ਬੈਂਗਲੁਰੂ, 13 ਫਰਵਰੀ, (ਪੋਸਟ ਬਿਊਰੋ)- ਇੰਡੀਅਨ ਪ੍ਰੀਮੀਅਰ ਲੀਗ (ਆਈਪੀਐੱਲ) ਦੀ ਮੈਗਾ ਨਿਲਾਮੀ ਲਈਅੱਜ ਦੂਸਰੇ ਦਿਨ ਐਤਵਾਰ ਨੂੰ ਸਭ ਤੋਂ ਮਹਿੰਗੇ ਵਿਕਣ ਵਾਲੇ ਖਿਡਾਰੀ ਇੰਗਲੈਂਡ ਦੇ ਬੱਲੇਬਾਜ਼ ਲਿਆਮ ਲਿਵਿੰਗਸਟੋਨ ਰਹੇ। ਉਨ੍ਹਾਂ ਨੂੰ ਪੰਜਾਬ ਕਿੰਗਜ਼ ਟੀਮ ਨੇ 11 ਕਰੋੜ 50 ਲੱਖ ਰੁਪਏ ਵਿਚ ਆਪਣੇ ਨਾਲ ਜੋੜਿਆ ਹੈ। ਇਸ ਟੀਮ ਨੇ ਵੈਸਟਇੰਡੀਜ਼ ਦੇ ਤੇਜ਼ ਗੇਂਦਬਾਜ਼ ਓਡੀਅਨ ਸਮਿਥ ਲਈ ਵੀ ਛੇ ਕਰੋੜ ਰੁਪਏ ਖ਼ਰਚੇ ਹਨ।
ਅੱਜ ਐਤਵਾਰ ਨੂੰ ਖੱਬੇ ਹੱਥ ਦੇ ਭਾਰਤ ਦੇ ਦੂਸਰੇ ਦਰਜੇ ਦੇ ਗੇਂਦਬਾਜ਼ ਖਲੀਲ ਅਹਿਮਦ ਤੇ ਚੇਤਨ ਸਕਾਰੀਆ ਲਈ ਵੀ ਫਰੈਂਚਾਈਜ਼ੀ ਨੇ ਚੰਗੀ ਬੋਲੀ ਲਾਈ। ਖਲੀਲ ਪੰਜ ਕਰੋੜ 25 ਲੱਖ ਰੁਪਏ ਅਤੇ ਸਕਾਰੀਆ ਚਾਰ ਕਰੋੜ 20 ਲੱਖ ਰੁਪਏ ਦੇ ਵਿਕੇ। ਹੋਰ ਭਾਰਤੀ ਖਿਡਾਰੀਆਂ ਵਿੱਚੋਂ ਹਰਫ਼ਨਮੌਲਾ ਸ਼ਿਵਮ ਦੁਬੇ ਨੂੰ ਛੱਕੇ ਮਾਰਨ ਦੀ ਯੋਗਤਾ ਕਾਰਨ ਚੇਨਈ ਸੁਪਰ ਕਿੰਗਜ਼ (ਸੀਐੱਸਕੇ) ਨੇ ਚਾਰ ਕਰੋੜ ਰੁਪਏ ਵਿੱਚ ਆਪਣੇ ਨਾਲ ਜੋੜਿਆ ਅਤੇ ਗੁਜਰਾਤ ਟਾਈਟਨਜ਼ ਨੇ ਭਾਰਤੀ ਟੀਮਵਿੱਚੋਂ ਬਾਹਰ ਹੋਏ ਪਏ ਹਰਫ਼ਨਮੌਲਾ ਵਿਜੇ ਸ਼ੰਕਰ ਨੂੰ ਇਕ ਕਰੋੜ 40 ਲੱਖ ਰੁਪਏ ਦਾ ਖ਼ਰੀਦ ਕਰ ਲਿਆ।ਗੁਜਰਾਤ ਟਾਈਟਨਜ਼ ਨੇ ਨੌਜਵਾਨ ਸਟਾਰ ਯੱਸ਼ ਦਿਆਲ ਨੂੰ 3.20 ਕਰੋੜ ਦਾ ਖ਼ਰੀਦਿਆ। ਪ੍ਰਯਾਗਰਾਜ ਦੇ ਯੱਸ਼ ਦਿਆਲ ਖੱਬੇ ਹੱਥ ਦੇ ਤੇਜ਼ ਗੇਂਦਬਾਜ਼ ਹਨ ਅਤੇ ਉੱਤਰ ਪ੍ਰਦੇਸ਼ ਲਈ ਘਰੇਲੂ ਕ੍ਰਿਕਟ ਖੇਡਦੇ ਹਨ।
ਇਸ ਨੀਲਾਮੀ ਦੇ ਪਹਿਲੇ ਸੈਸ਼ਨ ਦੀ ਖਿੱਚ ਅੱਜ ਐਤਵਾਰ ਨੂੰ ਲਿਵਿੰਗਸਟੋਨ ਰਹੇ ਜਿਨ੍ਹਾਂ ਨੂੰ 10 ਕਰੋੜ ਤੋਂ ਵੱਧ ਮਿਲਿਆ। ਇਕ ਸਮੇਂ ਪੰਜ ਟੀਮਾਂ ਨੇ ਉਨ੍ਹਾਂ ਦੀ ਬੋਲੀ ਲਾਈ। ਲਿਵਿੰਗਸਟੋਨ ਪਿਛਲੇ ਸੈਸ਼ਨ ਵਿਚ ਰਾਜਸਥਾਨ ਰਾਇਲਜ਼ ਵੱਲੋਂ ਖੇਡੇ ਸਨ ਤੇ ਸਲੋਅ ਪਿੱਚਾਂ ਉੱਤੇਆਸ ਮੁਤਾਬਕ ਨਹੀਂ ਖੇਡ ਸਕੇ ਸਨ। ਸੁਪਰ ਕਿੰਗਜ਼ ਨੇ ਸ੍ਰੀਲੰਕਾ ਦੇ ਸਪਿੰਨਰ ਮਹੇਸ਼ ਤੀਕਸ਼ਣਾ ਨੂੰ 70 ਲੱਖ ਰੁਪਏ ਦਾ ਖ਼ਰੀਦਿਆ।ਭਾਰਤ ਦੇ ਚੇਤੇਸ਼ਵਰ ਪੁਜਾਰਾ ਨੂੰ ਕੋਈ ਖ਼ਰੀਦਦਾਰ ਨਹੀਂ ਮਿਲਿਆ, ਪਰ ਅਜਿੰਕਿਆ ਰਹਾਣੇ ਨੂੰ ਕੋਲਕਾਤਾ ਨਾਈਟ ਰਾਈਡਰਜ਼ ਨੇ ਇਕ ਕਰੋੜ ਵਿੱਚਖਰੀਦ ਲਿਆ। ਪਿਛਲੇ ਦਿਨੀਂ ਟੈਸਟ ਸੀਰੀਜ਼ ਮੌਕੇ ਭਾਰਤੀ ਬੱਲੇਬਾਜ਼ਾਂ ਨੂੰ ਪਰੇਸ਼ਾਨ ਕਰਨ ਵਾਲੇ ਦੱਖਣੀ ਅਫਰੀਕਾ ਦੇ ਤੇਜ਼ ਗੇਂਦਬਾਜ਼ ਮਾਰਕੋ ਜੇਨਸੇਨ ਲਈ ਸਨਰਾਈਜਰਜ਼ ਹੈਦਰਾਬਾਦ ਨੇ ਚਾਰ ਕਰੋੜ 20 ਲੱਖ ਰੁਪਏ ਦੀ ਬੋਲੀ ਲਾਈ।