ਨਵੀਂ ਦਿੱਲੀ, 13 ਮਈ (ਪੋਸਟ ਬਿਊਰੋ)- ਭਾਰਤੀ ਹਵਾਈ ਫ਼ੌਜ ਦੇ ਇੱਕ ਸਾਰਜੈਂਟ ਨੂੰ ਰੱਖਿਆ ਅਦਾਰੇ ਅਤੇ ਮੁਲਾਜ਼ਮਾਂ ਬਾਰੇ ਖੁਫੀਆ ਜਾਣਕਾਰੀ ਇੱਕ ਪਾਕਿਸਤਾਨੀ ਏਜੰਟ ਨੂੰ ਦੇਣ ਦੇ ਦੋਸ਼ ਵਿੱਚ ਗ਼੍ਰਿਫ਼ਤਾਰ ਕੀਤਾ ਗਿਆ ਹੈ। ਦੋਸ਼ੀ ਦੀ ਪਛਾਣ 32 ਸਾਲਾ ਦੇਵੇਂਦਰ ਨਾਰਾਇਣ ਸ਼ਰਮਾ ਦੇ ਤੌਰ ਉੱਤੇ ਕੀਤੀ ਗਈ ਹੈ ਜੋ ਇੱਥੇ ਸੁਬ੍ਰਤੋ ਪਾਰਕ ਵਿੱਚ ਭਾਰਤੀ ਹਵਾਈ ਫ਼ੌਜ ਦੇ ਰਿਕਾਰਡ ਦਫ਼ਤਰ ਵਿੱਚ ਪ੍ਰਬੰਧਕੀ ਸਹਾਇਕ ਵਜੋਂ ਕੰਮ ਕਰ ਰਿਹਾ ਸੀ।
ਸ਼ਰਮਾ ਨੂੰ ਇੱਕ ਮਹਿਲਾ ਨੇ ਆਪਣੇ ਜਾਲ ਵਿੱਚ ਫ਼ਸਾਇਆ ਅਤੇ ਉਸ ਨੇ ਮਹਿਲਾ ਨੂੰ ਮੁਲਾਜ਼ਮਾਂ, ਰਾਸ਼ਟਰੀ ਸੁਰੱਖਿਆ ਅਤੇ ਰੱਖਿਆ ਨਾਲ ਜੁੜੇ ਖ਼ੁਫ਼ੀਆ ਦਸਤਾਵੇਜ਼ ਦਿੱਤੇ ਸਨ। ਦਿੱਲੀ ਪੁਲਸ ਦੀ ਅਪਰਾਧ ਸ਼ਾਖਾ ਨੇ ਛੇ ਮਈ ਨੂੰ ਦੁਸ਼ਮਣ ਦੇਸ਼ ਦੀ ਏਜੰਟ ਨੂੰ ਵਟਸਐਪ ਰਾਹੀਂ ਖ਼ੁਫ਼ੀਆ ਜਾਣਕਾਰੀ ਲੀਕ ਕਰਨ ਲਈ ਸਾਰਜੈਂਟ ਨੂੰ ਗ਼੍ਰਿਫ਼ਤਾਰ ਕੀਤਾ ਸੀ। ਸਾਰਜੈਂਟ ਨੂੰ ਛੇ ਮਈ ਨੂੰ ਗ਼੍ਰਿਫ਼ਤਾਰ ਕੀਤਾ ਗਿਆ ਅਤੇ ਅਹੁਦੇ ਤੋਂ ਸਸਪੈਂਡ ਕਰ ਦਿੱਤਾ ਗਿਆ ਹੈ।