ਓਨਟਾਰੀਓ, 20 ਨਵੰਬਰ (ਪੋਸਟ ਬਿਊਰੋ) :ਦੱਖਣੀ ਓਨਟਾਰੀਓ ਤੇ ਸੂ ਸੇਂਟ ਮਰੀ ਦੇ ਕਈ ਹਿੱਸਿਆਂ ਵਿੱਚ ਭਾਰੀ ਬਰਫਬਾਰੀ ਦੀਆਂ ਕਈ ਚੇਤਾਵਨੀਆਂ ਅਜੇ ਵੀ ਜਾਰੀ ਰੱਖੀਆਂ ਗਈਆਂ ਹਨ। ਪ੍ਰੋਵਿੰਸ ਦੇ ਕਈ ਹਿੱਸਿਆਂ ਵਿੱਚ ਐਤਵਾਰ ਨੂੰ ਤੇਜ਼ ਹਵਾਵਾਂ ਚੱਲਦੀਆਂ ਰਹੀਆਂ ਤੇ ਭਾਰੀ ਬਰਫਬਾਰੀ ਹੋਈ।
ਐਨਵਾਇਰਮੈਂਟ ਕੈਨੇਡਾ ਵੱਲੋਂ ਬੈਰੀ, ਪੀਟਰਬਰੋ, ਮਸਕੋਕਾ, ਗ੍ਰੇਅ-ਬਰੂਸ ਤੇ ਵਾਟਰਲੂ ਦੇ ਕਈ ਹਿੱਸਿਆਂ ਵਿੱਚ ਭਾਰੀ ਬਰਫਬਾਰੀ ਦੀ ਚੇਤਾਵਨੀ ਦਿੱਤੀ ਗਈ ਸੀ। ਕਈ ਥਾਂਵਾਂ ਉੱਤੇ ਤਾਂ 50 ਸੈਂਟੀਮੀਟਰ ਤੱਕ ਬਰਫਬਾਰੀ ਹੋਣ ਦੀ ਪੇਸ਼ੀਨਿਗੋਈ ਵੀ ਕੀਤੀ ਗਈ ਸੀ।ਬਰਫਬਾਰੀ ਦੇ ਨਾਲ ਨਾਲ ਤੇਜ਼ ਹਵਾਵਾਂ ਕਾਰਨ ਵਿਜਿ਼ਬਿਲਿਟੀ ਘਟਣ ਦੀ ਚੇਤਾਵਨੀ ਵੀ ਮੌਸਮ ਏਜੰਸੀ ਵੱਲੋਂ ਪਹਿਲਾਂ ਹੀ ਕੀਤੀ ਗਈ ਸੀ।
ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ ਦੀ ਹਾਈਵੇਅ ਸੇਫਟੀ ਡਵੀਜ਼ਨ ਨੂੰ ਕਈ ਥਾਂਵਾਂ ਉੱਤੇ ਹਾਦਸੇ ਹੋਣ ਤੇ ਗੱਡੀਆਂ ਦੇ ਖੱਡ ਵਿੱਚ ਡਿੱਗਣ ਦੀਆਂ ਰਿਪੋਰਟਾਂ ਵੀ ਮਿਲੀਆਂ। ਬਰਫੀਲੇ ਤੂਫਾਨ ਕਾਰਨ ਕਈ ਥਾਂਵਾਂ ਉੱਤੇ ਬਿਜਲੀ ਵੀ ਗੁੱਲ ਹੋ ਗਈ। ਸਵੇਰੇ 7:00 ਵਜੇ ਤੱਕ ਹਾਈਡਰੋ ਵੰਨ ਦੇ 1900 ਕਸਟਮਰਜ਼ ਬਿਜਲੀ ਤੋਂ ਬਿਨਾਂ ਗੁਜ਼ਾਰਾ ਕਰਨ ਲਈ ਮਜਬੂਰ ਸਨ।