ਓਨਟਾਰੀਓ, 1 ਦਸੰਬਰ (ਪੋਸਟ ਬਿਊਰੋ) : ਅਦਾਲਤ ਵੱਲੋਂ ਪਬਲਿਕ ਸੈਕਟਰ ਵਰਕਰਜ਼ ਦੀਆਂ ਤਨਖਾਹਾਂ ਨੂੰ ਸੀਮਤ ਹੱਦ ਤੱਕ ਵਧਾਉਣ ਵਾਲੇ ਕਾਨੂੰਨ ਨੂੰ ਰੱਦ ਕਰ ਦਿੱਤੇ ਜਾਣ ਤੋਂ ਬਾਅਦ ਓਨਟਾਰੀਓ ਦੇ ਪ੍ਰੀਮੀਅਰ ਦਾ ਕਹਿਣਾ ਹੈ ਕਿ ਉਹ ਨੌਟਵਿਦਸਟੈਂਡਿੰਗ ਕਲਾਜ਼ ਦੀ ਵਰਤੋਂ ਨਹੀਂ ਕਰਨਗੇ।
ਪਰ ਪ੍ਰੀਮੀਅਰ ਡੱਗ ਫੋਰਡ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੀ ਸਰਕਾਰ ਇਸ ਹਫਤੇ ਦੇ ਸ਼ੁਰੂ ਵਿੱਚ ਅਦਾਲਤ ਵੱਲੋਂ ਸੁਣਾਏ ਗਏ ਇਸ ਫੈਸਲੇ ਦੇ ਖਿਲਾਫ ਅਪੀਲ ਕਰਨ ਬਾਰੇ ਜ਼ਰੂਰ ਵਿਚਾਰ ਕਰ ਰਹੀ ਹੈ। ਫੋਰਡ ਨੇ ਆਖਿਆ ਕਿ ਇਹ ਫੈਸਲਾ ਕਾਫੀ ਦਿਲਚਸਪ ਲੱਗਿਆ ਤੇ ਉਹ ਇੱਕ ਵਾਰੀ ਇਸ ਪ੍ਰਕਿਰਿਆ ਰਾਹੀਂ ਲੰਘਣਾ ਚਾਹੁੰਦੇ ਹਨ।ਦੂਜੇ ਪਾਸੇ ਲਿਬਰਲਾਂ ਦੇ ਅੰਤਰਿਮ ਆਗੂ ਜੌਹਨ ਫਰੇਜ਼ਰ ਵੱਲੋਂ ਪ੍ਰੋਵਿੰਸ਼ੀਅਲ ਸਰਕਾਰ ਦੇ ਅਪੀਲ ਕਰਨ ਦੇ ਇਸ ਫੈਸਲੇ ਨੂੰ ਬੇਵਕੂਫਾਨਾ ਦੱਸਿਆ ਜਾ ਰਿਹਾ ਹੈ।
ਫਰੇਜ਼ਰ ਨੇ ਆਖਿਆ ਕਿ ਪਹਿਲਾਂ ਤੁਸੀਂ ਦੁਨੀਆ ਭਰ ਤੋਂ ਹੈਲਥ ਕੇਅਰ ਖੇਤਰ ਲਈ ਵਰਕਰਜ਼ ਨੂੰ ਆਕਰਸਿ਼ਤ ਕਰਦੇ ਹੋਂ ਤੇ ਬਾਅਦ ਵਿੱਚ ਕਿਸੇ ਵੀ ਸਮੇਂ ਤੁਸੀਂ ਇਹ ਆਖ ਦਿੰਦੇ ਹੋਂ ਕਿ ਅਸੀਂ ਤੁਹਾਡੇ ਭੱਤੇ ਸੀਮਤ ਕਰ ਸਕਦੇ ਹਾਂ। ਜਦੋਂ ਹਾਲਾਤ ਨਾਜ਼ੁਕ ਹੋਣ ਤਾਂ ਇਸ ਤਰ੍ਹਾਂ ਦੇ ਫੈਸਲੇ ਕਰਨਾ ਕੋਈ ਸਮਝਦਾਰੀ ਨਹੀਂ ਹੈ।