ਓਟਵਾ, 10 ਨਵੰਬਰ (ਪੋਸਟ ਬਿਊਰੋ) : ਸਰਕਾਰ ਦੇ ਹਾਊਸ ਲੀਡਰ ਮਾਰਕ ਹੌਲੈਂਡ ਦਾ ਕਹਿਣਾ ਹੈ ਕਿ ਅਗਲੇ ਹਫਤੇ ਜਦੋਂ ਐਮਪੀਜ਼ ਓਟਵਾ ਪਰਤਣਗੇ ਤਾਂ ਉਹ ਹਾਊਸ ਆਫ ਕਾਮਨਜ਼ ਦੇ ਸਿਟਿੰਗ ਆਰਜ਼ ਵਧਾਉਣ ਲਈ ਮਤਾ ਪੇਸ਼ ਕਰਨਗੇ।
ਵੀਰਵਾਰ ਨੂੰ ਟਵੀਟ ਕਰਕੇ ਹੌਲੈਂਡ ਨੇ ਆਖਿਆ ਕਿ ਸਾਡਾ ਏਜੰਡਾ ਬਹੁਤ ਹੀ ਤਾਂਘਵਾਣ ਹੈ ਤੇ ਕੰਜ਼ਰਵੇਟਿਵ ਇਸ ਨੂੰ ਪੂਰਾ ਕਰਨ ਦੇ ਰਾਹ ਵਿੱਚ ਅੜਿੱਕਾ ਡਾਹ ਸਕਦੇ ਹਨ। ਇੱਕ ਇੰਟਰਵਿਊ ਵਿੱਚ ਹੌਲੈਂਡ ਨੇ ਆਖਿਆ ਕਿ ਉਹ ਹਾਊਸ ਦਾ ਕੰਮਕਾਜ ਸਹੀ ਢੰਗ ਨਾਲ ਸ਼ਡਿਊਲ ਕਰਨ ਦੀ ਕੋਸਿ਼ਸ਼ ਕਰ ਰਹੇ ਹਨ ਪਰ ਕੰਜ਼ਰਵੇਟਿਵਾਂ ਤੋਂ ਉਨ੍ਹਾਂ ਨੂੰ ਇਹ ਸੰਕੇਤ ਮਿਲ ਰਹੇ ਹਨ ਕਿ ਉਹ ਹਰ ਬਿੱਲ ਉੱਤੇ ਵੱਧ ਸਮੇਂ ਲਈ ਬਹਿਸ ਕਰਨੀ ਚਾਹੁੰਦੇ ਹਨ ਤੇ ਫਿਰ ਹੀ ਉਸ ਉੱਤੇ ਵੋਟ ਕਰਨ ਲਈ ਤਿਆਰ ਹੋਣਗੇ।
ਉਨ੍ਹਾਂ ਆਖਿਆ ਕਿ ਇਸ ਲਈ ਉਨ੍ਹਾਂ ਕੋਲ ਇਹ ਹੱਲ ਹੈ ਕਿ ਬਹਿਸ ਦਾ ਸਮਾਂ ਵਧਾ ਕੇ ਅੱਧੀ ਰਾਤ ਤੱਕ ਕਰ ਦਿੱਤਾ ਜਾਵੇ।ਇਸ ਦੌਰਾਨ ਵਿਰੋਧੀ ਧਿਰ ਦੇ ਹਾਊਸ ਲੀਡਰ ਐਂਡਰਿਊ ਸ਼ੀਅਰ ਨੇ ਆਖਿਆ ਕਿ ਲਿਬਰਲ ਸਾਡੇ ਉੱਤੇ ਹਾਊਸ ਦੀ ਕਾਰਵਾਈ ਨੂੰ ਜਾਣ-ਬੁੱਝ ਕੇ ਲਮਕਾਉਣ ਦਾ ਦੋਸ਼ ਲਾ ਰਹੇ ਹਨ ਜਦਕਿ ਅਸੀਂ ਸਰਕਾਰ ਨੂੰ ਹਰ ਮਾਮਲੇ ਵਿੱਚ ਜਵਾਬਦੇਹ ਠਹਿਰਾਉਣਾ ਚਾਹੁੰਦੇ ਹਾਂ ਤੇ ਅਸੀਂ ਉਨ੍ਹਾਂ ਵੱਲੋਂ ਪੇਸ਼ ਬਿੱਲਾਂ ਵਿੱਚ ਉਨ੍ਹਾਂ ਦੀਆਂ ਕਮੀਆਂ ਉਨ੍ਹਾਂ ਨੂੰ ਦੱਸਣਾ ਚਾਹੁੰਦੇ ਹਾਂ ਤੇ ਇਹੋ ਸਾਡਾ ਕੰਮ ਹੈ। ਸਾਨੂੰ ਸਾਡਾ ਕੰਮ ਕਰਨ ਤੋਂ ਕੋਈ ਰੋਕ ਨਹੀਂ ਸਕਦਾ ਤੇ ਨਾ ਹੀ ਇਸ ਲਈ ਸਾਨੂੰ ਮੁਆਫੀ ਮੰਗਣ ਦੀ ਕੋਈ ਲੋੜ ਲੱਗਦੀ ਹੈ।
ਸੋਮਵਾਰ ਨੂੰ ਪੇਸ਼ ਕੀਤੇ ਜਾਣ ਵਾਲੇ ਇਸ ਮਤੇ ਦੇ ਪਹਿਲਾਂ ਹੀ ਪਾਸ ਹੋ ਜਾਣ ਦੀ ਸੰਭਾਵਨਾ ਪ੍ਰਗਟਾਈ ਜਾ ਰਹੀ ਹੈ ਕਿਉਂਕਿ ਐਨਡੀਪੀ ਵੀ ਦੇਰ ਰਾਤ ਤੱਕ ਬਹਿਸ ਜਾਰੀ ਰੱਖਣ ਦੇ ਹੱਕ ਵਿੱਚ ਹੈ।