਨੰਵਿਆਉਣ ਲਈ ਚਲਾਏ ਜਾ ਰਹੇ ਹਨ ਕਿਉਂਕਿ ਬਹੁਤੇ ਚੀਨੀ ਲੋਕ ਕੋਵਿਡ-19 ਮਹਾਂਮਾਰੀ ਦੀਆਂ ਪਾਬੰਦੀਆਂ ਕਾਰਨ ਚੀਨ ਨਹੀਂ ਪਰਤ ਪਾਏ। ਇਹ ਵੀ ਆਖਿਆ ਗਿਆ ਸੀ ਕਿ ਜਿਹੜੇ ਲੋਕਲ ਵਾਲੰਟੀਅਰਜ਼ ਇਨ੍ਹਾਂ ਸਟੇਸ਼ਨਜ਼ ਉੱਤੇ ਕੰਮ ਕਰਦੇ ਹਨ ਉਹ ਚੀਨੀ ਪੁਲਿਸ ਅਧਿਕਾਰੀ ਨਹੀਂ ਹਨ।