ਵੈਨਕੂਵਰ, 28 ਨਵੰਬਰ (ਪੋਸਟ ਬਿਊਰੋ) : ਅੱਜ ਸਵੇਰੇ ਵੈਨਕੂਵਰ ਵਿੱਚ ਵਿਦੇਸ਼ ਮੰਤਰੀ ਮਿਲੇਨੀ ਜੋਲੀ ਨੇ ਐਲਾਨ ਕੀਤਾ ਕਿ ਕੈਨੇਡਾ ਸਰਕਾਰ ਨਵੀਂ ਇੰਡੋ-ਪੈਸੇਫਿਕ ਸਟਰੈਟੇਜੀ ਲਿਆ ਰਹੀ ਹੈ ਜਿਸ ਨਾਲ ਅਗਲੇ ਪੰਜ ਸਾਲਾਂ ਵਿੱਚ ਸਾਡੇ ਕੋਲ 2·3 ਬਿਲੀਅਨ ਡਾਲਰ ਦਾ ਨਿਵੇਸ਼ ਆਵੇਗਾ। ਇਸ ਨਾਲ ਕੈਨੇਡਾ ਦੇ ਇੰਡੋ-ਪੈਸੇਫਿਕ ਰੀਜਨ ਨਾਲ ਸਬੰਧ ਹੋਰ ਮਜ਼ਬੂਤ ਹੋਣਗੇ। ਇਸ ਯੋਜਨਾ ਵਿੱਚ ਸਮਾਜ ਦਾ ਹਰ ਖੇਤਰ ਸ਼ਾਮਲ ਹੈ।
ਇੰਡੋ-ਪੈਸੇਫਿਕ ਰਣਨੀਤੀ ਦੇ ਪੰਜ ਮੁੱਖ ਟੀਚੇ ਹਨ :
· ਸ਼ਾਂਤੀ, ਲਚੀਲਾਪਨ ਤੇ ਸਕਿਊਰਿਟੀ
· ਵਪਾਰ, ਨਿਵੇਸ਼ ਵਿੱਚ ਪਸਾਰ ਤੇ ਸਪਲਾਈ ਚੇਨ ਵਿੱਚ ਲਚੀਲਾਪਨ
· ਨਿਵੇਸ਼ ਕਰਨਾ ਤੇ ਲੋਕਾਂ ਨੂੰ ਜੋੜਨਾ
· ਸਥਿਰ ਤੇ ਗ੍ਰੀਨ ਭਵਿੱਖ ਦਾ ਨਿਰਮਾਣ
· ਕੈਨੇਡਾ ਨੂੰ ਇੰਡੋ-ਪੈਸੇਫਿਕ ਵਿੱਚ ਸਰਗਰਮ ਤੇ ਸਮਰਪਿਤ ਭਾਈਵਾਲ ਬਣਾਉਣਾ
ਅੱਜ ਸ਼ਾਮ ਬਰੈਂਪਟਨ ਸੈਂਟਰ ਤੋਂ ਐਮਪੀ ਸ਼ਫਕਤ ਅਲੀ ਨੇ ਦੇਸੀ ਮੀਡੀਆ ਤੇ ਕਮਿਊਨਿਟੀ ਸਟੇਕਹੋਲਡਰਜ਼ ਨਾਲ ਆਪਣੇ ਹਲਕੇ ਦੇ ਆਫਿਸ ਵਿੱਚ ਗੋਲ ਟੇਬਲ ਮੀਟਿੰਗ ਕੀਤੀ। ਇਸ ਮੀਟਿੰਗ ਵਿੱਚ ਵਿਦੇਸ਼ ਮੰਤਰੀ ਦੇ ਪਾਰਲੀਆਮੈਂਟਰੀ ਸਕੱਤਰ ਐਮਪੀ ਮਨਿੰਦਰ ਸਿੱਧੂ, ਐਮਪੀ ਸੋਨੀਆ ਸਿੱਧੂ ਤੇ ਐਮਪੀ ਰੂਬੀ ਸਹੋਤਾ ਨੇ ਵੀ ਹਿੱਸਾ ਲਿਆ। ਇਸ ਐਲਾਨ ਬਾਰੇ ਐਮਪੀ ਮਨਿੰਦਰ ਸਿੱਧੂ ਨੇ ਮੀਡੀਆ ਨੂੰ ਅਪਡੇਟ ਕੀਤਾ।
ਅੱਜ ਵਾਲੀ ਮੀਡੀਆ ਮੀਟਿੰਗ ਇਸਲਾਮਾਬਾਦ, ਪਾਕਿਸਤਾਨ ਵਿੱਚ ਵੀਜ਼ਾ ਪ੍ਰੋਸੈਸਿੰਗ ਸੈਂਟਰ ਖੋਲ੍ਹਣ ਲਈ ਕੈਨੇਡਾ ਵੱਲੋਂ ਕੀਤੇ ਜਾਣ ਵਾਲੇ ਨਿਵੇਸ਼ ਉੱਤੇ ਕੇਂਦਰਿਤ ਸੀ। ਇੰਡੋ-ਪੈਸੇਫਿਕ ਰੀਜਨ, ਜਿਸ ਵਿੱਚ ਇਸਲਾਮਾਬਾਦ, ਨਵੀਂ ਦਿੱਲੀ, ਚੰਡੀਗੜ੍ਹ ਤੇ ਮਨੀਲਾ ਸ਼ਾਮਲ ਹਨ, ਵਿੱਚ ਕੈਨੇਡਾ ਦੇ ਸੈਂਟਰਲਾਈਜ਼ਡ ਨੈੱਟਵਰਕ ਦੇ ਅੰਦਰ ਵੀਜ਼ਾ ਪ੍ਰੋਸੈਸਿੰਗ ਕਪੈਸਿਟੀ ਨੂੰ ਵਧਾਉਣ ਲਈ 74·6 ਮਿਲੀਅਨ ਡਾਲਰ ਨਿਵੇਸ਼ ਕੀਤੇ ਜਾਣਗੇ।
ਇਸ ਤੋਂ ਇਲਾਵਾ ਐਮਪੀ ਅਲੀ ਨੇ ਇੰਡੋ-ਪੈਸੇਫਿਕ ਰਣਨੀਤੀ ਦੇ ਕੈਨੇਡਾ ਵਿੱਚ ਵੱਸਦੀ ਪਾਕਿਸਤਾਨੀ ਕਮਿਊਨਿਟੀ ਤੇ ਸਾਊਥ ਅਤੇ ਸਾਊਥਈਸਟ ਏਸ਼ੀਅਨ ਕਮਿਊਨਿਟੀ ਉੱਤੇ ਪੈਣ ਵਾਲੇ ਪ੍ਰਭਾਵ ਬਾਰੇ ਵੀ ਵਿਚਾਰ ਵਟਾਂਦਰਾ ਕੀਤਾ। ਉਨ੍ਹਾਂ ਮੀਡੀਆ ਤੇ ਸਟੇਕਹੋਲਡਰਜ਼ ਦਾ ਧੰਨਵਾਦ ਵੀ ਕੀਤਾ।