ਟੋਰਾਂਟੋ, 26 ਜੂਨ (ਪੋਸਟ ਬਿਊਰੋ) : ਸ਼ੁੱਕਰਵਾਰ ਰਾਤ ਤੋਂ ਲੈ ਕੇ ਸ਼ਨਿੱਚਰਵਾਰ ਸਵੇਰ ਤੱਕ ਫਾਸਟ ਫੂਡ ਰੈਸਟੋਰੈਂਟਸ ਵਿੱਚ ਇੱਕ ਵਿਅਕਤੀ ਵੱਲੋਂ ਮਾਰੇ ਗਏ ਡਾਕੇ ਤੋਂ ਬਾਅਦ ਪੁਲਿਸ ਵੱਲੋਂ ਉਸ ਦੀ ਭਾਲ ਕੀਤੀ ਜਾ ਰਹੀ ਹੈ।
ਪੁਲਿਸ ਨੇ ਦੱਸਿਆ ਕਿ ਇਹ ਵਾਰਦਾਤ ਰਾਤੀਂ 9:00 ਵਜੇ ਸ਼ੁਰੂ ਹੋਈ ਜਦੋਂ ਇੱਕ ਵਿਅਕਤੀ ਯੰਗ ਸਟਰੀਟ ਤੇ ਫਰੰਟ ਸਟਰੀਟ ਇਲਾਕੇ ਵਿੱਚ ਸਥਿਤ ਇੱਕ ਫਾਸਟ ਫੂਡ ਰੈਸਟੋਰੈਂਟ ਵਿੱਚ ਦਾਖਲ ਹੋਇਆ ਤੇ ਉਸ ਨੇ ਹਥਿਆਰ ਵਿਖਾ ਕੇ ਸਟਾਫ ਤੋਂ ਭਾਰੀ ਰਕਮ ਲੁੱਟ ਲਈ। ਪਰ ਇਹ ਜਾਣਕਾਰੀ ਨਹੀਂ ਮਿਲ ਸਕੀ ਕਿ ਉਹ ਕਿੰਨੀ ਨਕਦੀ ਲੈ ਗਿਆ।
ਇਸ ਤੋਂ ਬਾਅਦ ਕੁਈਨ ਸਟਰੀਟ ਵੈਸਟ ਤੇ ਬੈਵਰਲੀ ਸਟਰੀਟ, ਡੰਡਸ ਸਟਰੀਟ ਵੈਸਟ ਤੇ ਮੈਨਿੰਗ ਐਵਨਿਊ ਤੇ ਬਾਥਰਸਟ ਸਟਰੀਟ ਉੱਤੇ ਵੀ ਸਵੇਰ ਦੇ 4:00 ਵਜੇ ਤੋਂ ਲੈ ਕੇ 5:00 ਵਜੇ ਦਰਮਿਆਨ ਇਸ ਤਰ੍ਹਾਂ ਦੇ ਤਿੰਨ ਹੋਰ ਡਾਕਿਆਂ ਦੀ ਜਾਣਕਾਰੀ ਪੁਲਿਸ ਨੂੰ ਦਿੱਤੀ ਗਈ।ਪੁਲਿਸ ਦਾ ਮੰਨਣਾ ਹੈ ਕਿ ਇਨ੍ਹਾਂ ਚਾਰੇ ਡਾਕਿਆਂ ਲਈ ਇੱਕੋ ਵਿਅਕਤੀ ਜਿ਼ੰਮੇਵਾਰ ਹੈ।
ਇਸ ਦੌਰਾਨ ਕਿਸੇ ਵਿਅਕਤੀ ਦੇ ਜ਼ਖ਼ਮੀ ਹੋਣ ਦੀ ਕੋਈ ਖਬਰ ਨਹੀਂ ਹੈ। ਪੁਲਿਸ ਹੁਣ 25 ਤੋਂ 30 ਸਾਲ ਦਰਮਿਆਨ ਗੋਰੇ ਵਿਅਕਤੀ ਦੀ ਭਾਲ ਕਰ ਰਹੀ ਹੈ, ਜਿਸ ਦਾ ਕੱਦ 5 ਫੁੱਟ 6 ਇੰਚ ਹੋ ਸਕਦਾ ਹੈ ਤੇ ਉਸ ਦੇ ਨਿੱਕੇ ਕਾਲੇ ਵਾਲ ਹਨ ਤੇ ਉਸ ਨੇ ਚਿੱਟੀ ਟੀ-ਸ਼ਰਟ ਤੇ ਆਫ-ਵ੍ਹਾਈਟ ਪੈਂਟ ਪਾਈ ਹੋਈ ਸੀ।