ਓਨਟਾਰੀਓ, 20 ਨਵੰਬਰ (ਪੋਸਟ ਬਿਊਰੋ) : ਐਤਵਾਰ ਦੁਪਹਿਰ ਨੂੰ ਓਨਟਾਰੀਓ ਸਰਕਾਰ ਤੇ ਐਜੂਕੇਸ਼ਨ ਵਰਕਰਜ਼ ਦਰਮਿਆਨ ਸਮਝੌਤਾ ਸਿਰੇ ਚੜ੍ਹਨ ਤੋਂ ਬਾਅਦ ਹੜਤਾਲ ਦਾ ਖਤਰਾ ਟਲ ਗਿਆ।
ਫੋਰਡ ਸਰਕਾਰ ਤੇ ਕੈਨੇਡੀਅਨ ਯੂਨੀਅਨ ਆਫ ਪਬਲਿਕ ਇੰਪਲੌਈਜ਼ (ਕੂਪ) ਦਰਮਿਆਨ ਵੀਕੈਂਡ ਉੱਤੇ ਚੱਲੀ ਗੱਲਬਾਤ ਤੋਂ ਬਾਅਦ ਹੀ ਇਹ ਸਮਝੌਤਾ ਸਿਰੇ ਚੜ੍ਹ ਸਕਿਆ। ਇਸ ਮਗਰੋਂ ਯੂਨੀਅਨ ਦੀ ਬਾਰਗੇਨਿੰਗ ਟੀਮ ਨੇ ਆਖਿਆ ਕਿ ਕੱਲ੍ਹ ਸਵੇਰੇ ਕੋਈ ਹੜਤਾਲ ਨਹੀਂ ਹੋਵੇਗੀ।ਉਨ੍ਹਾਂ ਆਖਿਆ ਕਿ ਸਾਡੇ ਸਾਰੇ ਮੈਂਬਰ ਸਵੇਰ ਤੋਂ ਸਕੂਲ ਆਉਣਗੇ ਤੇ ਪੜ੍ਹਾਈ ਵਿੱਚ ਬੱਚਿਆਂ ਦੀ ਮਦਦ ਕਰਨਗੇ।ਇਸ ਡੀਲ ਦੀ ਕੂਪ ਮੈਂਬਰਾਂ ਵੱਲੋਂ ਪੁਸ਼ਟੀ ਕੀਤੀ ਜਾਣੀ ਬਹੁਤ ਜ਼ਰੂਰੀ ਹੈ। ਇਸ ਸਬੰਧ ਵਿੱਚ ਵੋਟਿੰਗ ਵੀਰਵਾਰ ਨੂੰ ਸ਼ੁਰੂ ਹੋਵੇਗੀ ਤੇ ਅਗਲੇ ਹਫਤੇ ਤੱਕ ਮੁਕੰਮਲ ਹੋ ਜਾਵੇਗੀ।
ਕੂਪ ਦੇ ਓਨਟਾਰੀਓ ਸਕੂਲ ਬੋਰਡ ਕਾਊਂਸਲ ਆਫ ਯੂਨੀਅਨ (ਓਐਸਬੀਸੀਯੂ) ਦੀ ਪ੍ਰੈਜ਼ੀਡੈਂਟ ਲੌਰਾ ਵਾਲਟਨ ਵੱਲੋਂ ਇਸ ਗੱਲ ਦੀ ਪੁਸ਼ਟੀ ਕੀਤੀ ਗਈ ਹੈ ਕਿ ਗੱਲਬਾਤ ਦੇ 170 ਦਿਨਾਂ ਬਾਅਦ ਟੀਮ ਇਸ ਸਮਝੌਤੇ ਉੱਤੇ ਪਹੁੰਚੀ ਹੈ। ਹਾਲਾਂਕਿ ਇਸ ਬਾਰੇ ਅਜੇ ਕੋਈ ਖੁਲਾਸਾ ਨਹੀਂ ਕੀਤਾ ਗਿਆ ਕਿ ਇਸ ਡੀਲ ਵਿੱਚ ਕੀ ਕੀ ਤੈਅ ਹੋਇਆ ਹੈ।
ਵਾਲਟਨ ਅਨੁਸਾਰ ਸਰਕਾਰ ਵੱਲੋਂ ਨਵੀਆਂ ਸੇਵਾਵਾਂ ਲਈ ਕੋਈ ਨਵੇਂ ਪੈਸੇ ਦੇਣ ਦਾ ਵਾਅਦਾ ਨਹੀਂ ਕੀਤਾ ਗਿਆ। ਉਨ੍ਹਾਂ ਆਖਿਆ ਕਿ ਉਨ੍ਹਾਂ ਨੂੰ ਇਹ ਡੀਲ ਪਸੰਦ ਨਹੀਂ ਆਈ। ਵਾਲਟਨ ਨੇ ਆਖਿਆ ਕਿ ਸੈਂਟਰਲ ਬਾਰਗੇਨਿੰਗ ਟੀਮ ਨੇ ਉਨ੍ਹਾਂ ਨੂੰ ਡੀਲ ਸਵੀਕਾਰਨ ਲਈ ਆਖਿਆ ਤੇ ਇਸ ਲਈ ਉਨ੍ਹਾਂ ਵੱਲੋਂ ਇਹ ਡੀਲ ਸਵੀਕਾਰੀ ਜਾ ਰਹੀ ਹੈ।ਜਿ਼ਕਰਯੋਗ ਹੈ ਕਿ ਜੇ ਕੂਪ ਮੈਂਬਰਾਂ ਵੱਲੋਂ ਇਸ ਡੀਲ ਉੱਤੇ ਮੋਹਰ ਨਹੀਂ ਲਾਈ ਜਾਂਦੀ ਤਾਂ ਯੂਨੀਅਨ ਤੇ ਪ੍ਰੋਵਿੰਸ ਮੁੜ ਗੱਲਬਾਤ ਸ਼ੁਰੂ ਕਰਨਗੇ।
ਓਨਟਾਰੀਓ ਦੇ ਸਿੱਖਿਆ ਮੰਤਰੀ ਸਟੀਫਨ ਲਿਚੇ ਨੇ ਆਖਿਆ ਕਿ ਇਹ ਸਾਰੀਆਂ ਧਿਰਾਂ ਲਈ ਸਕਾਰਾਤਮਕ ਸਮਝੌਤਾ ਹੈ। ਇਸ ਦਾ ਸੱਭ ਤੋਂ ਵੱਡਾ ਫਾਇਦਾ ਸਾਡੇ ਬੱਚਿਆਂ ਨੂੰ ਹੋਵੇਗਾ।