ਤਾਰਾ ਸੁਤਾਰੀਆ ਮਿਲਾਪ ਜਾਵੇਰੀ ਦੀ ਐਕਸ਼ਨ ਫਿਲਮ ‘ਮਰਜਾਵਾਂ’ ਵਿੱਚ ਸਿਧਾਰਥ ਮਲਹੋਤਰਾ, ਰਕੁਲ ਪ੍ਰੀਤ ਸਿੰਘ ਤੇ ਰਿਤੇਸ਼ ਦੇਸ਼ਮੁਖ ਨਾਲ ਨਜ਼ਰ ਆਈ ਸੀ। ਪਿਛਲੇ ਸਾਲ ਅਹਾਨ ਸ਼ੈੱਟੀ ਨਾਲ ‘ਤੜਪ’ ਤੇ ਇਸ ਸਾਲ ‘ਹੀਰੋਪੰਤੀ 2’ ਵਿੱਚ ਟਾਈਗਰ ਸ਼ਰਾਫ ਦੇ ਆਪੋਜ਼ਿਟ ਨਜ਼ਰ ਆਈ। ਨਵਾਜ਼ੂਦੀਨ ਸਿੱਦੀਕੀ ਨੇ ਫਿਲਮ ਵਿੱਚ ਬੇਹੱਦ ਸ਼ਾਨਦਾਰ ਭੂਮਿਕਾ ਨਿਭਾਈ ਸੀ। ਇਸ ਸਮੇਂ ਤਾਰਾ ਸੁਤਾਰੀਆ ਮੋਹਿਤ ਸੂਰੀ ਦੇ ਨਿਰਦੇਸ਼ਨ ਵਿੱਚ ‘ਏਕ ਵਿਲੇਨ ਰਿਟਰਨਸ’ ਦੀ ਸ਼ੂਟਿੰਗ ਕਰ ਰਹੀ ਹੈ। ਇਸ ਫਿਲਮ ਵਿੱਚ ਉਹ ਜਾਨ ਅਬਰਾਹਮ, ਅਰਜੁਨ ਕਪੂਰ ਅਤੇ ਦਿਸ਼ਾ ਪਟਾਨੀ ਦੇ ਨਾਲ ਹੈ। ਉਸ ਦੀ ਇਹ ਫਿਲਮ 29 ਜੁਲਾਈ ਨੂੰ ਰਿਲੀਜ਼ ਹੋਵੇਗੀ। ਪੇਸ਼ ਹਨ ਤਾਰਾ ਸੁਤਾਰੀਆ ਨਾਲ ਹੋਈ ਗੱਲਬਾਤ ਦੇ ਕੁਝ ਅੰਸ਼ :
* ‘ਹੀਰੋਪੰਤੀ 2’ ਵਿੱਚ ਟਾਈਗਰ ਸ਼ਰਾਫ ਨਾਲ ਦੂਸਰੀ ਵਾਰ ਕੰਮ ਕਰਨਾ ਤੁਹਾਡੇ ਲਈ ਕਿੰਨਾ ਚੈਲੇਜਿੰਗ ਰਿਹਾ?
-ਬਿਲਕੁਲ ਚੈਲੇਜਿੰਗ ਨਹੀਂ ਸੀ। ਜਦ ਪਹਿਲੀ ਵਾਰ ਉਨ੍ਹਾਂ ਨਾਲ ਸਕਰੀਨ ਸ਼ੇਅਰ ਕਰਨੀ ਸੀ, ਤਦ ਮੈਂ ਬਹੁਤ ਘਬਰਾਈ ਹੋਈ ਸੀ, ਪਰ ਉਨ੍ਹਾਂ ਨੇ ਨਰਵਸਨੈੱਸ ਦੂਰ ਕਰਨ ਵਿੱਚ ਜਿਸ ਤਰ੍ਹਾਂ ਮੇਰੀ ਮਦਦ ਕੀਤੀ, ਉਸ ਦੇ ਬਾਅਦ ਤੋਂ ਉਹ ਮੇਰੇ ਬਹੁਤ ਚੰਗੇ ਦੋਸਤ ਬਣ ਚੁੱਕੇ ਹਨ। ਮੈਂ ਲੱਕੀ ਹਾਂ ਕਿ ਅਸੀਂ ਹਮੇਸ਼ਾ ਦੋਸਤ ਰਹਾਂਗੇ। ਜਦ ਤੁਹਾਡੇ ਨਾਲ ਕੰਮ ਕਰਨ ਵਾਲਾ ਤੁਹਾਡਾ ਦੋਸਤ ਹੋਵੇ ਤਾਂ ਤੁਹਾਨੂੰ ਕੰਮ ਕਰਨ ਵਿੱਚ ਆਸਾਨੀ ਹੁੰਦੀ ਹੈ।
* ਹਰ ਕੋਈ ਜਾਣਦਾ ਹੈ ਕਿ ਟਾਈਗਰ ਸ਼ਰਾਫ ਲਾਜਵਾਬ ਐਕਟਰ ਹੈ। ਉਨ੍ਹਾਂ ਦਾ ਐਕਸ਼ਨ ਸੀਨ ਤਾਂ ਕਮਾਲ ਦੇ ਹੁੰਦੇ ਹਨ, ਪਰ ਇੱਕ ਇਨਸਾਨ ਦੇ ਰੂਪ ਵਿੱਚ ਉਹ ਤੁਹਾਨੂੰ ਕਿਹੋ ਜਿਹੇ ਲੱਗੇ?
-ਟਾਈਗਰ ਬੇਹੱਦ ਸ਼ਰਮੀਲੇ ਹਨ। ਹਰ ਕਿਸੇ ਦਾ ਸਨਮਾਨ ਕਰਨਾ ਅਤੇ ਆਪਣੇ ਕੰਮ ਨਾਲ ਕੰਮ ਰੱਖਣਾ ਉਨ੍ਹਾਂ ਦੇ ਸੁਭਾਅ ਵਿੱਚ ਹੈ। ਉਹ ਜ਼ਿਆਦਾ ਨਹੀਂ ਬੋਲਦੇ। ਦਿਖਾਵਾ ਬਿਲਕੁਲ ਪਸੰਦ ਨਹੀਂ ਹੈ। ਇਸ ਦੇ ਬਾਵਜੂਦ ਆਪਣੇ ਆਲੇ ਦੁਆਲੇ ਵੀ ਨਜ਼ਰ ਰੱਖਦੇ ਹੋਏ ਹਰ ਕਿਸੇ ਤੋਂ ਕੁਝ ਸਿੱਖਣ ਦੀ ਕੋਸ਼ਿਸ਼ ਕਰਦੇ ਹਨ। ਉਨ੍ਹਾਂ ਦਾ ਸੈਂਸ ਆਫ ਹਿਊਮਰ ਕਮਾਲ ਹੈ।
* ਨਵਾਜ਼ੂਦੀਨ ਸਿੱਦੀਕੀ ਬੇਸ਼ੱਕ ਇੱਕ ਚੰਗੇ ਐਕਟਰ ਹਨ, ਪਰ ਅਕਸਰ ਅਭਿਨੇਤਰੀਆਂ ਉਨ੍ਹਾਂ ਦੇ ਨਾਲ ਕੰਮ ਕਰਨ ਤੋਂ ਕਤਰਾਉਂਦੀਆਂ ਹਨ। ਉਨ੍ਹਾਂ ਦੇ ਨਾਲ ਕੰਮ ਕਰਦੇ ਹੋਏ ਤੁਹਾਡਾ ਤਜਰਬਾ ਕਿਸ ਤਰ੍ਹਾਂ ਦਾ ਰਿਹਾ?
- ਇਹ ਸੱਚ ਹੈ ਕਿ ਉਹ ਪ੍ਰਾਈਮਾਫੇਸੀ ਕਾਫੀ ਇੰਟੈਂਸ ਲੱਗਦੇ ਹਨ, ਪਰ ਰੀਅਲ ਲਾਈਫ ਵਿੱਚ ਉਹ ਅਜਿਹੇ ਬਿਲਕੁਲ ਨਹੀਂ। ਫਿਲਮ ਵਿੱਚ ਸਾਡਾ ਬਹੁਤ ਦਿਲਚਸਪ ਤਾਲਮੇਲ ਸੀ। ਫਿਲਮ ਦੌਰਾਨ ਉਨ੍ਹਾਂ ਨੇ ਕਦੇ ਮਹਿਸੂਸ ਨਹੀਂ ਹੋਣ ਦਿੱਤਾ ਕਿ ਉਹ ਇੰਨੇ ਸੀਨੀਅਰ ਐਕਟਰ ਹਨ ਜਾਂ ਉਨ੍ਹਾਂ ਨੇ ਬਹੁਤ ਸਾਰੀਆਂ ਚੰਗੀਆਂ-ਚੰਗੀਆਂ ਫਿਲਮਾਂ ਕੀਤੀਆਂ ਹਨ।
* ਬਚਪਨ ਤੋਂ ਮਿਊਜ਼ਿਕ ਵਿੱਚ ਤੁਹਾਡੀ ਬੇਹੱਦ ਦਿਲਚਸਪੀ ਰਹੀ ਹੈ। ਤੁਸੀਂ ਟ੍ਰੇਂਡ ਸਿੰਗਰ ਹੋ। ਅਭਿਨੇਤਰੀ ਬਣਨ ਦੇ ਬਾਅਦ ਕੀ ਤੁਹਾਡੀ ਉਹ ਹੌਬੀ ਸਾਈਡ ਲਾਈਨ ਹੋ ਚੁੱਕੀ ਹੈ?
- ਬਿਲਕੁਲ ਨਹੀਂ। ਮਿਊਜ਼ਕ ਮੇਰੀ ਜ਼ਿੰਦਗੀ ਦਾ ਇੱਕ ਬਹੁਤ ਅਹਿਮ ਹਿੱਸਾ ਰਿਹਾ ਹੈ। ਇਸ ਨੂੰ ਐਕਸਪਲੋਰ ਕਰਨ ਦਾ ਕੋਈ ਮੌਕਾ ਮੈਂ ਛੱਡਣਾ ਨਹੀਂ ਚਾਹੁੰਦੀ। ਮੈਨੂੰ ਖੁਸ਼ੀ ਹੈ ਕਿ ਮੇਰੀ ਅਗਲੀ ਫਿਲਮ ‘ਏਕ ਵਿਲੇਨ ਰਿਟਰਨ’ ਵਿੱਚ ਮੈਨੂੰ ਮੌਕਾ ਮਿਲਿਆ ਹੈ। ਇਨਫੈਕਟ ਇਸ ਦੇ ਬਾਅਦ ਮੈਂ ਜਿੰਨੀਆਂ ਵੀ ਫਿਲਮਾਂ ਸਾਈਨ ਕਰ ਰਹੀ ਹਾਂ ਉਨ੍ਹਾਂ ਵਿੱਚ ਮੈਂ ਐਕਟਿੰਗ ਦੇ ਨਾਲ-ਨਾਲ ਗਾਉਣ ਦਾ ਵੀ ਫੈਸਲਾ ਕੀਤਾ ਹੈ।