ਟੋਰਾਂਟੋ, 18 ਅਗਸਤ (ਪੋਸਟ ਬਿਊਰੋ) : ਵੀਰਵਾਰ ਦੁਪਹਿਰ ਨੂੰ ਸਕਾਰਬਰੋ ਵਿੱਚ ਇੱਕ ਗੱਡੀ ਵਿੱਚ ਇੱਕ ਮਹਿਲਾ ਨੂੰ ਧੱਕੇ ਨਾਲ ਬਿਠਾ ਕੇ ਲਿਜਾਇਆ ਗਿਆ। ਇਸ ਮਾਮਲੇ ਵਿੱਚ ਮਹਿਲਾ ਦੀ ਸੇਫਟੀ ਨੂੰ ਲੈ ਕੇ ਟੋਰਾਂਟੋ ਪੁਲਿਸ ਕਾਫੀ ਪਰੇਸ਼ਾਨ ਹੈ।
ਪੁਲਿਸ ਨੇ ਦੱਸਿਆ ਕਿ ਇਹ ਮਹਿਲਾ ਦੁਪਹਿਰੇ 12:00 ਵਜੇ ਤੋਂ ਬਾਅਦ ਗਿਲਡਵੁੱਡ ਪਾਰਕਵੇਅ ਤੇ ਕਿੰਗਸਟਨ ਰੋਡ ਇਲਾਕੇ ਵਿੱਚ ਸਾਈਡਵਾਕ ਉੱਤੇ ਤੁਰੀ ਜਾ ਰਹੀ ਸੀ ਜਦੋਂ ਇੱਕ ਪੁਰਸ਼ ਨੇ ਗੱਡੀ ਲਿਆ ਕੇ ਉਸ ਦੇ ਸਾਹਮਣੇ ਲਾ ਲਈ ਤੇ ਉਸ ਨੂੰ ਧੱਕੇ ਨਾਲ ਖਿੱਚ ਕੇ ਗੱਡੀ ਅੰਦਰ ਬਿਠਾ ਲਿਆ ਤੇ ਫਿਰ ਗੱਡੀ ਲੈ ਕੇ ਤੇਜ਼ੀ ਨਾਲ ਉੱਥੋਂ ਫਰਾਰ ਹੋ ਗਿਆ।
ਮਸ਼ਕੂਕ ਦੀ ਉਮਰ 20 ਤੋਂ 30 ਸਾਲ ਦਰਮਿਆਨ ਦੱਸੀ ਜਾਂਦੀ ਹੈ, ਉਸ ਦਾ ਰੰਗ ਗੋਰਾ, ਕਾਲੇ ਵਾਲ ਤੇ ਉਸ ਦੇ ਦਾੜ੍ਹੀ ਜਾਂ ਬੱਕਰਦਾੜ੍ਹੀ ਰੱਖੀ ਹੋ ਸਕਦੀ ਹੈ। ਉਸ ਨੂੰ ਆਖਰੀ ਵਾਰੀ ਹਲਕੇ ਰੰਗ ਦੀ ਸ਼ਰਟ ਤੇ ਆਫ-ਵ੍ਹਾਈਟ ਕੈਪ ਲਿਆਂ ਦੇਖਿਆ ਗਿਆ। ਗੱਡੀ ਚਿੱਟੇ ਰੰਗ ਦੀ ਦੋ ਜਾਂ ਚਾਰ ਦਰਵਾਜਿ਼ਆਂ ਵਾਲੀ ਕਾਰ ਦੱਸੀ ਜਾਂਦੀ ਹੈ, ਜਿਸ ਦੇ ਪਿਛਲੇ ਹਿੱਸੇ ਵਿੱਚ ਨੀਲੇ ਰੰਗ ਦਾ ਐਂਬਲਮ ਲੱਗਿਆ ਹੋਇਆ ਸੀ।
ਮਹਿਲਾ ਦੀ ਉਮਰ ਵੀ 20 ਤੋਂ 30 ਸਾਲ ਦਰਮਿਆਨ ਦੱਸੀ ਜਾਂਦੀ ਹੈ, ਉਸ ਦੇ ਲੰਮੇਂ ਕਾਲੇ ਵਾਲ ਸਨ। ਉਸ ਨੂੰ ਆਖਰੀ ਵਾਰੀ ਬੈਗ ਨਾਲ ਵੇਖਿਆ ਗਿਆ ਪਰ ਉਸ ਦੇ ਕੱਪੜਿਆਂ ਸਬੰਧੀ ਵੇਰਵਾ ਅਜੇ ਜਾਰੀ ਨਹੀਂ ਕੀਤਾ ਗਿਆ।