ਬੇਰਹਾਮਪੁਰ, 23 ਮਈ (ਪੋਸਟ ਬਿਊਰੋ)- ਓਡੀਸ਼ਾ ਦੇ ਗੰਜਾਮ ਜ਼ਿਲ੍ਹੇ ਵਿੱਚ 35 ਸਾਲਾ ਆਟੋ ਰਿਕਸ਼ਾ ਡਰਾਈਵਰ ਨੇ ਇੱਕ ਮਹਿਲਾ ਨੂੰ ਕਰੀਬ 1.6 ਲੱਖ ਰੁਪਏ ਦਾ ਉਸਦਾ ਸੋਨੇ ਦਾ ਹਾਰ ਵਾਪਸ ਕਰ ਕੇ ਵਾਹ-ਵਾਹੀ ਖੱਟੀ ਹੈ।
ਪਤਾ ਲੱਗਾ ਹੈ ਕਿ ਇਹ ਮਹਿਲਾ ਕੁਝ ਦਿਨ ਪਹਿਲਾਂ ਗ਼ਲਤੀ ਨਾਲ ਆਟੋ ਰਿਕਸ਼ਾ ਵਿੱਚ ਇੱਕ ਹਾਰ ਛੱਡ ਗਈ ਸੀ। ਆਟੋ ਰਿਕਸ਼ਾ ਡਰਾਈਵਰ ਨੂੰ ਕੱਲ੍ਹ ਆਪਣੇ ਆਟੋ ਦੀ ਸਫ਼ਾਈ ਵੇਲੇ ਯਾਤਰੀ ਸੀਟ ਦੇ ਹੇਠਾਂ ਲੱਗਭਗ 30 ਗ੍ਰਾਮ ਦਾ ਹਾਰ ਮਿਲਿਆ। ਉਸ ਨੇ ਪੁਲਸ ਅਧਿਕਾਰੀਆਂ ਤੇ ਸਥਾਨਕ ਆਟੋ ਡਰਾਈਵਰ ਐਸੋਸੀਏਸ਼ਨ ਦੇ ਕੁਝ ਮੈਂਬਰਾਂ ਦੀ ਹਾਜ਼ਰੀ ਵਿੱਚ ਮਹਿਲਾ ਨਰਮਦਾ ਨੂੰ ਇਹ ਹਾਰ ਸੌਂਪ ਦਿੱਤਾ। ਆਟੋ ਰਿਕਸ਼ਾ ਡਰਾਈਵਰ ਇਸ 30 ਸਾਲਾ ਮਹਿਲਾ ਤੇ ਉਸ ਦੇ ਪਰਵਾਰਕ ਮੈਂਬਰਾਂ ਨੂੰ ਨਿਊ ਬੱਸ ਸਟੈਂਡ ਤੋਂ ਗੋਪਾਲਪੁਰ ਲੈ ਗਿਆ ਸੀ।ਮਹਿਲਾ ਨੇ ਸੋਨੇ ਦਾ ਹਾਰ ਆਪਣੇ ਪਰਸ ਵਿੱਚ ਰੱਖਿਆ ਸੀ, ਪਰ ਗਲਤੀ ਨਾਲ ਆਟੋ ਰਿਕਸ਼ਾ ਵਿੱਚ ਡਿੱਗ ਗਿਆ, ਜਿਸ ਦਾ ਮਹਿਲਾ ਨੂੰ ਪਤਾ ਨਹੀਂ ਲੱਗਾ। ਘਰ ਪਹੁੰਚਣ ਮਗਰੋਂ ਉਸ ਨੂੰ ਪਤਾ ਲੱਗਾ ਕਿ ਹਾਰ ਉਸਦੇ ਪਰਸ ਵਿੱਚ ਨਹੀਂ ਸੀ। ਉਸ ਨੇ ਆਟੋ ਰਿਕਸ਼ਾ ਡਰਾਈਵਰ ਨੂੰ ਫ਼ੋਨ ਕੀਤਾ, ਜਿਸ ਨੂੰ ਉਹ ਪਹਿਲਾਂ ਤੋਂ ਜਾਣਦੀ ਸੀ। ਉਸ ਨੇ ਆਟੋ ਵਿੱਚ ਵੇਖਿਆ, ਪਰ ਉਸ ਦਿਨ ਹਾਰ ਨਹੀਂ ਮਿਲਿਆ।ਆਟੋ ਦੀ ਸਫਾਈ ਦੌਰਾਨ ਹਾਰ ਮਿਲਣ ਮਗਰੋਂ ਪੁਲਸ ਅਤੇ ਮਹਿਲਾ ਦੇ ਪਰਵਾਰ ਨੂੰ ਸੂਚਿਤ ਕੀਤਾ।