ਜੋਧਪੁਰ, 22 ਮਈ (ਪੋਸਟ ਬਿਊਰੋ)- ਪਾਕਿਸਤਾਨੀ ਫੌਜ ਦੀਆਂ ਖੁਫੀਆ ਏਜੰਸੀ ਦੇ ਹਨੀ ਟਰੈਪ ਵਿੱਚ ਫਸੇ ਜੋਧਪੁਰ ਮਿਲਟਰੀ ਖੇਤਰ ਦੇ ਇੱਕ ਜਵਾਨ ਨੇ ਅਹਿਮ ਫੌਜੀ ਸੂਚਨਾਵਾਂ ਲੀਕ ਕਰ ਦਿੱਤੀਆਂ। ਉਸ ਨੇ ਪਾਕਿਸਤਾਨੀ ਔਰਤ ਏਜੰਟ ਨੂੰ ਲੋਕਲ ਮੋਬਾਈਲ ਸਿਮ ਲੈ ਕੇ ਉਸ ਦੇ ਨੰਬਰ ਸ਼ੇਅਰ ਕਰ ਦਿੱਤੇ। ਇਨ੍ਹਾਂ ਨੰਬਰਾਂ ਤੇ ਸੋਸ਼ਲ ਮੀਡੀਆ ਰਾਹੀਂ ਕੁਝ ਹੋਰ ਜਵਾਨਾਂ ਦੇ ਵੀ ਫਸਣ ਦਾ ਸ਼ੱਕ ਹੈ। ਇਸ ਜਵਾਨ ਨੂੰ ਰਾਜਸਥਾਨ ਪੁਲਸ ਦੀ ਸੀ ਆਈ ਡੀ (ਇੰਟੈਲੀਜੈਂਸ) ਯੂਨਿਟ ਨੇ 18 ਮਈ ਨੂੰ ਜੋਧਪੁਰ ਰੇਲਵੇ ਸਟੇਸ਼ਨ ਦੇ ਬਾਹਰੋਂ ਫੜਿਆ ਹੈ।
ਦੋਸ਼ੀ ਜਵਾਨ ਨੇ ਪੁੱਛਗਿੱਛ ਵਿੱਚ ਦੱਸਿਆ ਕਿ ਪਾਕਿਸਤਾਨੀ ਔਰਤ ਏਜੰਟ ਨੇ ਮੱਧ ਪ੍ਰਦੇਸ਼ ਦੀ ਵਾਸੀ ਤੇ ਮਿਲਟਰੀ ਨਰਸਿੰਗ ਸਰਵਿਸ (ਐਮ ਐਨ ਐਸ) ਦੀ ਨਰਸ ਬਣ ਕੇ ਉਸ ਨੂੰ ਦੋਸਤੀ ਵਿੱਚ ਫਸਾਇਆ। ਹਨੀ ਟਰੈਪ ਵਿੱਚ ਫਸਿਆ ਰੁੜਕੀ (ਉਤਰਾਖੰਡ) ਦਾ 24 ਸਾਲਾ ਪ੍ਰਦੀਪ ਕੁਮਾਰ ਤਿੰਨ ਸਾਲ ਪਹਿਲਾਂ ਫੌਜੀ ਭਰਤੀ ਹੋਇਆ ਸੀ। ਉਸ ਦੀ ਪੋਸਟਿੰਗ ਜੋਧਪੁਰ ਵਿੱਚ ਫੌਜ ਦੀ ਸੰਵੇਦਨਸ਼ੀਲ ਰੈਜ਼ੀਮੈਂਟ ਵਿੱਚ ਹੋਈ। ਸੱਤ ਮਹੀਨੇ ਪਹਿਲਾਂ ਅਣਜਾਣ ਔਰਤ ਦਾ ਫੋਨ ਆਇਆ। ਉਸ ਦੇ ਬਾਅਦ ਦੋਸਤੀ ਹੋਈ। ਔਰਤ ਨੇ ਪ੍ਰਦੀਪ ਨੂੰ ਵਿਆਹ ਦਾ ਝਾਂਸਾ ਦੇ ਕੇ ਭਾਰਤੀ ਫੌਜ ਦੇ ਗੁਪਤ ਦਸਤਾਵੇਜ਼ਾਂ ਦੀਆਂ ਤਸਵੀਰਾਂ ਮੰਗੀਆਂ। ਇਸ ਉੱਤੇ ਪ੍ਰਦੀਪ ਨੇ ਕਈ ਵਾਰ ਯੂਨਿਟ ਦੀਆਂ ਅਹਿਮ ਸੂਚਨਾਵਾਂ ਸ਼ੇਅਰ ਕਰ ਦਿੱਤੀਆਂ।