ਨਵੀਂ ਦਿੱਲੀ, 19 ਮਈ (ਪੋਸਟ ਬਿਊਰੋ)- ਸੀ ਬੀ ਆਈ ਨੇ ਪੰਜਾਹ ਲੱਖ ਰੁਪਏ ਦੇ ਰਿਸ਼ਵਤਖੋਰੀ ਕੇਸ ਵਿੱਚ ਲੋਕ ਸਭਾ ਮੈਂਬਰ ਕਾਰਤੀ ਚਿਦੰਬਰਮ ਦੇ ਨੇੜਲੇ ਸਾਥੀ ਐਸ ਭਾਸਕਰਰਾਮਨ ਨੂੰ ਗ੍ਰਿਫਤਾਰ ਕੀਤਾ ਹੈ।
ਅਧਿਕਾਰੀਆਂ ਮੁਤਾਬਕ ਕਾਰਤੀਚਿਦੰਬਰਮਉਤੇ ਪੰਜਾਬ ਦੇ ਤਲਵੰਡੀ ਸਾਬੋ ਵਾਲੇ ਪਾਵਰ ਲਿਮਟਿਡ ਵਿੱਚ ਕੰਮ ਕਰਨ ਵਾਸਤੇ 263 ਚੀਨੀ ਨਾਗਰਿਕਾਂ ਨੂੰ ਵੀਜ਼ੇ ਦਿਵਾਉਣ ਸਬੰਧੀ ਰਿਸ਼ਵਤ ਲੈਣ ਦਾ ਦੋਸ਼ ਲੱਗਾ ਹੈ।ਸੀ ਬੀ ਆਈ ਨੇ ਭਾਸਕਰਰਾਮਨ ਤੋਂ ਬੀਤੀ ਦੇਰ ਰਾਤ ਪੁੱਛਗਿੱਛ ਸ਼ੁਰੂ ਕੀਤੀ ਅਤੇ ਕੱਲ੍ਹ ਤੜਕੇਗ੍ਰਿਫਤਾਰ ਕਰ ਲਿਆ। ਜਾਂਚ ਏਜੰਸੀ ਨੇ ਕਿਹਾ ਕਿ ਭਾਸਕਰਰਾਮਨਕੋਲ ਤਲਵੰਡੀ ਸਾਬੋ ਪਾਵਰ ਪਲਾਂਟ ਦੇ ਓਦੋਂ ਦੇ ਸਹਾਇਕ ਮੀਤ ਪ੍ਰਧਾਨ ਵਿਕਾਸ ਮਖਾਰੀਆ ਨੇ ਪਹੁੰਚ ਕੀਤੀ ਸੀ ਤਾਂ ਜੋ ਪਾਵਰ ਪਲਾਂਟ ਵਿੱਚ ਕੰਮ ਲਈ 263 ਚੀਨੀ ਕਾਮਿਆਂ ਨੂੰ ਵੀਜ਼ੇ ਦਿਵਾਏ ਜਾ ਸਕਣ। ਸੀ ਬੀ ਆਈ ਵੱਲੋਂ ਦਰਜ ਕੀਤੇ ਕੇਸ ਵਿੱਚ ਕਿਹਾ ਗਿਆ ਕਿ ਮਖਾਰੀਆ ਨੇ ਭਾਸਕਰਰਾਮਨ ਰਾਹੀਂ ਕਾਰਤੀ ਤਕ ਪਹੁੰਚ ਬਣਾਈ ਸੀ। ਅਧਿਕਾਰੀਆਂ ਨੇ ਕਿਹਾ ਕਿ ਪ੍ਰੋਜੈਕਟ ਵੀਜ਼ਿਆਂ ਦੀ ਤੈਅ ਹੱਦ ਦਾ ਤੋੜ ਕੱਢਣ ਲਈ ਚੋਰ ਮੋਰੀ ਲੱਭੀ ਗਈ। ਪ੍ਰੋਜੈਕਟ ਵੀਜ਼ੇ ਪਾਵਰ ਅਤੇ ਸਟੀਲ ਸੈਕਟਰ ਲਈ 2010 ਵਿੱਚ ਸ਼ੁਰੂ ਕੀਤੇ ਸਨ ਜਿਸ ਵਾਸਤੇ ਓਦੋਂ ਗ੍ਰਹਿ ਮੰਤਰੀ ਪੀ ਚਿਦੰਬਰਮ ਨੇ ਦਿਸ਼ਾ ਨਿਰਦੇਸ਼ ਜਾਰੀ ਕੀਤੇ ਸਨ, ਪਰ ਪ੍ਰੋਜੈਕਟ ਵੀਜ਼ੇ ਮੁੜ ਜਾਰੀ ਕਰਨ ਬਾਰੇ ਕੋਈ ਪ੍ਰਬੰਧ ਨਹੀਂ ਕੀਤਾ। ਅਫਸਰਾਂ ਨੇ ਕਿਹਾ ਕਿ ਮਖਾਰੀਆ ਨੇ 30 ਜੂਨ 2011 ਵਿੱਚ ਕੇਂਦਰੀ ਗ੍ਰਹਿ ਮੰਤਰਾਲੇ ਨੂੰ ਆਪਣੀ ਕੰਪਨੀ ਲਈ ਅਲਾਟ ਕੀਤੇ ਪ੍ਰੋਜੈਕਟ ਵੀਜ਼ੇ ਮੁੜ ਵਰਤਣ ਦੀ ਪ੍ਰਵਾਨਗੀ ਲਈ ਚਿੱਠੀ ਲਿਖੀ, ਜਿਸ ਨੂੰ ਇੱਕ ਮਹੀਨੇ ਦੇ ਅੰਦਰ ਪ੍ਰਵਾਨਗੀ ਮਿਲ ਗਈ ਸੀ।