ਨਵੀਂ ਦਿੱਲੀ, 30 ਮਈ, (ਪੋਸਟ ਬਿਊਰੋ)- ਕੋਰੋਨਾ ਦੀ ਮਹਾਮਾਰੀ ਨਾਲ ਭਾਰਤ ਵਿੱਚ ਮਰਨ ਵਾਲਿਆਂ ਦੀ ਗਿਣਤੀ ਪੰਜ ਹਜ਼ਾਰ ਦੇ ਨੇੜੇ ਪੁੱਜ ਗਈ ਹੈ। ਪਿਛਲੇ ਕੁਝ ਦਿਨਾਂ ਤੋਂ ਨਵੇਂ ਕੇਸਾਂ ਨਾਲ ਮਰੀਜ਼ਾਂ ਦੀ ਗਿਣਤੀ ਵੀ ਤੇਜ਼ੀ ਨਾਲ ਵਧੀ ਜਾਂਦੀ ਹੈ। ਮਹਾਰਾਸ਼ਟਰ, ਗੁਜਰਾਤ, ਦਿੱਲੀ, ਤਾਮਿਲ ਨਾਡੂ, ਰਾਜਸਥਾਨ, ਹਰਿਆਣਾ ਤੇ ਕਰਨਾਟਕ ਵਰਗੇ ਰਾਜਾਂ ਵਿੱਚ ਕੋਰੋਨਾ ਦੇ ਕੇਸ ਤੇਜ਼ੀ ਨਾਲ ਵਧਣ ਨੇ ਦੇਸ਼ ਵਿੱਚ ਚਿੰਤਾ ਜਨਕ ਹਾਲਾਤ ਪੈਦਾ ਕੀਤੇ ਹੋਏ ਹਨ।
ਸ਼ਨੀਵਾਰ ਸ਼ਾਮ ਤੱਕ ਮਿਲੀ ਜਾਣਕਾਰੀ ਅਨੁਸਾਰ ਭਾਰਤ ਵਿਚ ਕੋਰੋਨਾ ਦੇ ਕੇਸਾਂ ਦੀ ਗਿਣਤੀ ਵਧ ਕੇ 1,75,586 ਹੋ ਗਈ ਹੈ। ਇਨ੍ਹਾਂ ਵਿੱਚੋਂ ਇਸ ਵਕਤ ਸਰਗਰਮ ਕੇਸ 87,772 ਹਨ ਤੇ 82,823 ਲੋਕ ਠੀਕ ਹੋ ਚੁੱਕੇ ਹਨ, ਪਰ ਇਸ ਨਾਲ ਅੱਜ ਸ਼ਾਮ ਤੱਕ 4,991 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਅੱਜ ਸ਼ਨਿਚਰਵਾਰ ਵੀ 170 ਲੋਕਾਂ ਦੀ ਮੌਤ ਹੋਈ ਹੈ, ਜਿਨ੍ਹਾਂ ਵਿੱਚ ਸਭ ਤੋਂ ਵੱਧ ਮਹਾਰਾਸ਼ਟਰ ਵਿੱਚ 99 ਲੋਕ ਮਾਰੇ ਗਏ ਹਨ। ਗੁਜਰਾਤ ਵਿੱਚ 27, ਦਿੱਲੀ ਵਿੱਚ 18, ਰਾਜਸਥਾਨ ਵਿੱਚ ਨੌਂ, ਪੱਛਮੀ ਬੰਗਾਲ ਵਿੱਚ ਸੱਤ, ਤਾਮਿਲ ਨਾਡੂ ਵਿੱਚ ਛੇ ਤੇ ਹਰਿਆਣਾ, ਛੱਤੀਸਗੜ੍ਹ, ਕਰਨਾਟਕ ਅਤੇ ਕੇਰਲ ਵਿੱਚ ਇਕ-ਇਕ ਵਿਅਕਤੀ ਦੀ ਮੌਤ ਹੋਈ ਹੈ। ਮਹਾਰਾਸ਼ਟਰ ਵਿੱਚ ਕੁੱਲ ਮੌਤਾਂ ਦੀ ਗਿਣਤੀ 2098, ਗੁਜਰਾਤ ਵਿੱਚ 980, ਦਿੱਲੀ ਵਿੱਚ 398, ਮੱਧ ਪ੍ਰਦੇਸ਼ ਵਿੱਚ 334, ਪੱਛਮੀ ਬੰਗਾਲ ਵਿੱਚ 302, ਉੱਤਰ ਪ੍ਰਦੇਸ਼ ਵਿੱਚ 198 ਅਤੇ ਰਾਜਸਥਾਨ ਵਿੱਚ 184 ਲੋਕਾਂ ਤੋਂ ਇਲਾਵਾ ਤਾਮਿਲ ਨਾਡੂ ਵਿੱਚ 154 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ।