ਓਟਵਾ, 13 ਸਤੰਬਰ (ਪੋਸਟ ਬਿਊਰੋ) : ਪਿਏਰ ਪੌਲੀਏਵਰ ਨੇ ਕੰਜ਼ਰਵੇਟਿਵ ਪਾਰਟੀ ਦੇ ਸਾਬਕਾ ਆਗੂ ਐਂਡਰਿਊ ਸ਼ੀਅਰ ਨੂੰ ਹਾਊਸ ਆਫ ਕਾਮਨਜ਼ ਵਿੱਚ ਆਪਣਾ ਚੀਫ ਲੈਫਟੀਨੈਂਟ ਬਣਨ ਲਈ ਨਿਯੁਕਤ ਕੀਤਾ ਹੈ। ਸ਼ੀਅਰ ਪਾਰਲੀਆਮੈਂਟ ਵਿੱਚ ਵਿਰੋਧੀ ਧਿਰ ਦੇ ਹਾਊਸ ਲੀਡਰ ਦੀ ਭੂਮਿਕਾ ਨਿਭਾਉਣਗੇ।
ਆਪਣੀ ਨਵੀਂ ਲੀਡਰਸਿ਼ਪ ਟੀਮ ਦਾ ਐਲਾਨ ਕਰਦਿਆਂ ਪੌਲੀਏਵਰ ਨੇ ਅੱਜ ਨੌਂ ਅਹਿਮ ਨਿਯੁਕਤੀਆਂ ਦਾ ਖੁਲਾਸਾ ਕੀਤਾ। 2017 ਵਿੱਚ ਸ਼ੀਅਰ ਸਾਬਕਾ ਪ੍ਰਧਾਨ ਮੰਤਰੀ ਸਟੀਫਨ ਹਾਰਪਰ ਦੀ ਥਾਂ ਪਾਰਟੀ ਆਗੂ ਬਣੇ ਸਨ। ਪਰ ਦੋ ਸਾਲ ਬਾਅਦ ਹੀ 2019 ਦੀਆਂ ਫੈਡਰਲ ਚੋਣਾਂ ਵਿੱਚ ਪਾਰਟੀ ਦੇ ਦੂਜੇ ਸਥਾਨ ਉੱਤੇ ਰਹਿਣ ਕਾਰਨ ਉਨ੍ਹਾਂ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਸੀ।
ਸ਼ੀਅਰ ਤੋਂ ਇਲਾਵਾ ਪੌਲੀਏਵਰ ਦੀ ਇਸ ਟੀਮ ਵਿੱਚ ਲੰਮੇਂ ਸਮੇਂ ਤੋਂ ਕੰਜ਼ਰਵੇਟਿਵ ਐਮਪੀ ਚੱਲੇ ਆ ਰਹੇ ਟਿੰਮ ਉੱਪਲ ਤੇ ਮੈਲਿਸਾ ਲੈਂਟਸਮੈਨ ਪੌਲੀਏਵਰ ਦੇ ਡਿਪਟੀ ਲੀਡਰਜ਼ ਦੀ ਭੂਮਿਕਾ ਵਿੱਚ ਨਜ਼ਰ ਆਉਣਗੇ।ਇਨ੍ਹਾਂ ਤੋਂ ਇਲਾਵਾ ਪਾਰਟੀ ਦੀ ਵ੍ਹਿਪ ਕੈਰੀ ਲਿਨ ਫਿੰਡਲੇਅ ਹੋਵੇਗੀ ਤੇ ਕਿਊਬਿਕ ਤੋਂ ਪਿਏਰ ਪਾਲ-ਹਸ ਨੂੰ ਵੀ ਟੀਮ ਵਿੱਚ ਸ਼ਾਮਲ ਕੀਤਾ ਗਿਆ ਹੈ।