ਲਖਨਊ, 4 ਅਗਸਤ (ਪੋਸਟ ਬਿਊਰੋ)- ਉਤਰ ਪ੍ਰਦੇਸ਼ ਸਰਕਾਰ ਨੇ ਇਲਾਹਾਬਾਦ ਹਾਈ ਕੋਰਟ ਤੇ ਲਖਨਊ ਬੈਂਚ ਵਿੱਚ ਸਰਕਾਰ ਵੱਲੋਂ ਤਾਇਨਾਤ 843 ਸਰਕਾਰੀ ਵਕੀਲਾਂ ਨੂੰ ਕੱਢ ਦਿੱਤਾ ਹੈ। ਇਨ੍ਹਾਂ ਵਿੱਚ ਕਈ ਤਾਂ ਮੁੱਖ ਸਥਾਈ ਐਡਵੋਕੇਟ, ਐਡੀਸ਼ਨਲ ਮੁੱਖ ਸਥਾਈ ਐਡਵੋਕੇਟ, ਸਥਾਈ ਐਡਵੋਕੇਟ ਅਤੇ ਵਕੀਲ ਸਨ। ਨਾਲ ਇਨ੍ਹਾਂ ਅਸਾਮੀਆਂ ਉੱਤੇ ਕੁੱਲ 586 ਨਵੇਂ ਸਰਕਾਰੀ ਵਕੀਲਾਂ ਨੂੰ ਨਿਯੁਕਤ ਵੀ ਕੀਤਾ ਗਿਆ ਅਤੇ 43 ਸਰਕਾਰੀ ਵਕੀਲਾਂ ਦੇ ਮੌਜੂਦਾ ਅਹੁਦੇ ਬਦਲੇ ਗਏ ਹਨ। ਇਨ੍ਹਾਂ ਵਿੱਚ ਬਹੁਤਿਆਂ ਦਾ ਪ੍ਰਮੋਸ਼ਨ ਅਤੇ ਕੁਝ ਦੇ ਅਹੁਦੇ ਹੇਠਾਂ ਕੀਤੇ ਗਏ ਹਨ।
ਰਾਜ ਸਰਕਾਰ ਦੇ ਵਿਸ਼ੇਸ਼ ਸੈਕਟਰੀ ਨਿਕੰੁਜ ਮਿੱਤਲ ਨੇ ਇਸ ਸਬੰਧੀ ਆਦੇਸ਼ ਵਕੀਲਾਂ ਦੀ ਸੂਚੀ ਨਾਲ ਐਡਵੋਕੇਟ ਜਨਰਲ ਨੂੰ ਭੇਜੇ ਹਨ। ਇਨ੍ਹਾਂ ਵਿੱਚ ਇਲਾਹਾਬਾਦ ਹਾਈ ਕੋਰਟ ਵਿੱਚ ਅਡੀਸ਼ਨਲ ਐਡਵੋਕੇਟ ਵਿਨੋਦ ਕਾਂਤ ਸਮੇਤ 505 ਸਰਕਾਰੀ ਵਕੀਲਾਂ ਦਾ ਬਾਂਡ ਤੁਰੰਤ ਖ਼ਤਮ ਕਰ ਦਿੱਤਾ ਗਿਆ ਹੈ ਅਤੇ ਲਖਨਊ ਬੈਂਚ ਵਿੱਚ ਤਾਇਨਾਤ ਦੋ ਮੁੱਖ ਸਥਾਈ ਐਡਵੋਕੇਟਾਂ ਅਜੇ ਕੁਮਾਰ ਪਾਂਡੇ ਅਤੇ ਬਸੰਤ ਲਾਲ ਯਾਦਵ ਤੇ 336 ਹੋਰ ਸਰਕਾਰੀ ਵਕੀਲਾਂ ਦਾ ਬਾਂਡ ਖ਼ਤਮ ਕਰ ਦਿੱਤਾ ਗਿਆ ਹੈ। ਸਰਕਾਰ ਨੇ ਇਲਾਹਾਬਾਦ ਹਾਈ ਕੋਰਟ ਵਿੱਚ 366 ਅਤੇ ਲਖਨਊ ਬੈਂਚ ਵਿੱਚ ਵੀ ਕੁੱਝ ਪ੍ਰਤੀਨਿੱਧ ਨਿਯੁਕਤ ਕੀਤੇ ਹਨ। ਅਭਿਨਵ ਨਾਰਾਇਣ ਤਿ੍ਰਵੇਦੀ ਨੂੰ ਲਖਨਊ ਬੈਂਚ ਵਿੱਚ ਬਤੌਰ ਮੁੱਖ ਸਥਾਈ ਐਡਵੋਕੇਟ ਨਿਯੁਕਤ ਕੀਤਾ ਅਤੇ ਇਲਾਹਾਬਾਦ ਹਾਈ ਕੋਰਟ ਵਿੱਚ 23 ਅਤੇ ਲਖਨਊ ਬੈਂਚ ਵਿੱਚ 20 ਸਰਕਾਰੀ ਵਕੀਲਾਂ ਦੇ ਅਹੁਦੇ ਬਦਲੇ ਹਨ।