ਓਨਟਾਰੀਓ, 18 ਅਗਸਤ (ਪੋਸਟ ਬਿਊਰੋ) : ਹੈਲਥ ਕੇਅਰ ਸਿਸਟਮ ਨੂੰ ਲੀਹ ਉੱਤੇ ਲਿਆਉਣ ਲਈ ਫੋਰਡ ਸਰਕਾਰ ਨੇ ਪ੍ਰਾਈਵੇਟ ਕਲੀਨਿਕ ਸਰਜਰੀਜ਼ ਨੂੰ ਫੰਡ ਦੇਣੇ ਸ਼ੁਰੂ ਕਰਨ ਦਾ ਐਲਾਨ ਕੀਤਾ ਹੈ।ਇਸ ਦੇ ਨਾਲ ਹੀ ਮਰੀਜ਼ਾਂ ਨੂੰ ਉਨ੍ਹਾਂ ਦੀਆਂ ਕਮਿਊਨਿਟੀਜ਼ ਤੋਂ ਬਾਹਰ ਲਾਂਗ ਟਰਮ ਕੇਅਰ ਬੈੱਡਜ਼ ਮੁਹੱਈਆ ਕਰਵਾਉਣ ਦੀ ਖੁੱਲ੍ਹ ਦੇਣ ਲਈ ਬਿੱਲ ਲਿਆਉਣ ਦਾ ਫੈਸਲਾ ਵੀ ਕੀਤਾ ਗਿਆ ਹੈ।
ਸਿਹਤ ਮੰਤਰੀ ਸਿਲਵੀਆ ਜੋਨਜ਼ ਨੇ ਵੀਰਵਾਰ ਸਵੇਰੇ ਸੰਨੀਬਰੁੱਕ ਹਸਪਤਾਲ ਤੋਂ ਸਰਕਾਰ ਦੇ “ਪਲੈਨ ਟੂ ਸਟੇਅ ਓਪਨ” ਦਾ ਖੁਲਾਸਾ ਕਰਦਿਆਂ ਆਖਿਆ ਕਿ ਅਸੀਂ ਓਨਟਾਰੀਓ ਦੇ ਹਸਪਤਾਲਾਂ ਉੱਤੇ ਪਏ ਬੋਝ ਨੂੰ ਘਟਾਉਣਾ ਚਾਹੁੰਦੇ ਹਾਂ। ਇੱਥੋਂ ਦੇ ਹਸਪਤਾਲਾਂ ਨੂੰ ਸਟਾਫ ਦੀ ਘਾਟ ਦੇ ਚੱਲਦਿਆਂ ਆਪਣੇ ਐਮਰਜੰਸੀ ਰੂਮਜ਼ ਤੱਕ ਬੰਦ ਕਰਨੇ ਪੈ ਰਹੇ ਹਨ। ਉਨ੍ਹਾਂ ਆਖਿਆ ਕਿ ਪਿਛਲੇ ਕੁੱਝ ਹਫਤਿਆਂ ਤੋਂ ਅਸੀਂ ਫਰੰਟਲਾਈਨ ਵਰਕਰਜ਼, ਹਸਪਤਾਲਾਂ, ਲਾਂਗ ਟਰਮ ਕੇਅਰ ਤੇ ਯੂਨੀਅਨ ਲੀਡਰਸਿ਼ਪ ਨਾਲ ਰਲ ਕੇ ਇਸ ਸਮੱਸਿਆ ਦਾ ਕੋਈ ਠੋਸ ਹੱਲ ਕੱਢਣ ਲਈ ਕੰਮ ਕਰ ਰਹੇ ਹਾਂ। ਜਿਸ ਨਾਲ ਹਸਪਤਾਲਾਂ ਤੇ ਵਰਕਰਜ਼ ਉੱਤੇ ਪੈ ਰਹੇ ਦਬਾਅ ਨੂੰ ਘਟਾਇਆ ਜਾ ਸਕੇ ਤੇ ਆਉਣ ਵਾਲੀ ਸਰਦ ਰੁੱਤ ਵਿੱਚ ਮਰੀਜ਼ਾਂ ਦੀ ਤਾਦਾਦ ਵਿੱਚ ਵਾਧਾ ਹੋਣ ਦੀ ਸੰਭਾਵਨਾਂ ਨੂੰ ਧਿਆਨ ਵਿੱਚ ਰੱਖਦਿਆਂ ਹੋਇਆਂ ਤਿਆਰੀ ਕੀਤੀ ਜਾ ਸਕੇ।
ਇਸ ਤੋਂ ਇਲਾਵਾ ਮੌਜੂਦਾ ਪ੍ਰਾਈਵੇਟ ਫੈਸਿਲਿਟੀਜ਼ ਵਿੱਚ ਓਐਚਆਈਪੀ ਵਾਲੇ ਸਰਜੀਕਲ ਪ੍ਰੋਸੀਜਰਜ਼ ਦੀ ਗਿਣਤੀ ਵਧਾ ਕੇ ਹੈਲਥਕੇਅਰ ਸਿਸਟਮ ਦੀ ਸਰਜੀਕਲ ਸਮਰੱਥਾ ਨੂੰ ਵਧਾਉਣ ਦੀ ਤਿਆਰੀ ਵੀ ਕੀਤੀ ਜਾ ਰਹੀ ਹੈ। ਸਿਹਤ ਮੰਤਰੀ ਨੇ ਇਹ ਨਹੀਂ ਦੱਸਿਆ ਕਿ ਪ੍ਰਾਈਵੇਟ ਕਲੀਨਿਕਸ ਵਿੱਚ ਕਿਸ ਤਰ੍ਹਾਂ ਦੀਆਂ ਸਰਜਰੀਜ਼ ਕਰਵਾਈਆਂ ਜਾ ਸਕਣਗੀਆਂ। ਪੈਰਾਮੈਡਿਕਸ ਕੋਲ ਮਰੀਜ਼ਾਂ ਨੂੰ ਐਮਰਜੰਸੀ ਰੂਮਜ਼ ਤੋਂ ਇਲਾਵਾ ਕਿਸੇ ਹੋਰ ਥਾਂ ਉੱਤੇ ਲਿਜਾਣ ਦੀ ਖੁੱਲ੍ਹ ਵੀ ਹੋਵੇਗੀ। ਉਹ ਮਰੀਜ਼ਾਂ ਦਾ ਘਰ ਵਿੱਚ ਹੀ ਇਲਾਜ ਕਰ ਸਕਣਗੇ ਜਾਂ ਉਨ੍ਹਾਂ ਨੂੰ ਕਿਸੇ ਹੋਰ ਫੈਸਿਲਿਟੀ ਉੱਤੇ ਲਿਜਾ ਸਕਣਗੇ।
ਇਸ ਪਲੈਨ ਵਿੱਚ ਇਹ ਵੀ ਸ਼ਾਮਲ ਹੈ ਕਿ ਨਰਸਾਂ ਨੂੰ ਫੁੱਲ ਟਾਈਮ ਰੀਜਨ ਦੇ ਕਈ ਹਸਪਤਾਲਾਂ ਵਿੱਚ ਤਾਇਨਾਤ ਕੀਤਾ ਜਾ ਸਕੇਗਾ ਤੇ ਆਪਣੇ ਕਰੀਅਰ ਦੇ ਮੱਧ ਵਿੱਚ ਜਾਂ ਅਖੀਰ ਵਿੱਚ ਪਹੁੰਚ ਚੁੱਕੀਆਂ ਨਰਸਾਂ ਦੇ ਨਾਲ ਨਾਲ ਰਿਟਾਇਰਡ ਨਰਸਾਂ ਵੀ ਨਵੀਆਂ ਨਰਸਾਂ ਨੂੰ ਕੰਮ ਸਿਖਾ ਸਕਣਗੀਆਂ।ਪ੍ਰੋਵਿੰਸ ਆਰਜ਼ੀ ਤੌਰ ਉੱਤੇ ਕੌਮਾਂਤਰੀ ਪੱਧਰ ਉੱਤੇ ਟਰੇਨਡ ਤੇ ਰਿਟਾਇਰਡ ਨਰਸਾਂ ਲਈ ਪ੍ਰੀਖਿਆ, ਅਰਜ਼ੀ ਤੇ ਰਜਿਸਟ੍ਰੇਸ਼ਨ ਫੀਸ ਕਵਰ ਕਰਨ ਦਾ ਇੰਤਜ਼ਾਮ ਕਰੇਗੀ, ਜਿਸ ਨਾਲ ਉਨ੍ਹਾਂ ਨੂੰ 1500 ਡਾਲਰ ਦੀ ਬਚਤ ਹੋਵੇਗੀ। ਇਸ ਤੋਂ ਇਲਾਵਾ ਲਾਂਗ ਟਰਮ ਕੇਅਰ ਹੋਮਜ਼ ਵਿੱਚ ਪ੍ਰੈਕਟਿਸ ਕਰਨ ਵਾਲੀਆਂ ਨਰਸਾਂ ਦੀ ਗਿਣਤੀ ਵਿੱਚ ਵਾਧਾ ਕਰਨ ਲਈ ਸਰਕਾਰ ਤਿੰਨ ਸਾਲਾਂ ਦੇ ਅਰਸੇ ਵਿੱਚ 57·6 ਮਿਲੀਅਨ ਡਾਲਰ ਦਾ ਨਿਵੇਸ਼ ਕਰਨ ਬਾਰੇ ਯੋਜਨਾ ਉੱਤੇ ਵੀ ਵਿਚਾਰ ਕਰ ਰਹੀ ਹੈ।
ਜੋਨਜ਼ ਨੇ ਆਖਿਆ ਕਿ ਇਸ ਨਵੇਂ ਪਲੈਨ ਤਹਿਤ ਹਸਪਤਾਲਾਂ ਵਿੱਚ 2500 ਬੈੱਡ ਹੋਰ ਲਾਏ ਜਾਣਗੇ ਤੇ 6,000 ਹੋਰ ਹੈਲਥ ਕੇਅਰ ਵਰਕਰਜ਼ ਭਰਤੀ ਕੀਤੇ ਜਾਣਗੇ।