ਕੋਲਕਾਤਾ, 11 ਅਗਸਤ (ਪੋਸਟ ਬਿਊਰੋ)- ਕਾਮਨਵੈੱਲਥ ਖੇਡਾਂ ਵਿੱਚ ਸੋਨ ਤਗਮਾ ਜਿੱਤਣ ਵਾਲੇ ਵੇਟ ਲਿਫਟਰ ਅੰਚਿਤਾ ਸ਼ਿਉਲੀ ਦੀ ਮਾਂ ਨੇ ਉਸ ਦੀਆਂ ਟਰਾਲੀਆਂ ਤੇ ਤਗਮਿਆਂ ਨੂੰ ਆਪਣੀ ਪਾਟੀ-ਪੁਰਾਣੀ ਸਾੜ੍ਹੀ ਵਿੱਚ ਲਪੇਟ ਕੇ ਦੋ ਕਮਰਿਆਂ ਦੇ ਘਰ ਵਿਚਲੇ ਇੱਕ-ਇੱਕੋ ਬੈਡ ਦੇ ਹੇਠਾਂ ਰੱਖਿਆ ਹੋਇਆ ਹੈ।
ਸ਼ਿਉਲੀ ਦਾ ਘਰ ਇੱਥੋਂ ਵੀਹ ਕਿਲੋਮੀਟਰ ਦੂਰ ਹਾਵੜਾ ਜ਼ਿਲ੍ਹੇ ਦੇ ਦੇਯੁਲਪੁਰ ਵਿੱਚ ਹੈ। ਜਦ ਇਹ ਵੇਟ ਲਿਫਟਰ ਕਾਮਨਵੈੱਲਥ ਖੇਡਾਂ ਤੋਂ 73 ਕਿਲੋ ਭਾਰ ਵਰਗ ਦਾ ਸੋਨ ਤਮਗਾ ਲੈ ਕੇ ਸੋਮਵਾਰ ਸਵੇਰੇ ਘਰ ਆਇਆ ਤਾਂ ਉਸ ਦੀ ਮਾਂ ਪੂਰਨਿਮਾ ਨੇ ਛੋਟੇ ਜਿਹੇ ਸਟੂਲ ਉੱਤੇ ਉਸਦੀਆਂ ਟਰਾਫੀਆਂ ਅਤੇ ਤਮਗੇ ਰੱਖੇ ਹੋਏ ਸਨ। ਉਸ ਦੀ ਮਾਂ ਨੇ ਆਪਣੇ ਛੋਟੇ ਬੇਟੇ ਨੂੰ ਅੰਚਿਤਾ ਦੇ ਅੱਜ ਤਕ ਜਿੱਤੇ ਤਮਗਿਆਂ ਅਤੇ ਟਰਾਫੀਆਂ ਨੂੰ ਰੱਖਣ ਲਈ ਇੱਕ ਅਲਮਾਰੀ ਖਰੀਦਣ ਨੂੰ ਕਿਹਾ ਹੈ।
ਪੂਰਨਿਮਾ ਨੇ ਕਿਹਾ, ‘‘ਮੈਂ ਜਾਣਦੀ ਸੀ ਕਿ ਜਦ ਅੰਚਿਤਾ ਆਏਗਾ ਤਾਂ ਪੱਤਰਕਾਰ ਤੇ ਫੋਟੋਗਰਾਫਰ ਸਾਡੇ ਘਰ ਆ ਰਹੇ ਹੋਣਗੇ। ਇਸ ਲਈ ਮੈਂ ਇਹ ਤਮਗਾ ਅਤੇ ਟਰਾਫੀਆਂ ਇੱਕ ਸਟੂਲ ਉੱਤੇ ਸਜਾ ਦਿੱਤੀਆਂ ਤਾਂ ਕਿ ਸਮਝ ਸਕਣ ਕਿ ਮੇਰਾ ਬੇਟਾ ਕਿੰਨਾ ਪ੍ਰਤਿਭਾਸ਼ਾਲੀ ਹੈ। ਮੈਂ ਸੁਫਨੇ ਵਿੱਚ ਨਹੀਂ ਸੋਚਿਆ ਸੀ ਕਿ ਉਹ ਦੇਸ਼ ਲਈ ਸੋਨ ਤਮਗਾ ਜਿੱਤੇਗਾ।''
ਅੰਚਿਤਾ ਦਾ ਭਰਾ ਵੀ ਵੇਟ ਲਿਫਟਰ ਹੈ। ਉਨ੍ਹਾਂ ਦੀ ਮਾਂ ਨੇ ਕਿਹਾ ਕਿ ਉਸ ਦੇ ਬੇਟਿਆਂ ਨੂੰ ਸਾੜ੍ਹੀਆਂ ਉੱਤੇ ਜ਼ਰੀ ਦਾ ਕੰਮ ਕਰਨ ਦੇ ਨਾਲ ਸਮਾਨ ਚੜ੍ਹਾਉਣ ਤੇ ਉਤਾਰਨ ਦਾ ਵੀ ਕੰਮ ਕਰਨਾ ਪੈਂਦਾ ਸੀ। ਦੋਵਾਂ ਭਰਾਵਾਂ ਨੇ ਇੰਨੀਆਂ ਮੁਸ਼ਕਲਾਂ ਦੇ ਬਾਵਜੂਦ ਵੇਟ ਲਿਫਟਿੰਗ ਜਾਰੀ ਰੱਖੀ। ਉਨ੍ਹਾਂ ਦੀ ਮਾਂ ਨੇ ਕਿਹਾ, ‘‘ਮੇਰੇ ਕੋਲ ਆਪਣੇ ਪੁੱਤਰਾਂ ਨੂੰ ਕੰਮ ਉੱਤੇ ਭੇਜਣ ਦੇ ਇਲਾਵਾ ਕੋਈ ਚਾਰਾ ਨਹੀਂ ਸੀ, ਵਰਨਾ ਸਾਡੇ ਲਈ ਜੀਊਂਦੇ ਰਹਿਣ ਹੀ ਮੁਸ਼ਕਲ ਹੋ ਗਿਆ ਹੁੰਦਾ।''