ਨਵੀਂ ਦਿੱਲੀ, 23 ਮਈ (ਪੋਸਟ ਬਿਊਰੋ)- ਅੱਗੇ ਤੋਂ ਦਿੱਲੀ ਵਿੱਚ ਕੁਤਬ ਮੀਨਾਰ ਕੰਪਲੈਕਸ ਵਿੱਚ ਨਮਾਜ਼ ਅਦਾ ਨਹੀਂ ਹੋ ਸਕੇਗੀ। ਭਾਰਤੀ ਪੁਰਾਤੱਤਵ ਸਰਵੇਖਣ (ਏ ਐਸ ਆਈ) ਨੇ ਕੁਤਬ ਮੀਨਾਰ ਕੰਪਲੈਕਸ ਵਿੱਚ ਨਮਾਜ਼ ਉੱਤੇ ਪਾਬੰਦੀ ਲਾ ਦਿੱਤੀ ਹੈ। ਪਿਛਲੇ ਚਾਰ ਦਿਨ ਤੋਂ ਨਮਾਜ਼ ਬੰਦ ਹੈ। ਏ ਐਸ ਆਈ ਨੇ ਇੱਥੇ ਨਮਾਜ਼ ਪੜ੍ਹਨ ਵਾਲਿਆਂ ਤੋਂ ਮਨਜ਼ੂਰੀ ਪੱਤਰ ਜਾਂ ਇਸ ਨਾਲ ਸਬੰਧਤ ਹੋਰ ਦਸਤਾਵੇਜ਼ ਮੰਗਿਆ ਸੀ, ਜਿਸ ਨੂੰ ਉਹ ਲੋਕ ਨਹੀਂ ਦੇ ਸਕੇ। ਇਸ ਪਿੱਛੋਂ ਇੱਥੇ ਮੁਗਲਾਂ ਦੇ ਸਮੇਂ ਤੋਂ ਚੱਲਦੀ ਨਮਾਜ਼ਪੜ੍ਹਨੀ ਬੰਦ ਕਰਾਈ ਗਈ ਹੈ। ਇਸ ਮਸਜਿਦ ਦੇ ਨਾਲ ਹੀ ਕੁਤਬ ਮੀਨਾਰ ਅਤੇ ਕੁੱਵਤ-ਉਲ-ਇਸਲਾਮ ਮਸਜਿਦ ਹੈ, ਇਨ੍ਹਾਂ ਦਾ ਵਿਵਾਦ ਵਧਣ ਉੱਤੇ ਏ ਐਸ ਆਈ ਨੇ ਇਹ ਫੈਸਲਾ ਲਿਆ ਹੈ।
ਮਹਿਰੌਲੀ ਵਿੱਚ ਕੁਤਬ ਮੀਨਾਰ ਦੀ ਹੋਂਦ ਬਾਰੇ ਵਿਵਾਦ ਚੱਲ ਰਿਹਾ ਹੈ। ਪੁਰਾਤੱਤਵ ਮਾਹਰਾਂ ਅਤੇ ਇਤਿਹਾਸਕਾਰਾਂ ਦਾ ਇੱਕ ਵਰਗ ਇਸ ਨੂੰ ਚੰਦਰਗੁਪਤ ਵਿਕਰਮਾਦਿੱਤ ਦੇ ਸਮੇਂ ਦਾ ਅੱਜ ਤੋਂ ਕਰੀਬ 1600 ਸਾਲ ਪਹਿਲਾਂ ਦਾ ਮੰਨਦਾ ਹੈ, ਜਦ ਕਿ ਦੂਸਰਾ ਵਰਗ ਕਹਿੰਦਾ ਹੈ ਕਿ ਇਸ ਨੂੰ ਕੁਤਬਦੀਨ ਐਬਕ ਨੇ 1192 ਵਿੱਚ ਬਣਵਾਇਆ ਸੀ। ਇੱਥੇ ਕੁੱਵਤ-ਉਲ-ਇਸਲਾਮ ਮਸਜਿਦ ਉੱਤੇ ਲੱਗੀਆਂ ਮੂਰਤੀਆਂ ਬਾਰੇ ਵੀ ਵਿਵਾਦ ਹੈ। ਕੁਝ ਦਿਨ ਪਹਿਲਾਂ ਹੀ ਹਿੰਦੂ ਸੰਗਠਨ ਉਥੇ ਹਨੂਮਾਨ ਚਾਲੀਸਾ ਪੜ੍ਹਨ ਜਾਣ ਲਈ ਕੋਸ਼ਿਸ਼ ਕਰ ਚੁੱਕੇ ਹਨ, ਪਰ ਉਨ੍ਹਾਂ ਨੂੰ ਕੁਤਬ ਮੀਨਾਰ ਕੰਪਲੈਕਸ ਵਿੱਚ ਵੜਨ ਨਹੀਂ ਦਿੱਤਾ ਗਿਆ। ਹਿੰਦੂ ਸੰਗਠਨ ਮੰਗ ਕਰਦੇ ਹਨ ਕਿ ਮਸਜਿਦ ਵਿੱਚ ਮੂਰਤੀਆਂ ਲੱਗੀਆਂ ਹਨ ਤਾਂ ਉਨ੍ਹਾਂ ਨੂੰ ਉਥੇ ਪੂਜਾ-ਪਾਠ ਕਰਨ ਦੀ ਇਜਾਜ਼ਤ ਦਿੱਤੀ ਜਾਏ।ਕੁਤਬ ਮੀਨਾਰ ਵਿੱਚ 2006 ਦੇ ਕਰੀਬ ਇੰਚਾਰਜ ਰਹੇ ਸੇਵਾਮੁਕਤ ਅਧਿਕਾਰੀ ਕਹਿੰਦੇ ਹਨ ਕਿ ਇਸ ਮਸਜਿਦ ਵਿੱਚ ਨਮਾਜ਼ ਪੜ੍ਹਨ ਦੀ ਇਜਾਜ਼ਤ ਕਦੋਂ ਦਿੱਤੀ ਗਈ, ਇਹ ਉਨ੍ਹਾਂ ਨੂੰ ਨਹੀਂ ਪਤਾ। ਓਦੋਂ ਉਨ੍ਹਾਂ ਨੇ ਉਥੋਂ ਦੇ ਇਮਾਮ ਤੋਂ ਪੁੱਛਿਆ ਸੀ ਕਿ ਜੇ ਉਨ੍ਹਾਂ ਕੋਲ ਨਮਾਜ਼ ਪੜ੍ਹਨ ਦੀ ਇਜਾਜ਼ਤ ਦਾ ਹੁਕਮ ਹੈ ਤਾਂ ਦਿਖਾਉਣ, ਪਰ ਉਹ ਕੋਈ ਪੱਤਰ ਦਿਖਾ ਨਹੀਂ ਸਕੇ। ਕੁਤਬ ਮੀਨਾਰ ਕੰਪਲੈਕਸ ਵਿੱਚ ਖੁਦਾਈ ਕਰਾਏ ਜਾਣ ਦੀਆਂ ਖਬਰਾਂ ਉੱਤੇ ਕੇਂਦਰੀ ਸਭਿਆਚਾਰਕ ਮੰਤਰੀ ਜੀ ਕਿਸ਼ਨ ਰੈਡੀ ਨੇ ਕਿਹਾ ਕਿ ਫਿਲਹਾਲ ਅਜਿਹੀ ਕੋਈ ਯੋਜਨਾ ਨਹੀਂ ਹੈ।