ਪੋਰਟ ਆਫ ਸਪੇਨ, 11 ਅਗਸਤ (ਪੋਸਟ ਬਿਊਰੋ)- ਟੀ-20 ਵਿਸ਼ਵ ਕੱਪ ਲਈ ਵੈਸਟਇੰਡੀਜ਼ ਟੀਮ ਮੈਨੇਜਮੈਂਟ ਕੋਲ ਅਜੇ ਵੀ ਪ੍ਰਮੁੱਖ ਖਿਡਾਰੀਆਂ ਦੀ ਮੌਜੂਦਗੀ ਬਾਰੇ ਸਪੱਸ਼ਟਤਾ ਨਹੀਂ ਹੈ। ਆਂਦ੍ਰੇ ਰਸੇਲ ਨੇ ਖੁਦ ਨੂੰ ਚੋਣ ਲਈ ਹਾਜ਼ਰ ਨਹੀਂ ਕੀਤਾ ਹੈ। ਸੁਨੀਲ ਨਾਰਾਇਣ ਦੀ ਹਾਜ਼ਰੀ ਵੀ ਥੋੜ੍ਹੀ ਸ਼ੱਕੀ ਹੈ। ਐਵਿਨ ਲੂਈਸ ਤੇ ਓਸ਼ੇਨ ਥਾਮਸ ਆਪਣੇ ਫਿਟਨੈਸ ਟੈਸਟ ਲਈ ਹਾਜ਼ਰ ਨਹੀਂ ਹੋਏ। ਸ਼ੈਲਡਨ ਕੋਟਰੈਲ, ਫੇਬੀਅਨ ਐਲਨ ਅਤੇ ਰੋਸਟਨ ਚੇਜ਼ ਜ਼ਖਮੀ ਹੋਣ ਕਾਰਨ ਟੀਮ ਤੋਂ ਬਾਹਰ ਹਨ। ਨਤੀਜੇ ਵਜੋਂ ਪੁਰਸ਼ਾਂ ਦੇ ਟੀ-20 ਵਿਸ਼ਵ ਕੱਪ ਤੋਂ ਲੱਗਭਗ ਦੋ ਮਹੀਨੇ ਪਹਿਲਾਂ ਵੈਸਟਇੰਡੀਜ਼ ਆਪਣੀ ਸਰਵਸੇ੍ਰਸ਼ਠ ਟੀਮ ਚੁਣਨ ਵਿੱਚ ਅਜੇ ਵੀ ਪੂਰੀ ਤਰ੍ਹਾਂ ਨਾਲ ਸਮਰਥ ਨਹੀਂ ਹੈ।
ਨਿਊਜ਼ੀਲੈਂਡ ਵਿਰੁੱਧ ਤਿੰਨ ਟੀ-20 ਮੈਚਾਂ ਦੀ ਸੀਰੀਜ਼ ਹੋਣੀ ਹੈ ਅਤੇ ਟੀਮ ਮੈਨੇਜਮੈਂਟ ਕੋਲ ਕੌਮਾਂਤਰੀ ਪੱਧਰ ਦੇ ਖ਼ਿਡਾਰੀਆਂ ਦਾ ਮੁਲਾਂਕਣ ਕਰਨ ਲਈ ਆਖਰੀ ਮੌਕਾ ਹੈ। ਇਸ ਸੀਰੀਜ਼ ਤੋਂ ਬਾਅਦ ਸੀ ਪੀ ਐਲ ਸ਼ੁਰੂ ਹੋ ਜਾਵੇਗੀ। ਮੁੱਖ ਚੋਣਕਾਰ ਡੇਸਮੰਡ ਹੈਂਸ ਅਤੇ ਮੁੱਖ ਕੋਚ ਫਿਲ ਸਿਮਨਸ ਇਸ ਘਟਨਾਕ੍ਰਮ ਤੋਂ ਕਾਫੀ ਨਿਰਾਸ਼ ਹਨ। ਮਿਸਾਲ ਲਈ ਰਸੇਲ 2021 ਟੀ-20 ਵਿਸ਼ਵ ਕੱਪ ਮਗਰੋਂ ਵੈਸਟਇੰਡੀਜ਼ ਲਈ ਨਹੀਂ ਖੇਡਿਆ। ਉਹ ਅੱਜਕੱਲ੍ਹ ਨਾਰਾਇਣ ਨਾਲ ਹੰਡ੍ਰੇਡ ਖੇਡ ਰਿਹਾ ਹੈ। ਉਸ ਨੇ ਭਾਰਤ ਅਤੇ ਨਿਊਜ਼ੀਲੈਂਡ ਵਿਰੁੱਧ ਹੋਣ ਵਾਲੀ ਸੀਰੀਜ਼ ਵਿੱਚ ਹਿੱਸਾ ਨਹੀਂ ਲਿਆ। ਕੁਝ ਦਿਨ ਪਹਿਲਾਂ ਰਸੇਲ ਸੰਯੁਕਤ ਅਰਬ ਅਮੀਰਾਤ (ਯੂ ਏ ਈ) ਦੀ ਇੰਟਰਨੈਸ਼ਨਲ ਟੀ-20 ਲੀਗ ਦੇ ਵਿਦੇਸ਼ੀ ਖਿਡਾਰੀਆਂ ਦੀ ਸੂਚੀ ਦਾ ਹਿੱਸਾ ਸੀ, ਜਿਹੜੀ ਅਗਲੇ ਸਾਲ ਜਨਵਰੀ ਵਿੱਚ ਸ਼ੁਰੂ ਹੋਵੇਗੀ।
ਹੈਂਸ ਨੇ ਰਸੇਲ ਦੇ ਬਾਰੇ ਕਿਹਾ,‘‘ਜਿੰਨੀ ਜਾਣਕਾਰੀ ਮੇਰੇ ਕੋਲ ਹੈ, ਉਸ ਤੋਂ ਮੈਨੂੰ ਲੱਗਦਾ ਹੈ ਕਿ ਉਹ ਟੀਮ ਵਿੱਚ ਨਹੀਂ ਹੈ, ਕਿਉਂਕਿ ਉਸ ਨੇ ਖੁਦ ਨੂੰ ਚੋਣ ਲਈ ਪੇਸ਼ ਨਹੀਂ ਕੀਤਾ।''ਉਸ ਨੇ ਕਿਹਾ,‘ਜੇ ਖਿਡਾਰੀ ਵੈਸਟਇੰਡੀਜ਼ ਲਈ ਖੇਡਣਾ ਚਾਹੁੰਦਾ ਹੈ ਤਾਂ ਇਸ ਨਾਲ ਮੈਨੂੰ ਖ਼ੁਸ਼ੀ ਹੋਵੇਗੀ। ਮੈਂ ਇਹ ਤੈਅ ਕਰਨਾ ਪਸੰਦ ਕਰਾਂਗਾ ਕਿ ਸਾਰੇ ਲੋਕ ਖੇਡਣ ਲਈ ਖੁਦ ਨੂੰ ਪੇਸ਼ ਕਰਨ, ਪਰ ਤੁਹਾਨੂੰ ਸਮਝਣਾ ਪਵੇਗਾ ਕਿ ਖਿਡਾਰੀਆਂ ਕੋਲ ਬਦਲ ਹੈ ਤੇ ਜੇ ਉਹ ਵੈਸਟਇੰਡੀਜ਼ ਟੀਮ ਵੱਲੋਂ ਖੇਡਣ ਦੀ ਥਾਂ ਆਪਣੀ ਫ੍ਰੈਂਚਾਈਜ਼ੀ ਟੀਮ ਵਿੱਚ ਖੇਡਣਾ ਪਸੰਦ ਕਰਦੇ ਹਨ ਤਾਂ ਸਾਨੂੰ ਇਸ ਉੱਤੇ ਵਿਚਾਰ ਕਰਨਾ ਪਵੇਗਾ ਕਿ ਸਾਡੇ ਲਈ ਕੌਣ ਹੈ।''ਸਿਮਨਸ ਨੇ ਥੋੜ੍ਹੀ ਤਿੱਖੀ ਟਿੱਪਣੀ ਕੀਤੀ ਤੇ ਕਿਹਾ,‘‘ਏਦਾਂ ਗੱਲ ਕਰਦੇ ਹੋਏ ਤੇ ਇਸ ਹਾਲਾਤ ਨੂੰ ਦੇਖ ਕੇ ਦੁੱਖ ਹੁੰਦਾ ਹੈ। ਇਸ ਬਾਰੇ ਦੱਸਣ ਦਾ ਕੋਈ ਦੂਜਾ ਤਰੀਕਾ ਨਹੀਂ, ਪਰ ਤੁਸੀਂ ਕੀ ਕਰ ਸਕਦੇ ਹੋ? ਮੈਨੂੰ ਨਹੀਂ ਲੱਗਦਾ ਕਿ ਮੈਨੂੰ ਖਿਡਾਰੀਆਂ ਨੂੰ ਆਪਣੇ ਦੇਸ਼ ਦੀ ਟੀਮ ਵੱਲੋਂ ਖੇਡਣ ਲਈ ਭੀਖ ਮੰਗਣੀ ਚਾਹੀਦੀ ਹੈ। ਮੈਨੂੰ ਲੱਗਦਾ ਹੈ ਕਿ ਜੇਕਰ ਤੁਸੀਂ ਵੈਸਟਇੰਡੀਜ਼ ਦੀ ਪ੍ਰਤੀਨਿਧਤਾ ਚਾਹੁੰਦੇ ਹੋ ਤਾਂ ਤੁਹਾਨੂੰ ਖੁਦ ਨੂੰ ਪੇਸ਼ ਕਰਨਾ ਪਵੇਗਾ।''