ਟੋਰਾਂਟੋ, 20 ਜੂਨ (ਪੋਸਟ ਬਿਊਰੋ) : ਇੱਕ ਨਵੇਂ ਸਰਵੇਖਣ ਵਿੱਚ ਸਾਹਮਣੇ ਆਇਆ ਹੈ ਕਿ ਕੈਨੇਡੀਅਨ ਇੰਪਲੌਇਰਜ਼ ਕਿਸੇ ਵੀ ਤਜ਼ਰਬੇ ਤੋਂ ਬਿਨਾਂ ਵਰਕਰਜ਼ ਨੂੰ ਹਾਇਰ ਕਰਨ ਲਈ ਤਿਆਰ ਹਨ। ਅਜਿਹਾ ਲੇਬਰ ਮਾਰਕਿਟ ਵਿੱਚ ਆਈ ਤੰਗੀ ਕਾਰਨ ਕੀਤਾ ਜਾ ਰਿਹਾ ਹੈ।
ਅੱਜ ਜਾਰੀ ਕੀਤੀ ਗਈ ਰਿਸਰਚ ਵਿੱਚ ਆਖਿਆ ਗਿਆ ਕਿ ਪਹਿਲਾਂ ਕਈ ਅਹੁਦਿਆਂ ਲਈ ਜਿੱਥੇ ਤਜ਼ਰਬਾ ਤੇ ਸਿੱਖਿਆ ਦੀ ਅਹਿਮ ਥਾਂ ਹੁੰਦੀ ਸੀ ਹੁਣ ਲੇਬਰ ਦੀ ਘਾਟ ਕਾਰਨ ਇਸ ਦੀ ਕੋਈ ਖਾਸ ਅਹਿਮੀਅਤ ਨਹੀਂ ਰਹਿ ਗਈ ਹੈ। ਇੰਪਲੌਇਮੈਂਟ ਵੈੱਬਸਾਈਟ ਇੰਡੀਡ ਲਈ ਸੈਂਸਸਵਾਈਡ ਵੱਲੋਂ ਆਨਲਾਈਨ ਕਰਵਾਏ ਗਏ ਸਰਵੇਖਣ ਵਿੱਚ ਇਹ ਨਤੀਜੇ ਸਾਹਮਣੇ ਆਏ। ਇਸ ਸਰਵੇਖਣ ਵਿੱਚ ਕੈਨੇਡਾ ਭਰ ਦੇ 1,000 ਇੰਪਲੌਇਰਜ਼ ਨੇ ਹਿੱਸਾ ਲਿਆ।
ਸਰਵੇਖਣ ਵਿੱਚ ਪਾਇਆ ਗਿਆ ਕਿ 77 ਫੀ ਸਦੀ ਕੈਨੇਡੀਅਨ ਇੰਪਲੌਇਰਜ਼ ਅਜਿਹੇ ਉਮੀਦਵਾਰਾਂ ਨੂੰ ਨੌਕਰੀ ਦੇਣੀ ਚਾਹੁੰਦੇ ਹਨ ਜਿਨ੍ਹਾਂ ਦੇ ਇੰਟਰਪਰਸਨਲ ਸਕਿੱਲਜ਼ ਵਧੀਆ ਹੋਣ ਤੇ ਜਿਨ੍ਹਾਂ ਵਿੱਚ ਕੁੱਝ ਨਵਾਂ ਸਿੱਖਣ ਦੀ ਚਾਹ ਹੋਵੇ। ਇਹ ਵੀ ਪਾਇਆ ਗਿਆ ਕਿ ਪੰਜ ਵਿੱਚੋਂ ਚਾਰ ਇੰਪਲੌਇਰਜ਼ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੀ ਕੰਪਨੀ ਉਨ੍ਹਾਂ ਬਿਨੈਕਾਰਾਂ ਨੂੰ ਹਾਇਰ ਕਰਨ ਉੱਤੇ ਵਿਚਾਰ ਕਰੇਗੀ ਜਿਨ੍ਹਾਂ ਕੋਲ ਨੌਕਰੀ ਲਈ ਕੋਈ ਡਿਗਰੀ ਜਾਂ ਸਰਟੀਫਿਕੇਸ਼ਨ ਨਾ ਹੋਵੇ ਸਗੋਂ ਉਨ੍ਹਾਂ ਵੱਲੋਂ ਨਵੇਂ ਵਰਕਰਜ਼ ਨੂੰ ਕੰਮ ਉੱਤੇ ਮੁਹੱਈਆ ਕਰਵਾਈ ਜਾਣ ਵਾਲੀ ਟਰੇਨਿੰਗ ਦੇ ਉਹ ਚਾਹਵਾਨ ਹੋਣ।
ਉਮੀਦਵਾਰਾਂ ਨੂੰ ਲੱਭਣ ਵਿੱਚ ਪੇਸ਼ ਆ ਰਹੀਆਂ ਚੁਣੌਤੀਆਂ ਕਾਰਨ ਸਰਵੇਖਣ ਵਿੱਚ ਪਾਇਆ ਗਿਆ ਕਿ ਇੰਪਲੌਇਰਜ਼ ਤਜਰਬੇ ਵਾਲੇ ਨੁਕਤੇ ਨੂੰ ਵੀ ਪਾਸੇ ਰੱਖਣ ਲਈ ਤਿਆਰ ਹਨ।