ਪਿਛਲੇ ਦਿਨੀਂ ਫਾਦਰ ਟੌਬਿਨ ਸੀਨੀਅਰਜ਼ ਕਲੱਬ ਵੱਲੋਂ ਭਾਰਤ ਦਾ ਸੁਤੰਤਰਤਾ ਦਿਵਸ ਅਤੇ ਬੀਬੀਆਂ ਲਈ ਤੀਆਂ ਦਾ ਤਿਉਹਾਰ ਬੜੀ ਧੂਮਧਾਮ ਨਾਲ ਮਨਾਇਆ ਗਿਆ। ਇਸ ਮੌਕੇ ਬੜੇ ਹੀ ਸਤਿਕਾਰ ਨਾਲ ਤਿਰੰਗਾ ਝੰਡਾ ਲਹਿਰਾਇਆ ਗਿਆ। ਮੁੱਖ ਤੌਰ `ਤੇ ਪ੍ਰਿੰਸੀਪਲ ਰਾਮ ਸਿੰਘ ਕੁਲਾਰ, ਬੀਬੀ ਬਲਵੀਰ ਕੌਰ ਸੋਹੀ (ਸਕੂਲ ਟਰੱਸਟੀ), ਸ: ਹਰਕੀਰਤ ਸਿੰਘ (ਸਿਟੀ ਕੌਂਸਲਰ) ਅਤੇ ਕੁਝ ਹੋਰ ਬੁਲਾਰਿਆਂ ਨੇ ਸ਼ਮੂਲੀਅਤ ਕੀਤੀ। ਸ: ਕਰਤਾਰ ਸਿੰਘ ਚਾਹਲ ਨੇ ਵਿਸਤ੍ਰਿਤ ਰੂਪ ਵਿਚ ਭਾਰਤ ਦੀ ਆਜ਼ਾਦੀ ਦੇ ਸੰਘਰਸ਼ ਅਤੇ ਆਜ਼ਾਦ ਭਾਰਤ ਦੀਆਂ ਪ੍ਰਸ਼ਾਸਨਿਕ ਤਰੁੱਟੀਆਂ ਬਾਰੇ ਲੰਬੀ ਜਾਣਕਾਰੀ ਸਰੋਤਿਆਂ ਨਾਲ ਸਾਂਝੀ ਕੀਤੀ। ਸਮੇਂ ਦੀ ਘਾਟ ਕਾਰਨ ਸ: ਰਾਮ ਸਿੰਘ ਕੁਲਾਰ ਨੇ ਕੁੰਜੀਵਤ ਭਾਸ਼ਣ ਵਿਚ ਗਾਗਰ ਵਿੱਚ ਸਾਗਰ ਬੰਦ ਕਰਦਿਆਂ ਲੋਕਾਂ ਦੀ ਇਕਾਗਰਤਾ ਬਣਾਈ ਰੱਖੀ। ਸੰਖੇਪ ਸਮੇਂ ਵਿੱਚ ਇਹ ਸਮਾਗਮ ਸਮਾਪਤ ਹੋਇਆ।
ਇਸ ਮੌਕੇ ਚਾਹ, ਸਮੋਸੇ, ਮਠਿਆਈਆਂ ਤੇ ਕੋਲਡ ਡਰਿੰਕਸ ਦਾ ਖੁੱਲ੍ਹਾ ਲੰਗਰ ਚੱਲ ਰਿਹਾ ਸੀ। ਚਾਹ ਦਾ ਪ੍ਰਬੰਧ ਹਰ ਵਾਰ ਦੀ ਤਰ੍ਹਾਂ ਬੀਬੀ ਭਜਨ ਕੌਰ ਢਡਵਾਲ ਦੇ ਪਰਿਵਾਰ ਵਲੋਂ ਕੀਤਾ ਗਿਆ ਸੀ। ਸ: ਅਮਰਜੀਤ ਸਿੰਘ ਬੋਪਾਰਾਏ, ਹਰੀ ਸਿੰਘ ਗਿੱਲ, ਗੁਰਮੀਤ ਸਿੰਘ ਸੰਧੂ, ਟਹਿਲ ਸਿੰਘ ਮੁੰਡੀ, ਗੁਰਮੇਲ ਸਿੰਘ ਗਿੱਲ, ਮਲਕੀਤ ਸਿੰਘ ਸੰਧੂ ਨੇ ਲਗਾਤਾਰ ਚਾਹ ਪਾਣੀ ਦੀ ਸੇਵਾ ਨਿਭਾਈ। ਸ: ਇਕਬਾਲ ਸਿੰਘ ਘੋਲੀਆ (ਸੀਨੀਅਰ ਮੀਤ ਪ੍ਰਧਾਨ) ਅਤੇ ਰਣਜੀਤ ਸਿੰਘ ਤੱਗੜ (ਸਾਬਕਾ ਪ੍ਰਧਾਨ) ਨੇ ਸਾਰੇ ਪ੍ਰਬੰਧਾਂ ਦੀ ਦੇਖ ਰੇਖ ਕੀਤੀ।
ਇਸ ਉਪਰੰਤ ਤੀਆਂ ਦਾ ਪਿੜ ਜੰਮ ਚੁੱਕਿਆ ਸੀ। ਸਾਰੇ ਏਰੀਆ ਦੀਆਂ ਬੀਬੀਆਂ ਭੈਣਾਂ ਬੱਚਿਆਂ ਨੇ ਗਿੱਧੇ ਵਿੱਚ ਸ਼ਮੂਲੀਅਤ ਕੀਤੀ। ਜਿਵੇਂ-ਜਿਵੇਂ ਗਿੱਧੇ ਦੀ ਧਮਾਲ ਪੈਂਦੀ ਗਈ, ਬੀਬੀਆਂ ਦੀ ਗਿਣਤੀ ਵਿਚ ਵੀ ਲਗਾਤਾਰ ਵਾਧਾ ਹੁੰਦਾ ਗਿਆ। ਸ਼ਾਮ ਕਰੀਬ ਸਾਢੇ ਸੱਤ ਵਜੇ ਇਸ ਤੀਆਂ ਦੇ ਸਮਾਗਮ ਦੀ ਸਮਾਪਤੀ ਹੋਈ। ਇਸ ਸਫ਼ਲ ਸਮਾਗਮ ਦੀਆਂ ਯਾਦਾਂ ਦਿਲ ਵਿਚ ਸਮੋਏ ਬੀਬੀਆਂ ਰਵਾਂ-ਰਵੀਂ ਘਰਾਂ ਨੂੰ ਰਵਾਨਾ ਹੋਈਆਂ। ਇਸ ਆਸ ਨਾਲ ਕਿ ਅਗਲੇ ਸਾਲ ਇਸ ਤੋਂ ਵੀ ਵਧੀਆ ਸਮਾਗਮ ਹੋਵੇਗਾ। ਤੀਆਂ ਦੇ ਸਮਾਗਮ ਦੀ ਸਫ਼ਲਤਾ ਵਿਚ ਬੀਬੀਆਂ ਦਾ ਵੱਡਾ ਯੋਗਦਾਨ ਸੀ।